aurelius - آورليوس

مارقوس _ یاخود مارق اورل روما ایمپراطورلرندن اولوب، میلادك ١٢١ تاریخنده روماده طوغمشیدی. نفوذ و اعتبار صاحبی بر خاندانه منسوب اولوب، بیوك پدری (آنیوس وروس) ك نظارتی آلتنده تربیه اولنمشیدی. ایمپراطور آدریان كندیسنی كنج ایكن روما شهر امینلكنه تعیین، و خلفی آنطونینوسه بونی آخرت اولادلغنه قبول ایله ولی عهد ایتمسنی وصیت ایتمشدی. بو وجهله صاحب ترجمه ١٦١ تاریخنده آنطونینوسه خلف اولوب، روما تختنه جلوس ایتمشدر. جلوسنی متعاقب تیبر وپو ایرماقلرینك طغیانی، قحط وغلا وقوعی، و باعلتنك ظهوری، برتانیاده اختلال وقوعی، (قات) و (غاد) قوملرینك آلمانیایه هجومی، ایرانیلرك تجاوزی كبی بر چوق مصیبتلرك ایچنده بولنمش ایسه ده، برتانیاده كی اختلالی سردارلری معرفتیله باصدیردیغی

كبی، ایرانك اوزرینه دخی آخرت قرداشی (لوچیوس وروس) ی كوندرمش؛ قحط و غلانك اوكنی آلمق ایچون عمومی انبارلر یاپمش، ومرقوم (وروس) ك یراندن مظفراً عودتنده كندیسنی استصحابله، بالذات آلمانیادن هجوم ایتمش اولان اقوام وحشیه نك اوزرینه یوریمشدر. (وروس) بو محاربه ده وفات ایتمش ایسه ده، آورلیوس مظفر اولوب، سوریه و الیسی (آویدیوس قاسیوس) ك اختلالنی خبر آلنجه یه قدر تعقیبلرنده دوام ایتمشدر. مومی الیهك تربیه سی مقصدیله سوریه یه عزیمت ایتمش ایسه ده، و صولیله برابر، كندیسنه (آویدیوس قاسیوس) ك سرمقطوعی تقدیم اولندیغندن، حربه حاجت قالمیوب، محتاج اصلاح اولان آسیا ممالكنده اجرای اصلاحاتله اوغراشمش؛ و ١٧٧ ده رومایه عودتنده فاتح و مظفر صفتیله استقبال اولنمش؛ و بعده ینه جرمانیایه عزیمتله بر مدت دها تنكیل اشقیا ایله اوغراشدقدن صكره، مسقط رأسی اولان (سیر میوم) ده وفات ایتمشدر. حكیم، عادل و جسور بر حكمدار اولوب، تبعه سنك استحصال سعادتیچون چالیشمش؛ و ((كندیمه)) عنوانیله یونان قدیم لساننده ١٢ فصلدن مركب بر كتاب یازمشدر، كه الیوم باقی اولوب، طبع و آوروپا لسانلرینه ترجمه اولنمشدر. خرستیانلر بونك زماننده دخی بعض تضییقاته دوچار اولمشلردر.