Aynarouz - آينوروز

(یاخود آینه روز) رومجه آیون اوروز یعنی ((جبل مقدس )) اسمندن مأخوذ اولوب، اصل اسمی آتوس در. سلانیكك شرق جنوبیسنده واقع وزمان قدیمده (خالكیدیق) اسمیله معروف اولان شبه جزیره نك منتهای جنوبنده اوزانان اوچ طار دیلك شرق جهتنده بولنانیدر، كه شمال غربیدن جنوب شرقی یه طوغری اولوب، ٥۰ كیلومتره طولی واردر. بو دیل اصل آینوروز ویا (آتوس) دنیلن بر طاغدن عبارتدر، كه بونك اك مرتفع محلی منتهای جنوبنده اولوب، ١٩٣٥ متره ارتفاعی واردر. موقع مذكورده بیاضمتراق كلسدن عبارت جسیم بر محروط شكلنده كورینن بو طاغك جنوبی اتكی ساحل بحرده ینه (آینوروز برونی) نامیله معروف بر برون تشكیل ایدیور. آینوروز دیلی غرب جنوبی طرفندن آینوروز كورفزیله و جنوب و شرق و شرق شمالی طرفندن دخی آطه لر دكیزیله مخاط اولوب، شمال غربی طرفندن ٢٢٨٥ متره كنیش و ١٥ متره یوكسك بر برزخله قره یه مربوطدر. اسكی یونان مورخلرینك روایتنه كوره، یونان اوزرینه سوق عسكر ایتمش اولان ایران قدیم شاهلرندن اكسرسیس (شیرویه ? ) طرفندن بو برزخ یاریلوب، قتال حكمنه قونلمش ایمش. حقیقةً وقتیله آچلمش اولدیغنه دلالت ایده جك بعض اثرلر واردر، و آینوروز بروننك آچیقلرنده فرطونه نك اكسیك اولمامسی بو عملیاته احتیاج كوسترمش اولسه كركدر. مذكور برزخ آینوروز قضاسیله كسندیره قضاسی بیننده حدود یرینی طوتیور. آینوروز كوچكلكیله برابر قضا اتخاذ اولنوب، سلانیك ولایت و سنجاغنه ملحقدر، مركزی قضا همان اورته سنده بولنان (قریس) قریه سیدر. آنجق بو قضاده مناستر وصومعه لرله بونلره عاىٔد (متوخ) تعبیر اولنور بعض كوچك چفتلكلردن بشقه بر شی بولنمدیغندن، و بو مناسترلر تكالیف میریه دن معاف اولوب، یالكز سنوی مقطوع اوله رق ٧٢۰۰۰ غروس مناسترلر طرفندن وكیل مخصوصلری معرفتیله طوغریدن مالیه خزینه سنه كوندرلدیكندن، بو قضامستثنا بر حالده بولنیور. قضا قاىٔممقامی مذكور قریه ده اقامت ایدوب، مناسترلر طرفندن بهر سنه انتخاب اولنان بر و كیللر مجلسیله ادارۀ امور

ایدر. مناسترلر اوچ صنفه منقسم اولوب، اصل مناستر دنیلن بیوكلری، ٢۰ ، (اسكیت) دنیلن و ٢۰۰ قدر زلهبك چله خانه لری حكمنده اولانلری ٩ ، و (كیلی) دنیلوب ٦۰ قدر راهبك چله خانه لری حكمنده اولانلری ١۰۰ ، كه جمعاً ١٢٩ در. بونلرده بولنان راهبلرله خدمه وساىٔره اوله رق بتون قضانك اهالیسی، یالكز ذكوردن عبارت اولمق اوزره، ۰۰۰ ٢۰ كشی قدردر؛ چونكه قادین دخول و قامتی ممنوع اولوب، مناسترلره دیشی حیوان بیله آلنماز. درون قضاده بولنان متوخلرك عددی ٦٥ اولوب، عمومنك اراضیسی ١۰۰۰۰۰ دونم قدردر. هر بر متوخده جسامتنه كوره قرق آلتمش اوكوز و اون اون بش مانده بولندیغی كبی، بیوك متوخلرله اكثر مناسترلرك بیك وبیك بشر یوز اغناملری و استر وبیكیر وساىٔر حیواناتلری دخی واردر. متوخلرده باشلیجه بغدای، آرپه، یولاف و بورچاق زرع اولنوب، مناسترلره مربوط باغلر وزیتونلقلر دخی بولنیور. بو محصولات آنجق مناسترلری اداره ایدوب، یالكز فندیق محصولاتی چوق اولدیغندن بو محصولدن خیلی اخراجات وقوعبولیور. اورمانلردن كسیلن اودون و كراسته دن دخی اخراجات اولور. مركز قضاده ٢۰۰ قدر دكان بولنوب، باشلیجه راهبلرك تخته دن یاپدقلری قاشیق، خاچ، قالپاق كبی شیلر صاتیلور. سنه ده بر كره اغستوسنك ١٥ نده بر پنایر قورویلوب، اوچ كون دوام ایدر، و هر جمعه ایرتسی كونی دخی پازار قوریلوب، مناسترلر راهبلریله زوار بیننده آلیش ویریش و قوع بولور. راهبلر آغاجدن بعض عزیز رسملری و تسبیح وساىٔر امور مذهبیه یه متعلق شیلر یایوب، باشلیجه روس زوارلرینه صاتارلر. هر مناسترده ینه راهبلردن ترزی وپاپو چجی كبی اصناف بولنور. مناسترلردن بعضیسنك راهبلری روم و بعضیسنك كیلر روس اولدیغندن، هممذهب اولان بو ایكی قوم آره سنده رقابت و محاسده اكیسك دكلدر. سنوی آینوروزه ٤۰۰۰ قدر روس و ٢۰۰۰ قدر روم زواری كیدوب، آیلرجه مناسترلرده اقامت ایدرلر. اكثر مناسترلرك یاننده برر كتبخانه بولنوب، ایچلرنده امور مذهبیه یه متعلق اسكی كتابلر و بعض ذی قیمت آنتیقه لر بولنور. ازمنۀ ماضیه ده قورصانلرك قور.

قوسندن مناسترلرك چوغی متین سورلر ایچنه آلنوب، عادتا تحكیم اولنمشلردر. قضا طاغلق اولمغله، اكثر طرفلری صرب و اوچوروملی اولوب، یوللری دخی پك فنادر. اورمانلرینك آغاجلری باشلیجه چامدن عبارت اولوب، میشه و كستانه آغاجلری دخی واردر.