Assoucy - آسوسي

فرانسه نك اسكی شاعرلرندن اولوب، میلادك ١٦۰٤ تاریخنده پارسده طوغمش، و ١٦٧٩ ده وفات ایتمشدر. چوجق ایكن پدرینك اوندن قاچوب، دودوك چالمغله بر طاقم چالغیجیلره التحاق ایتمش، وبر آره لق ساووآ خانداننه انتساب ایدوب، بعده اون اوچنجی لویینك سراینه تقربله، او وقت چوجق بولنان اون دردنجی لویی یه مصاحب اولمش؛ صكره تكرار سیاحته باشلایوب، ایتالیاده بر پاپاسی هجو ایتدیكیچون، انكیزیسیونك الینه دوشه رك، حبس اولنمش؛ وقورتلدقدنصكره، فرانسه یه عودت ایده رك، سؤ اخلاقدن طولایی بر دها حبسخانه یی كورمش. هزل آمیز بعض شعرلری واردر، كه زماننده شهرت بولوب، اوقویانلر بولنوردی.