Argentina - آرجنتين

یاخود آرجنتینه یاخود آمریقای جنوبینك جنوب طرفلرنده كاىٔن بیوك بر قطعه سیدر، كه اكثر طرفلری (( كومش چای )) دیمك اولان (ریویر دارجنت) واسپانیولجه (ریو دلاپلاته ) نهرینك حوضه سندن عبارت اولمغله، بو اسملۀ تسمیه اولنوب، (لاپلاته) هیىٔت متفقه سی دخی دنیلیر. آرجنتین جمهوریتی اقالیم معتدلۀ جنوبیه دن اولوب، آمریقای جنوبینك بوینه اوزانان (آند) سلسلۀ جبالیله بحر محیط اطلاسی آره سنده واقع اولمغله موقع وهواجه دنیانك اك كوزل یرلرندندر. شمال جهتنده شرقاً (اوروغوآی) نهریله (اوروغوآی) نهریله (اوورغوآی) جمهوریندن وبرازیلیا ایمپراطور لغندن آیرلدیغی كبی، شرق شمالی حدودی دخی (پاراغوآی) و (پیلقو مایو) نهریله (پاراغوای) جمهوریتندن آیرلمش، وشمالاً (بولیویا) ایله خط حدودی ْ٢٢ عرض جنوبیده (بیلقومایو) مجراسندن آیریلوب، ابتدا غربه وبعده غرب جنوبی یه طوغری اوزانه رق، (آند) سلسلۀ جبالنك صرتنه ‌واصل اولور. وجبال مذكوره نك صرتی غرباً آرجنتین ایله شیلی جمهوریتلری آره سنه ە خط حدود یرینی طوتار. (لاپلاته) نك منصبندن آشاغی شرقاً بحر محیط اطلاسی ایله محدود اولدیغی كبی، جنوباً دخی معین‌ حدودی اولمیوب، چونكه بونك جنوبنده واقع

اولان (پتاغونیا) قطعه سی اهالیٔ اصلیۀ وحشیه ایله مسكون اولدیغندن، آرجنتین جمهوریتی اونی دخی كندی الكاسندن عد ایده رك، اسكان ایتدجكه، حدودینی توسیع ایتمكده در. شو قدر وار كه شیلی جمهوریتی (پتاغونیا) نك منتهای جنوبنده اولان (ماجلان) بوغازینی ضبط ایدوب، آرجنتین جمهوریتنك پروتستوسیله برابر اورادن توسیع ممالك ایتمك نیتنده بولنیور. هر حالده آرجنتین جمهوریتنك حدود حالیۀ جنوبیه سی (ریونغرو) نك مجراسیله اعتبار اولندیغی حالده، سطحی ٢۰٣٥۰۰۰ مربع كیلومتره، یعنی فرانسه نك تقریباً درت مثل اولوب، پتاغونیا دخی داخل حساب اولورسه، سطحی ٢٩٧۰۰۰۰ مربع كیلومتره اولور. شمال شرقی طرفنده (شاقو)‌ نامیله معروف اولان واسع صحرانك بر قسمی (آرجنتین) ‌ایله پاراغوآی جمهوریتلری آره سنده منازع فیه ایدیسه ده، اخیراً بوایكی جمهوریت بیننده وقوع بولان محاربه اوزرینه، آرجنتین جمهوریتنك ملكی اولمش، وقسم اعظمی آرجنتین وبولیویا ایله براز یلیا آره سنده منازع فیه قالمشدر. حدود غربیه سی اولان آند سلسلۀ جبالنك قار ایله مستور صرتی بحر محیط كبیردن آنجق ١٥۰ كیلومتره اوزاق بو لنمغله، آرجنتین همان ایكی بحر محیطك آره سنده واقع كبیدر. (آند) سلسلۀ سی آمریقانك منتهای جنوبنده بر حدود