Aleşkerd - آلشكرد

ارضروم ولایتنك بایزید سنجاغنده بر قضادر، كه سنجاغك غرب شمالی جهتنده واقع اولوب، شمالاً كوسه طاغله روسیه ممالكندن آیرلمشدر، غرباً رضروم سنجاغنك پاسین قضاسیله، جنوباً عنتاب وشرقاً قره كلیسا قضالریله محدوددر. مراد نهری تابعلرندن (شریان صو) نهری قضایی غربدن شرقه شق ایده رك، صاغ وصولدن بر قاچ چای دخی اخذ ایدر. اراضیسی طاغلق اولوب، مذكور نهر وچایلرك مجر الری اطرافنده بر آز اووه سی ومنبت دره لری دخی واردر. مركزی اولان (طپراق قلعه) قصبه سی مذكور (شریان صو) یه صولدن یعنی شمالدن كلن بر چایك اوزرنده وكوسه طاغك جنوبی اتكنده واقع اولوب، اوكنده جنوب غربی یه طوغری ممتد بر اووه واردر. مركز قضا بایزددن ٢٤ ساعت مسافه ده در. قضا آماد، اسكان، طاهر، قره صو وملا سلیمان ناملریله بش ناحیه یی حاوی اولوب، ١١٥ قریه، ٢٦٣٧ خانه و ١٦٦١۰ اهالیسی واردر، كه بونلرك یالكز ٣٨٢٥ ی ارمنی وقصوری كاملاً اسلامدر. درون قضاده ٣ جامع، ١ رشدیه مكتبی، ٨ اسلام و ١۰ خرستیان مكتب ابتدایىٔسی، ٣ مدرسه، و ١١ كلیسا موجوددر. محصولاتی حبوبات متنوعه ایله سبزه دن، ومعمولات محلیه دی كلیم، چكه وچوراب، كبی شیلردن عبارتدر. قضانك اورمانلری آز ایسه ده مرعالری ضررسز اولوب، اهالینك خیلی اغنامی واردر.