Annibal ~ آنيبال
Kamus-ul'Alam - Annibal ~ آنيبال maddesi. Sayfa: 447 - Sira: 8
Annibal - آنيبال
و دها طوغریسی آن بعل قرتاجلیلرك اك مشهور سردارلری اولوب، آمیلقارك اوغلی ایدی. قبل المیلاد ٢٤٧ تاریخنده طوغوب، دها چوجق ایكن، رومالیلره قارشی اجرای خصومته پدری طرفندن تحلیف اولنمشیدی. انیشته سی آسدروبال (ویا اسدربعل) ك قومانده سی آلتنده اسپانیاده اوچ سنه محاربه ده بولندقدن صكره، مومی الیهك وفاتی اوزرینه، ٢٥ یاشنده اولدیغی حالده، بتون قرتاج عسكرینك سردارلغنه انتخاب اولننجه، رومالیلرله اولان عهودی نقض ایله، رومانك حمایه سی آلتنده بولنان (ساغونته) شهرینی قبل لمیلاد ٢١٩ تاریخنده ضبط و تخریب ایتمكله برابر، رومالیلری رومانك ایچنده مغلوب ایتمك دها قولایدر ظنیله، یوز بیك عسكرله اسپانیادن چیقوب، فرانسه نك ایچندن كچه رك، و آلپ طاغلرینی آشه رق، ایتالیایه دخول، و بربرینی متعاقب (تسین)، (تربیا) و (تراسیمنه) محاربه لرینی قزانوب، اوچ قونسلوس مغلوب ایتمشدی. (فابیوس) تدابیر حكیمانه سیله بر آز وقت كندیسنی طوردیرمغه موفق اولمش ایسه ده، ایكی سنه سورن بو محاربه لرله ایتالیانك اورته سنه قدر ایلریلمش، وقبل المیلاد ٢١٦ تاریخنده (قانه) محاربه سنده رومالیلری كلیاً مغلوب، و ٥۰۰۰۰ عسكرلرینی اتلاف ایتمشدر. او وقت رومانك اوزرینه یوریمش اوله ایدی، روما دولتنی بسبتون استیصال ایتمش اوله جقدیسه ده، امداد آلمه دن رومایه كیرمكه جسارت ایده مدیكندن، و بر طرفدن رومالیلر وقت بولوب، قوتلرینی تجدید ایتمش، بر طرفدن ده كندی عسكری ایتالیانك ذوق و صفالرینه طالمش اولدقلری كبی، اسپانیادن امداد كتیرن برادری (آسدروبال) دخی و صول بولمه دن، قبل المیلاد ٢۰٧ تاریخنده (متاوره) ده منهزم و مقتول اولدیغندن، وقرتاجدن
دخی نقود و امداد پك كج و كوج كلدیكندن، آنیبال (نوله) شهری پیشكاهنده ایكی دفعه (مارسلوس) طرفندن انهزامه اوغرادلمش؛ و مع هذا ینه ثبات و مقاومت ایدوب، ایتالیاده طورمش؛ و یالكز روما سردارلرندن (اسكیپیون) ك آفریقایه سوق عسكر ایتدیكنی ایشیدنجه، و طننی مدافعه ایچون، ایتالیایی ترك ایتمكه مجبور اولمشدر. آفریقایه و صول بولور بولماز، قبل المیلاد ٢۰٢ تاریخنده (زامه) اووه سنده روما عسكریله محاربه یه طوتیشوب، مغلوب اولمغله، ترك و طنه مجبور اولوب، سوریه حكمداری آنطیوخسه التجا، و بو حكمداری رومالیلره اعلان حربه تشویق ایتدكدن صكره، اوراده دخی طوره میوب، (بیتنیا) یعنی خداوندكار جهتی حكمداری (پروسیاس) ە التجا ایتمشدر. پروسیاس كندیسنی رومالیلرك الینه تسلیم ایتمكی بونلره و عد ایتمش اولدیغندن، آنیبال خصم جانلرینك الینه دوشمه مك ایچون، زهر ایچوب، قبل المیلاد ١٨٢ تاریخنده، ٦٤ یاشنده اولدیغی حالده، اتلاف نفس ایتمشدر. (قورنلیوس نپوس) آنیبالك ترجمۀ حالنی یازمشدر.
Kamusul Alam, Şemseddin Sami; Kamusul Alamde Annibal maddesi. osmanlıcada Annibal ne demek, Annibal anlamı manası, Annibal osmanlıca nasıl yazılır. Osmanlıca sözlükte Annibal hakkında bilgi. Arapça Annibal ne demek. Arapça osmanlıca sözlük. Farsçada Annibal anlamı
Kamusul Alamde - آنيبال Annibal maddesi. Şemseddin Sami, Kamusul Alam Ansiklopedisi