دیواری كبی طار ایكن، شماله طوغری اوزاندقجه توسع ایده رك، متوازیاً آلتی صره یه قدر تشعب ایدر. اك یوكسكلری اولان اصل (آند) سلسله سی غرب طرفنده اولوب، شیلی یه طوغری صارب اولدیغی حالده، شرق طرفنده كرك آند سلسله سی وكرك اونك شعبه لری مقامنده اولان صره لر بربرندن آلچق اوله رق، وجمله سی برر سطحی ماىٔل تشكیل ایده رك، اتكلری دوز اووه لره قدر اینر. اووه لرك اورته لرنده دخی بوجبالدن آیریلوب‌ دوشمش كبی بعض منفرد طاغلر وقیالر بولنورسه ده، (آند)‌ سلسله سیله شعبه لرینك اتكلرندن آشاغی عمومیت اوزره لاپلاته نك اراضیسی دوم دوز ویا جزىٔی طالغه لیدر، ویالكز شامل غربی جهتی طاغلق اولدیغی كبی، مركزی جمهوریت اولان (بونس آیرس) شهرینك جنوبنده دخی (سیرا وولقان) و (سیرا تاندیل) اسمنده ایكی طاغ واردر. (پتاغونیا) یه طوغری اقوام

وحشیه نك طولاشدقلری اووه لرك ایچنده دخی (سیرا ونتانه) اسمیله بر طاغ بولنیور. آند سلسلۀ جبالنك صرتنده كی بر كانلرك اكثریسی خط حدود اوزرنده بولنیورسه ده، سلسلۀ مذكوره نك اك یوكسك ذروه سی اولان (آقو نقاغوآ) طاغی، كه ٦٨٣٤ متره ارتفاعنده در، آرجنتین جمهوریتنك حدودی داخلنده در. سلسلۀ جبالك آلتنده اووه ابتدا چاقیل طاشلریله مستور اولوب، بعده بو طاشلر طوزلی بر بالچیقله مستور، ودها اوزاقده قوم حالنده بولنیور ایسه ده، ایكی اوچ ساعتلق مسافه دن صكره نه طاش نه قوم كوریلور. آرجنتین جمهوریتنك اووه لری، ودها طوغریسی اووه سی، بر حال وصورتده اولمیوب، تا برازیلیانك اقالیم‌ حاره سندن باشلایه رق، پتاغونیانك اقالیم مخجمده سنده ختام بولان واوچبیك كیلومتره دن زیاده یویی اولان بو واسع اووه نك شمال جهتی بیوك شاقو تسمیه اولنور، كه بونك قسم شمالیسنده بعض آلچق اورمانلرله آره لرنده یوكسك حرما آغاجی كومه لری بولنو، واورالرده (ییلقو مایو) ایله (ورمیو) نهرلری بعض كولر وبطاقلقلر تشكیل ایده رسه ده، قسم جنوبیسی تا (سالادو) نهرینه قدر آنجق بعض دیكنلی چالیلرله‌ وبالچیقلی یرلری پك قیصه‌ براوتله، وبعض طرفلری دخی طوزله مستور اولوب، آنجق كروانله چكیله بیلیر برواسع بیابان حالنده در. مذكور سالادو نهرینك جنوبنده ایسه (پامپه) تعبیر اولنان واسع اووه ممتد اولور، كه بونك اكثر یرلری پك یوكسك اوتلرله مستور كوزل بر پایانسز چایر حالنده اولوب، اوته بریسنده بعض كوللری دخی اولمغله، بوجمهوریتك اساس ثروتی اولان ملیو نلرجه حیواناتك مرعاسیدر. جنوب طرفلرنده پامپه نك برقسمی اوروپادن نقل اولنان دوه