Alsace ~ آلساس
Kamus-ul'Alam - Alsace ~ آلساس maddesi. Sayfa: 309 - Sira: 11
Alsace - آلساس
آلمانیانك اخیراً یعنی ١٨٧١ تاریخ میلادیسنده فرانسه دن ضبط ایتمش اولدیغی ایكی ایالتك بری اولوب، (لورن) ایله برابر طوغریدن طوغری یه آلمانیا دولتنه تابع بر ایالت ممتازه حكمنه قونمشدر. آلمانیا دولتنك منتهای جنوب غربیسنده و (ووسژه) سلسلۀ جبالی ایله (رین) ایرماغی آره سنده واقع اولوب، شرقاً (باده) بیوك دوقه لغیله، شمالاً (پالاتینه) ایله یعنی رین باویره سیله، شمال غربی طرفندن (لورن) له، غرباً فرانسه ایله، جنوباً دخی اسویچره ایله محدود ومحاطدر. جنوبدن (جورا) سلسله سی اسویچره دن آیریغی كبی، شمال غربی طرفندن دخی بونكله (لورن) آره سنده (ووسژه) سلسله سنك بر فرعی اوزاندیغندن، اطراف اربعه سی حدود طبیعیه ایله محدود دیمكدر. جنوبدن شماله اولان طولی ٢۰۰ وشرقدن غربه اولان عرضی حد وسطی ایله ٤۰ ویا ٤٥ كیلومتره در. بو قطعه نك غرب جهتی (ووسژه) سلسله سنك اتكلرندن عبارت اولمغله، طاغلق، وشرق جهتی ایسه دوز اولوب، (رین) ایرماغندن بشقه (جورا) طاغلرندن نبعانله همان (رین) ە متوازیاً جنوبدن شماله طوغری آقان (ایل) یاخود (ال) نهری بو اووه نك اورته سندن چكه رك، و (ووسژه) سلسله سندن ایین بر چوق چایلری
دخی اخذ ایده رك، استراسبورغ شهرینك ایچندن چكدكدن صكره، صولدن (رین) ە منصب اولور. اراضیسی منبت ومحصولداردر. بو قطعه فرانسه نك النده ایكن آشاغی ویوقاری رین ناملریله ایكی ایالته منقسم اولوب، یوقاری رین ایالتنك بر پارچه سی یعنی (بلفور) قضاسی ینه فرانسه حدودی داخلنده قالمشدر. آلمانیانك ضبطنه چكدكدن صكره لورنله برابر بر ایالت اتخاذ ایدلمش اولمغله، بو ایالت اوچ قضا ویا سنجاغه منقسم اولوب، آلساس آشاغی ویوقاری آلساس ناملریله ینه ایكی یه بالتقسیم ایكی قضا، ولورن دخی بر قضا اعتبار اولنمشدر. استراسبورغ شهری ایالتك وآشاغی آلساس قضاسنك، (قولمار) شهری یوقاری آلساسك، (مج) شهری دخی لورنك مركزیدر. آلساسك مساحۀ سطحیه سی ٨٢٨٦ مربع كیلومتره اولوب، ٦٢٦ ١۰٧٤ اهالیسی واردر، كه بونلرك قسم اعظمی آلمان وبر قسمی ده فرانسز اولوب، اكثر اهالی ایكی لسانله دخی متكلمدرلر. اسكی زمانلرده دخی بو مملكت (توتون) یعنی اسكی آلمان و (كلت) قوملریله مسكون اولوب، رومالیلرك ید ضبطنه چكمشیدی. رومالیلردن صكره فرانقلره انتقال ایدوب، اوندن صكره كاه آلمانیا وكاه فرانسه یه تابع اولمش، وبروقتلر دخی مستقل قونتلرك ید اداره سنده بولنمشدر. آلساس ایله لورنك آلمانیا طرفندن ضبطی فرانسز لر ایچون اونودلمسی مشكل بر یاره اولمغله، بو ایكی قطعه نك استردادینی خیاللرندن دور ایده مه مكده درلر.
Kamusul Alam, Şemseddin Sami; Kamusul Alamde Alsace maddesi. osmanlıcada Alsace ne demek, Alsace anlamı manası, Alsace osmanlıca nasıl yazılır. Osmanlıca sözlükte Alsace hakkında bilgi. Arapça Alsace ne demek. Arapça osmanlıca sözlük. Farsçada Alsace anlamı
Kamusul Alamde - آلساس Alsace maddesi. Şemseddin Sami, Kamusul Alam Ansiklopedisi