Asoures - آسور

بحر محیط آطلاسیده جبل طارق بوغازینك ٣٢۰ میل بحری غربنده وبر آز شماله ماىٔل بر طاقم آطه لردر، كه آفریقادن زیاده آوروپایه قربیتلری اولدیغی حالده مادره، قناریه، ویشیل برون آطه لریله برابر آفریقا

قطعه سی منسوباتندن عد اولنمشلردر. بو آطه لر پورتكیز دولتنك تحت ضبطنده بولنیورلر. بو آطه لر شرق جنوبیدن غرب شمالی یه طوغری ١۰۰ میل بحری مسافه سنده ممتد اولوب، َ٥۰ ْ٣٦ ایله َ٤٥ ْ٣٩ عرض شمالی و ْ٢٧ ایله َ٤۰ ْ٣٣ طول غربی آره سنده واقع، واوچ طاقمه منقسم ٩ بیوك جزیره ایله بر چوق ده كوچك جزایردن مركبدرلر. شرق جنوبی طرفنده (سانته ماریه) ایله (سان میكل) و (فورمیغاس) یعنی ((قرینجه لر)) دنیلن بر چوق كوچوجك آطه لر؛ اورته ده (ترچیرا)، (سان جورجی)، (پیقو)، (فایال) و (غراچیوزه) ؛ غرب شمالیده دخی (فلورس) و (قلوروو) آطه لری بولنیور. مركزلری (ترچیرا) آطه سنده كی (آنغره) شهریدر. بوجزایرك اراضیسی كاملاً اراضیٔ بركانیه دن، وطاغلری سونمش بركان آغزلرندن عبارت اولوب، بناءً علیه معدن صولری وقاپلیجه لری دخی چوقدر. اكثریسی طاغلق اولوب، طاغلری غریب الشكل وساحللری ده قیالقدر. بناءً علیه طبیعی لیمانلری پك آزدر. هوالری اسپانیانك جنوب طرفلری هواسنه مشابه اولوب، ملایم وصاغلام ایسه ده، تحولاتی پك سریع اولوب، قرارسزدر، وعلینالخصوص قیشین بوره وفرطونه لری پك چوقدر. آطه لرك آره لری درین وصاغلامدر. بو آطه لرده اوروپانك كافۀ محصولاتیله برابر ممالك حاره یه مخصوص بعض محصولات دخی یتیشیور ایسه ده، اك مبذول واك ایی محصوللری پورتقالدر. حیوانات وحشیه لری پك آز،‌ وهله زهرلی حیوانلری بسبتون مفقوددر. مركبلری ایری وغایت چوق اولدیغی كبی، اغناملری وعلی الخصوص چكیلری وطموزلری دخی پك كلیتلیدر. زراعت اراضی وهوانك مساعده سی نسبتنده ترقی ایتمیوب، اهالیلری او قدر چالیشقان دكلدر. بو آطه لرك اهالیسی باشلیجه پورتكیزلیلردن عبارت ایسه ده، بر طرفدن فلمنكدن بر چوق مهاجر وبر طرفدن دخی آفریقادن بر چوق عمله كلوب، قاریشدقلرندن بونلرك سیمالری پورتكیزلیلرك كندن دها آچیق ودها كوزلدر. كندیلری ساكن ومهماننواز اولوب، قاریلری ده اكثریت اوزره اون اون بشر چوق طوغرودقلرندن، برازیلیایه اولان كلیتلی هجرتلریله برابر، كوندن كونه چوغالمقده درلر. یكرمی بش سنه اول كی تحریره كوره، بو جزایرك اهالیسی ٨٩٤ ٢٥١ نفوسدن عبارت اولوب، تقریباً وجه اوزره منقسم ایدیلر :

سان میكل آطه سنده ١١٤۰۰۰ نفوس ترچیرا )) ٤۰۰۰۰ )) پیقو )) ٣۰۰۰۰ )) فایال)) ٢٤۰۰۰ )) سان جورجی )) ١٥۰۰۰ )) غراچیوزه )) ١٢۰۰۰ )) فلورس ))‌ ١۰۰۰۰ )) سانته ماریه )) ٥۰۰۰ )) قوروو )) ١٥۰۰ )) آنجق او وقتدن بری دها خیلی چوغالمش اولملری ملحوظدر. لسانلری پورتكیزجه اولوب، كندیلرینه مخصوص بر شیوۀ تلفظلری واردر. آسور جزایری، موقعلری حسبیله اسكیدن بری آز چوق ومشوش بر صورتده معلوم ایدیسه ده، خالی اولوب، اون بشنجی عصر میلادیده پورتكیزلیلر طرفندن ضبط واسكان اولنمشلردر. [جزایرك هربری ایچون اسم مخصوصنه مراجعت بیوریله.]