دیكنلریله مستور ایسه ده، اهالیسی چوغالدقجه تارله لره تحویل اولنه جغنده شبهه یوقدر. (سان لویی)‌ ایالتنك جنوبنده پامپه اورمانلر وچایرلرله مستوردر. جمهوریتك (پارانا) ایله (اوروغوآی) نهرلری آره سنده واقع اراضیسنه كلنجه، بونی بعض سیاحلر عراقك (الجریره) سنه قیاسله ((آرجنتین مسوپوتا میاسی)) تسمیه ایتمشلردر؛ چونكه هر نه قدر كه بطاقلقلری چوق ایسه ده، اراضیسنك فوق العاده قوهٔ منبته سی، نهرلر واسطه-

سیله طرق اختلاطنك كثرتی ، دكیزه وبیوك تجارتكاه شهرلره اولان قربیتی واورمانلرینك چوقلغی بو قطعه نك ایلریده فوق العاده ترقی ایده جكنه ضامندر. بونس آیرسك شمالنده درین بر كورفزك ایچنه دوكیلن لاپلاته ایرماغی صولرینك قسم اعظمی برازیلیادن، یعنی (پارانا) و (پاراغوآی) نهرلرندن كلوب، واقعا بو ایكی نهر برلشدكدن صكره، آند سلسلۀ جبالندن بر چوق نهرلر دخی اینیورسه ده، بونلر بیوك (شاقو) نك ایچندن چكه رك، پاراغوآیه كلنجه یه قدر پك واسع بیابانلر شق ایتدكلرندن، پیلقومایو، ورمیو وسالادو كبی بیوكلرینك صولرینك كلی قسمی تجز ایدوب، جزىٔی صو دوكرلر، ودیكر بر چوغی دخی یولده بر طاقم كوللر وبطاقلقلرده تجز ایدوب، ایرماغه واصل اوله میورلر. لاپلاته نك منصبندن (قولورادو) نهرینك مجراسنه قدر عرضك بش درجه لك مسافه سنده هیج بر نهر دكیزه قدر واصل اوله میوب، نهایت (قولوررادو) ایله اوكامتوازیاً (ریونغرو) بتون پامپه یی یاره رق، بحر محیط اطلاسی یه دوكیلورلر. لاپلاته نك اغزی مقامنده اولان خلیج نهرك منصبنده ١۰،‌ومدخلنده ٢٥۰ كیلومتره وسعتنده ، وسطحی ٤۰۰۰۰ مربع كیلومتره در. بو خلیجك ایچنده متعدد آقندیلر وآنافورلر بولندیغی كبی، قییلرنده كی قوم سدلری وقیالر مناسبتیله تهلكه لی فرطونه لری دخی اولور. لاپلاته نهری، عدم فیضانی حالنده، ثانیه ده دكیزه ١٤٦۰۰ مكعب متره صو دوكر. آمریقای جنوبینك هر طرفنده اولدیغی كبی، آرجنتین جمهوریتنده دخی یالكز اقیمك مدخلی اولمیوب، هواباشیجه ارتفاعه تابعدر. بو جمهوریتك ممالك وسیعه سی هواجه اوچ قسمه تقسیم اولنه بیلیر. كه برنجیسی سواحل ایكنجیسی ممالكك ایج طرفلری، واوچنجیسی دخی آند سلسلۀ جبالنك اتكلریدر. سواحلده حد وسطی اوله رق سالتیغراد درجۀ حرارتی ١٥ ایله ٢١ آره سنده اولوب، نادراً ٣٥ ە قدر چیقار وصفردن آشاغی اینر: علی الخصوص لاپلاته منصبنك شمالنده صولرك طونمس همان مجهولدر. ایج طرفلرنده یعنی اووه لرده كرك‌ حرارت وكرك برودت دها شدتلی اولور. طاغلرك اوستنده ایسه كونشده پك صیجاق وكولكه ده پك صونوق اولوب، یاغمور دخی پك نادر

