Alp Arslan - آلب آرسلان

(محمد _ بن داود بن میكاىٔل بن سلچوق) ملوك سلچوقیه نك ایكنجیسی وبو سلاله نك اك بیوك، اك جسور، اك عادل پادشاهی اولوب، كنج وفات ایتمش وآز سلطنت سورمش اولدیغی حالده دور سلطنتی غزوات وفتح ممالك وقوعاتیله مملودر. پدری چغری پك دیمكله مشهور داود بن میكىٔل برادری طغرل بكل زمان سلطنتنده خراسان والیسی اولوب، ٤٥٣ تاریخنده وفات ایتمكله، آ

سوق عسكر ایدوب، مغلوب ایتدیكی حالده، یبغویه عفو ایله معامله ایتدیكی كبی، قطلمشه دخی بویله معامله نیتنده ایكن، مومی الیه قورقودن ویا دیكر بر سببله اولو بولنمش، وكندیسی عالم وفاضل وعلی الخصوص علم هیىٔتده ماهر بر ذات اولمغله، آلب آرسلان زیاده سیله تأسف ایدوب، بروقت ماتم اجرا ایتمشیدی. ٤٥٧ تاریخنده آلب آرسلان سلچوقك مرقدینی زیارت نیتیله جیخونی چكوب بخارا وخوار زم جهتلرینی دخی تحت اطاعتنه آلمش؛ و بر سنه صكره كورجستان وساىٔر قافقاسیه طرفلرینی فتحله (شرف الدوله مسلم) ك النده بولنان موصل وانبار وتكریت طرفلرینی، و ٤٦٣ ده دیاربكر وحلب جهتلرینی دخی ضبط ایتمش؛ واورادن رومه یعنی آناطولی قطعه سنه تجاوزله قیصریه وسیواس طرفلرنده بعض غلبه لره ناىٔل اولمشیدی. او صره ده قسطنطینیه روم ایمپراطورلغی تحتنده (او دو كیا)‌ اسمنده بر قادین بولنمغله، بو تهكله لره قارشی عدم اقتدارینی آكلایه رق، مشتركاً سلطنت سورمك اوزره (دیوزن رومان) اسمنده جور برذاتی تخته اجلاس ایتمشیدی. بو ذات كلیتلی‌ بر عسكر ترتیب ایده رك، آلب آرسلانك اوزرینه هجوم ایتمش ایسه ده، ملازكرد جوارنده واقع اولان محاربه ده آلب آرسلان قرق بیك سواری دلاوریله روم عسكرینی احاطه ایدوب، پك قانلی بر محاربه دن صكره ایمپراطورك بر قاچ یوز بیكدن عبارت اولان عساكروفیره سنی مغلوب وپریشان ایتمش، وایمپراطو ایله رؤسادن بر قاچ ذاتی اسیرطوتمشدر. محاربه دن اول آلب آرسلان قان دوكلمه مك مقصد انسالیتپرورانه سیله صلحی تكلیف ایتدیكی حالده، ایمپراطور كمال كبر‌ونحوتله بو تكلیفی رد ایتمشیدی؛ بو یله ایكن آلب آرسلان كندیسنه فوق العاده اكرام وتلطیفله معامله ایده رك، مؤخراً بر طاقم فدیه وجزیه لر مقابلنده معززاً مملكتنه اعاده ایتمشدر. آنجق قسطنطینیه تختی بو آرالقده بشقه سنك الینه چكمش اولدیغندن (رومان) آماسیه وآطنه ده ایمپراطور جدیدك عسكریله محاربه یه مجبور اولوب، مغلوب اولمش وحیاتنه طوقنمامق شرطیله تسلیم اولمشیكن قسطنطینیه دن ویریلن امر اوزرینه كوزلری چیقارق متأثراً وفات ایتمش؛ وبو صورتله آلب آرسلانه اولان وعد تعهد لرینی اجرایه موفق اوله مامشدر. آلب آرسلان بو مظفریتی

متعاقب ینه جیخون یاقه سنه شتاب ایده رك، (قریر) دنیلن بر كوچك قصبه نك كنارنده كی حصنك محافظی یوسف خوارزمی یی سبقت ایتمش بر قباحتندن طولایی، مجازات امر ایتدیكی صره ده، مرقوم خنجریله هجوم ایدوب، یاره لامش اولمغله، بو یاره نك تأثیرندن ٣٤ كون صكره ٤٦٥ سنه سی ربیع الآ خرینك اوننجی كونی وفات ایتمشدر. وفاتنده ٤۰ یاشنده اولوب، ٩ سنه سلطنت سورمشدر. هر بیوك پادشاهك بر بیوك وزیری اولمق مقرر اولدیغندن، آلب آرسلانك دخی بغدادك دار الفتونی مقامنده اولان مشهور مدرسۀ نظامیه نك بانیسی (نظام الملك ) كبی بر وزیری وار ایدی، كه بتون مدت سلطنتنده وزارت ایتدیكی كبی، اوغلی ملكشاهك جلوسندن صكره دخی مسندنده ابقا اولنمشیدی.