Ainos - آينو

آستانك سواحل شرقیه سی قارشیسنده جاپونیانك شمالنده كی آطه لر ده ساكن بر قومدر، كه نیم و حشی حالنده اولوب، سیاسةً هیچ بر اهمیتلری یوغیسه ده، چینلیلر، مغوللر و مانچولرله هیچ بر مناسبتلری اولمیوب، آیریجه بر جنسیت تشكیل ایتدكلرندن، علم البشر و علی اللسان نقطۀ نظرنجه بیوك اهمیتلری واردر. بونلر شمدیكی حالده یالكز جاپونیایی تركیب ایدن بیوك آطه لرك اك شمالیسی اولان (یزو) جزیره سیله اونك شمالنده كی (قوریله) آطه لرنده وروسیه نك النده بولنان (سخالین) جزیره سنك نصف جنوبیسنده ساكن بولنیورلرسه ده، وقتیله بتون جاپونیانك و (فورموزه) آطه سیله ساىٔر جزایر صغیره نك و حتی هند چینینك سواحل شرقیه-

سنك دخی اهالیسی بونلردن عبارت بولنمش اولدیغی دلاىٔل عدیده ایله مثبتدر. بو یرلرده كی اهالیٔ حاضره نك دخی بونلرله اقوام ساىٔره نك، وهله جاپونیالیلرك بونلرله چینلیلرك اختلاطندن تولد ایتمش اولدقلری سیمالرندن نمایاندر. كندیلری شمدیكی حالده قبیله قبیله یاشایوب، ایچلرندن اك اختیار ویا اك زنكینلرینی رىٔیسی اتخاذ ایدرلر؛ وقامشدن قلبه لر یاپوب، صیجاق طرفلرده یاپراقله، و شمال جهتلرنده طوپراقله اورترلر. تعیشلری باشلیجه طوتدقلری بالیق ویا آو اتندن عبارت اولوب، جاپونیالیلردن‌ پرنچ دخی آلیرلر. یازیلری و مسكوكاتلری اولمیوب، خاطرده طوتمق ایستدكلری شیلر ایچون آغاجلرده برر كرتك یاپارلر، و تجارتلری مبادلۀ عینیه دن عبارتدر. كونش، آی، یلدیز وساىٔر شیلره عبارت ایدرلر، و بونلره قربان كسرلر. طوتدقلری بالیقلرك باشلرینی، دكیز الهنه قربان اولمق اوزره، ساحلده یاقارلر. اثوابلری یازین بر نوع آغاج قبوغندن قادینلری معرفتیله یاپیلان قیصه بر جاكتدن، وقیشین حیوان دریسندن عبارتدر. كرك قادینلر و كرك ارككلری صاچلرینی اوزاتیرلر، وقولاقلرینه كوپه لر و حلقه لر طاقارلر. بویلری اورته، چهره لری مدورجه، كوزلری پارلاق، برونلری قیصه وقالینجه، دوداقلری آز قالین، ساىٔر اعضای بدنلری ایری و ملحمجه، صاچلری چوق و اوزون و اكثریا سیاه وبعضاً كستانه رنكنده، بدنلری و علی الخصوص كوكس و اوموزلری قیللی ورنكلری اسمرجه در؛ و الحاصل هیىٔت عمومیه لری چركیندن یازده كوزل دنیله جك بر صورتده در؛ و مغول وساىٔر اجناس بشردن زیاده قافقاس جنسنه مشابهتلری واردر. تعدد ازواج عندلرنده مرعی اولمیوب، طاىٔفۀ نسایه حرمتلری واردر؛ وزوجه لرینی اكثریا اقربالری بیننده انتخاب ایدیورلرسه ده، پك یقین اقربا بیننده ازدواجی جاىٔز كورمزلر. ناموسلی وطوغری آدملر اولدقلریچون، جاپونیالیلر بونلری استخدام ایتمكله ماىٔلدرلر. كندیلری و انواع تجربه لرله بدنلرینی آلیشدیردقلری مناسبتیله، قوتلی و تندرست ایسه لرده، غایت قورقاق و مطیعدرلر. سیما و هیىٔت بدنیه جه بشقه هیچ بر قومه بكزمدكلری كبی، لسانلری دخی بسبتون آیری اولوب، دنیاده هیچ بر لسانله مناسبت و مشابهتی یوقدر.