یاغدیغندن، هوا ایی دكلدر؛ یالكز جنوب طرفلری بر آز دها رطوبتلی اولمغله جرارت وبرودت بیننده او قدر تخالف بولنماز. اراضینك دوزلكی مناسبتیله روزكارلر پك شدتلیدر؛ اك ایی روزكاری شرق جنوبی طرفندن كلن روزكار اولوب، پامپه لردن كلن روزكار ایی دكلدر. شمالدن كلن روزكار ایسه اورانك سمومی حكمنده در. ملتملر دخی اكسیك دكلدر. شمال غربیدن بشقه طرفلرده یاغمور چوق یاغمورسه ده، یاغمورسز موسملری دخی بعض دفعه پك اوزایوب، قوراقلغی موجب اولور. پایانسز اووه لریله بیابانلرینه، معادنی حاوی اولان طاغلرك سواحلدن پك اوزاق بولنمسبه، (لامه) دنیلن‌ چكی ایله دوه آره سنده بر حیواندن بشقه حیوانات مأنوسه سی بولنمامسنه وساىٔر بویله احوالنه باقیله رق، بو مملكت هیج بر ثروت طبیعیه یه مالك دكلدر، ظن اولنمش ایسه ده، اوروپادن نقل اولنان حیوانات و حبوباتك فوق العاده یتیشمه سندن طولایی، بوكونكی كونده اك زنكین مملكتلردن اولوب، كوندن كونه ثروتی تزاید ایتمكده، واو نسبتده یوللری، یاپیلوب، معدنلری‌ دخی اخراج ونقل اولنمقده، والحاصل هر وجهله اعمار اولنمقده در. آرجنتین جمهوریتنك اهالیسی كرهٔ ارضك اوچ بیوك قطعه سنه منسوب اوله رق، آمریقالی، آوروپالی وآفریقالیدن مركبدرلر؛ آنجق جنسیتلرینی خالص اوله رق محافظه ایدنلر پك آز اولوب، اكثریسی قاریشمش، وبو اختلاطدن ملز برجنس چیقمشدر، كه اهالینك باشلیجه قسمی نونلردن عبارتدر. مملكتك اقوام اصلیۀ قدیمه سندن سواحله قریب بولنمش اولان (شاروآ) و (مینوآنه) قوملری مملكتك فاتحلری اولان اسپانیوللرله قاریشه رق، لسانلرینی دخی غاىٔب ایتمش، وملز اسپانیول حكمنه چكمشلردر؛ بونس آیرس جهتنده ساكن بولنمش اولان (كراندی) قومنك افرادی جنوبه طوغری قاچوب، پتاغونیا چوللرنده یاشامقده درلر؛ پارانا نهرینك كنارلرنده بولنمش اولان (غارانی) اقوامی كذلك اسپانیوللرله قاریشه رق، اولدقجه متمدن بر اهالی حكمنه چكمش، ویالكز (قورینتش) ایالتنده كندی لسانلرینی محافظه ایده بیلمشلردر. جمهوریتك شمال غربی جهتنده بولنوب (كیشوآ) جنسنه منسوب اولان (قالشاكی) وساىٔر قوملرك بر

