Arizona - آريزونه

آمریقای شمالیده ممالك مجتمعه نك جماهیر غربیه سندن اولوب، غرباً (قالیفورنیا)، شمالاً (نواده) و (اوتاه)، شرقاً ((یكی مكسیقه)) جمهوریلریله وجنوباً (مكسیقه) حدودیله محدود ومحاطدر. حدود شمالیه وشرقیه سی مستقیم خطلردن عبارت اولوب، حدود شمالیه سنی تعیین ایدن خط ْ٣٧ عرض شمالی خطنه، وحدود

شرقیه سنی تعیین ایدن خط دخی َ٣۰ ْ١۰٥ طول غربی یه مصادفدر. حدود غربیه سی ایسه (قولورادو) نهرینك مجراسیله معیندر. مساحۀ سطحیه سی ٢٩٥۰٤٢ مربع كیلومتره اولوب، فرانسه نك نصفندن دها بیوك اولدیغی حالده، ١٨٧۰ تاریخ میلادیسنده واقع اولان تحریرده آنجق ٩٦٥٨ اهالیسی وار ایدی. ارا ضیسی خیلی مرتفع اولوب، ((قیالی طاغلر)) سلسله سنه مربوط بر طاقم طاغلر تشعب ایدیور. وضعیت عمومیه سی غربه یعنی ((قولورادو) وادیسنه طوغری ماىٔلدر. اكثر طرفلری قورو وصوسز اولوب، زراعه غیر قابل ایسه ده، آلتون، كومش، باقیر، قورشون وساىٔر معدنلری پك چوقدر؛ آنجق محصولات زرعیه وصناعیه ایله یوللرك فقدانندن وبرده اورالرده طولاشان (آپاش) اقوام وحشیه سنك تعرضاتنده طولایی، بو معدنلرك هیج بری لایقیله اخراج اولنمیور. حیوانات یتیشدیرمكه وحتی زراعته بیله صالح بعض یرلری ده واردر. مسكون اولان یرلری یالكز (قولورادو) نهریله اوكا منصب اولان چایلرك وادیلرندن عبارتدر. (آریزونه) حدودینك خارجنده (قالیفورنیا) كورفزینه دوكیلن (قولورادو) دن بشقه ایكی بیوك نهر دها واردر، كه بونلردن (جیلا) جنوب طرفلرینی، و (لیما) شمال طرفلرینی اروا ایده رك، قولورادویه دوكیلورلر. قابل زرع واسكان اولان یرلر بو نهرلرك وادیلرندن عبارت اولوب، بونلرك آره لرنده پایانسز خالی وغیر منبت یرلر واردر. هواسی صاغلام ایسه ده، غایت صیجاقدر، و بعض یرلرنده یاغمور بسبتون مجهولدر. مركزی جنوب طرفنده (جیلا) نهرینك بر تابعی اوزرنده واقع اولان (توسقون) قصبه سیدر. بو مملكتده اك اول اون یدنجی عصر میلادیده مكسیقه دن كیدن بر طاقم جزویت پاپاسلر قرق قدر قریه تأسیس ویرلیلرك بر طاقمنی تأنیس ایتمشلر ایسه ده، بونلره تحمیل اولنان تكالیف پك آغر اولدیغندن، مؤخراً عصیان ایده رك، اسپانیول قریه لرینی تخریب ایتمشلردی. اووقتدن اهمال اولنه رق، بسبتون اونودلمش ایكن، ١٨٥٤ تاریخ میلادیسنده مكسیقه حكومتی طرفندن اون ملیون دولار مقابلنده ممالك مجتمعه یه صاتیله رق، ابتدا یكی مكسیقه جمهوریتنه الحاق ایدلمش، و ١٨٦٣ ده مستقلاً بر جمهوریت حالنه قونمشدر.