طاقمی دخی، اسپانیوللرله اولان اختلاطلریله برابر، الآن كندی لسانلریله متكلمدرلر. خالص اوله رق، والآن كوجبه حالنده یاشایان اقوام اصلیه ایسه یالكز (شاقو) صحرای كبیرنده بولنیورلر. (ورمیو) نهرینك اوست طرفلرنده یاشایان (ماتاقو) قومیله بولیویا حدودنده بولنان (شیریغانو) قومنك افرادی ایسه، اوروپالیلرله چوق قاریشما مشلرسه ده، بونلرك چفتكلرنده عمله اولوب، چالیشمقده درلر. بوایكی قوم بر لكده یاشادقلری حالده (شیریغانو) لر اولدقجه مدنیته ناىٔل اولوب، ذكاوت واستعدالریله كوندن كونه ایلریلمكده ورفاهله یاشامقده، و (ماتاقو) لر ایسه حیوان كبی واوست وباشلری غایت پیس بر حالده عمر چكیر مكده درلر. عصر حاضرك ابتدالرینه قدر آفریقادن كمیلر طولوسیله كتیریلن زنجی اسیرلر دخی خالص قالمیوب، یرلیلرله و اسپانیوللرله بر درجه یه قدر قاریشمشلردر، كه بوكونكی كونده لونلری مختلف اولان بو اوچ جنس بر برندن آیرمق ممكن دكلدر. بو اختلاطدن عموم اهالینك رنكی حبشیمس اولمش ایسه ده، بوصوك زمانلرده اوروپادن كیدن مهاجرلرك كثرتی مناسبتیله، علی الخصوص بیوك شهرلرده اهالینك رنكی كیتدكجه آچیلوب، بیاضلنمقده در. زمانمزده اوروپادن كیدن مهاجرلرك اكثریسی ایتالیان اولوب،ایكنجی درجه ده پیرنه طاغلرینك ایكی جهتنده بولنان (باسق) قومی افرادیله بعده اسپانیول، فرانسز، آلمان وانكلیزلر كلیر. بو مهاجرتلرك كثرتیله برابر هوانك دخی مساعده سی جهتیله، آرجنتین جمهوریتنده سنوی بر وفیاته قارشی ایكی تولدات وقوع بولدیغندن، اهالی هر اون بش سنه ده بر تضاعف ایتمكده در. میلادك ١٨٥٧ تاریخنده عموم اهالی ١٢۰۰۰۰ راده لرنده تخمین اولنمقده ایكن، ١٨٧١ ده ایكی ملیونی تجاوز ایتمكده ایدی، وكوندن كونه كلیتله آرتمقده در. اورایه كیدن اوروپالیلر دخی پك آز وقتده بیوك ثروتلره مالك اولیورلر. آرجنتین جمهوریتنك حكومتی بر هیىٔت متفقه دن عبارت اولوب، هر ایالتك كندینه مخصوص قوانین ونظامات داخلیه سی ومجلس مبعوثانی واردر، ومأمورلرینی كندی نصب، وبودجه سنی تعیین ایدر؛ (بونس آیرس) شهرنده كی مركز عمومیده بولنان حكومت مركزیه ایسه یالكز سكه ضرب ایتمك، صلح

و حربه قرار ویرمك، عموم جمهوریتك حدودینی تعیین ایتمك، وبیوك امور نافعه یه قاریشمق حقوقنی محافظه ایتمشدر؛ وهر ایالتك قوانین ونظامات داخلیه سی، مركزده كی مجلس عمومی طرفندن تصدیق اولنمدقجه، مرعی اوله ماز. حكومتك دین رسمیسی قتولیك دینی ایسه ده، ادیان ساىٔره دخی سربستدر. آرجنتین جمهوریتی هر بری بر وجه مشروح كندی كندینه اداره اولنور ١٤ ایالته منقسم اولوب، بونلرك (انتر ریوس) یعنی ((مابین النهرین))‌ ایالتندن ماعداسی مركزلری بولنان شهرلرك اسملریله مسمادر. بو ایالتلردن ماعدا هنوز اداره لری مضبوطیت آلتنه آلنمامش اوچ واسع یر واردر. كه بری (قورینتس) ك شمال شرقیسنده واقع (میسیون) قطعه سی، بری (سانته فه) نك شمالنده بولنان (شاقو) صحراسی، وبری ده جنوبده اقوام اصلیه ایله مسكون اولان (پامپه) اووه لریدر. واقعا (شاقو) نك (پیلقومایو)، (ورمیو) و (غرانلاقو)‌ ناملریله اوچ، و (پامپه) نك دخی نفس (پامپه)، (ریونغرو)، (شوبوت)، (پتاغونیا) ، (لیمای)‌ و (آند) ناملریله آلتی، كه جمعاً بو یرلرك طقوز ایالته تقسیمی تحت قراره آلنمش ایسه ده، الآن اجرا اولنه مامشدر. ذكر اولنان اون درت ایالتك سطحلریله اهالیسی ومركزلرینك نفوسی، ١٨٦٩ تاریخ میلادیسنده اجرا اولنان تحریره كوره، زیرده یازیلوب، نفوسجه اووقتدن بری حاصل اولان تزاید تخمین اولنه بیلیر: ایالت سطحی اهالیسی مركزینك نفوسی مربع كیلومتره بونس آیرس ١٨٨٩٨٩ ٤٩٥١۰٧ ١٧٧٧٨٧ انترریوس ١٣٤٩٩٢ ١٣٤٢٣٥ ٦۰٥۰ قورینتس ١٦١٩٩۰ ١٢٩۰٢٣ ١۰٥٤٦‌ سالته فه ٥٣٩٧٧ ٨٩٢١٨‌ ١۰٣٢٤ قوردوه ١٦١٩٩٩ ٢١۰٥۰٨ ٢٨٣٢٣ سانتیاغو ٩٤٤٩٤ ١٣٢٨٩٨ ٧٧٧٥ توقومان ٤٢٣٨٧ ١۰٨٩۰٤ ١٧٤٣٨ سالته ١٣٤٩٩٢ ٨٨٩٣٣ ١١٨١٦ جوجوی ٨۰٩٩٥ ٤۰٣٦٢ ٣۰٧٢ قتامارقه‌ ٩٤٤٩٤ ٨٩٩٦٢ ٥٧١٨ رىٔویه ٩٤٤٩٤ ٤٨٧٤٦ ٤٤٨٩ سان جوان ٨٩۰٩٥ ٦۰٣١٩ ٨٣٥٣ مندوزه ١٧٥٤٩۰ ٦٥٤١٣ ٨١٢١ سان لویز ٦٣٩٩٧ ٥٣٢٩٤ ٢٧٤٨ جمعاً ١٥٦٢٣٩٧ ١٧٣٦٩٢٢ اراضیٔ غیر مضبوطه ١٤۰۰۰۰۰ ٨۰۰۰۰ ٢٩٦٢٣٩٧ ١٨١٦٩٢٢

آرجنتین اهالیسی فوق العاده ذكاوت طبیعیه یه مالك اولوب، آز وقت تحصیلله خیلی ترقی ایتدكلری تجربه اولنمش ایسه ده، بونلر بعض اسكی اسپانیول اخلاقنی محافظه ایدوب، جدیتدن زیاده كوستریشه میللری اولدیغندن، فنون ومعارف لایقیله ترقی ایده مه مشدر. (آند) سلسلۀ جبالنده معادنك انواعی موجود ایسه ده، الآن یوللر یاپیله مدیغندن، اخراج اولنه مدیغی كبی، زراعت دخی هنوز اخراجاتیله مملكته بر بیوك ثروت كتیره جك درجه یه كلمیوب، مملكتك اصل ثروتی حیواناتدن عبارتدر. میلادك ١٨٧٤ تاریخنده واقع اولان تحریره كوره، آرجنتین جمهوریتنك ٧۰ ملیوندن زیاده اغنامی، ١٥ ملیون صیغیری و ٥ ملیون‌ آتی واردر. باشلیجه اخراجاتی دری،یوك، پاصدیرمه، ایج یاغی وساىٔر حیوانات محصولاتیدر. ١٨٧٢ ده اجرا اولنان تجارت‌ ٥٥۰ ملیون فرانغه بالغ اولوب، بونك ٣١۰ ملیونی ادخالات و ٢٤۰ ملیونی اخراجاتندندر. سنۀ مذكوره ده مملكته توارد ایدن سفاینك عددی، مجموعی ٢١٥۰۰۰۰ طونیلاته لق اولمق اوزره، آلتی بیكدن عبارتدر، كه بونلرك ده بشده دردی بونس آیرس لیماننه یناشمشدر. ١٨٧٤ تاریخنده آرجنتین جمهوریتنده ١٢٤۰ كیلومتره لك دمیر یولی موجود، و ٨۰۰ كیلومتره دخی انشا اولنمقده اولوب، مجموعنك ٧۰۰۰ كیلومتره یه ابلاغی تحت تصورده ایدی. بو خطلرك اك اهمیتلیلری بونس آیرسدن (مندوزه) طریقیله شیلی یه، وقوردوه دن (توقومان) طریقیله بولیویایه قدر ممتد اولانلریدر. تلغر افرینك مجموعی ٥۰۰۰ كیلومتره لكدر. ١٨٧٢ سنه سنده واردات ومصارفی ٩٥۰۰۰۰۰۰ فرانقدن، ودیونی ٣٨۰ ملیون فرانقدن عبارت ایدی. اعتبار مالیسی پك صاغلامدر. ابتدا میلادك ١٥١٥ تاریخنده (جوان دیاز) نام اسپانیول لاپلاته نهرینك منصبنی كشف ایدوب، اسپانیا بیراغنی دیكمش ایسه ده، اهالیٔ اصلیه نك الینه دوشوب قتل اولنمش؛ واسپانیانك خدمتنده بولنان وندیكلی (جوان قابوت) نهرك یوقاریلرینه قدر چیقمغه وبعض قلعه لر انشاسنه موفق اولوب، سكز سنه صكره اسپانیا طرفندن اوراسنی اسكانه مأمور اولان (پدرو مندوزه) بونس آیرس شهرینی

تأسیس ایتمش؛ وبونك خلفلری دخی آمریقالیلرله غوغا ایده رك، تدریجاً ممالك توسیع ایله، بر چوق قصبه لر بنا ایتمشلردر. ابتدا لاپلاته نك اسكان واعمار اولنان یرلرندن بعضیسی (پرو) خدیویتنه وبعضیسی دخی (شارقاس) مركزینه مربوط ایكن، ١٧٧٦ تاریخ میلادیسنده (لاپلاته) خدیویتی تشكیل اولنمش؛ واون طقوزنجی عصر میلادینك ابتدالرینه قدر اوراسی ده، آمریقای جنوبینك ساىٔر اكثر یرلری كبی، اسپانیانك بر ولایتی حكمنده قالمش ایسه ده، او وقت اسپانیانك بوناپارت طرفندن ضبطی بو مملكت اهالیسنه ده، ینه اسپانیانك متبوعیتنی طانیمق شرطیله، بر ادارهْ مختاره اعلان ایتمك فكرینی‌ ویرمش؛ ومؤخراً بو فكر بوسبتون استقلال آرزوسنه مبدل اولمش ایسه ده، اهالی حریت وجمهوریت دنیلن شیلری آكلایه جق وقوللانه جق بر حاله كلمه مش اولدیغندن، بر چوق وقت بر اختلال داىٔمی حالنده بولنوب، بینلرنده مقاتله اكسیك اولمامش؛ وآره صره برازیلیاده كی پورتكیز لیلرله پروده كی اسپانیوللر دخی بونلرك محاربات داخلیه سنه قاریشمش، وفرانسه وانكلتره دخی مداخله ایتمشیدی. اهالینك بر تاقمی بر تك جمهوریت ، وبر طاقمی ممالك متفقه هیىٔتی تشكیل آرزوستنده بولنوب، باشلیجه محاربه بو تباین افكاردن نشأت ایتمشیكن، جماهیر متفقه اصول طرفدارلرینك رىٔیسی اولان (روزاس) غلبه چالینجه، برتك حكومت مستبده تشكیل ایدوب، یكرمی سنه (دیكتاتور) عنوانیله كمال استبدادله ادارهٔ مملكت ایتدكدن صكره، مخالفینی طرفندن مغلوب وفراره مجبور اولمش؛ وبعده (پااغوآی) ایله محاربه یه كیریشوب، یكیدن بر اختلال داخلی چیقدقدن صكره، اك نهایت‌ ١٨٧٤ تاریخنده صلح واستراحت تقرر ایدوب، جماهیر متفقه اصول اوزره، سربست رىٔیس انتخابنه موفق اولمشلردر.