Ahmed Gazi Sultan - احمد غازی سلطان

(غازی سلطان_ خان اول) سلطان محمد خان ثالثك اوغلی اولوب، سلاطین عظام عثمانیه نك اون دردنجیسیدر. مشار الیه حضرتلرینه كلنجه یه قدر سلطنت عمودی اوزره پدردن اوغله قالدیغندن، نسب شریفی اون اوچ بطنده سلطان عثمان غازی یه متهی اولور. ٩٩٨ تاریخنده طوغوب، ١۰١٢ سنه سنده، پدرینك وفاتی اوزرینه، ١٤ یاشنده الدیغی حالده، تخت عثمانی یه جلوس، و ١٤ سنه اجرای سلطنتدن صكره، ١۰٢٥ تاریخنده ارتحال ایتمشدر. اون دردنجی پادشاه اولدیغی حالده، اون درت یاشنده جلوس ایدوب، اون درت سنه سلطنت سورمسی اتفاقات حسنه دندر. زمان سلطنتنده بر طرفدن نمچه ایله و بر طرفدن دخی ایرانله محاربه اولندیغی كبی، پدرینك زمان سلطنتنده آناطولی و عربستانك هر طرفنده ظهور ایتمش اولان جلالی اشقیا-

سبله معن اوغلی وقلندر اوغلی كبی نیچه باغیلرك وجودلری رفع اولنه رق، هر طرفده امنیت و اسایش اعاده اولنمشدر. نمچه ایله آچیلان محاربه مجارستانی آلمانلرك ید ظلمندن قورتارمق مقصدیله خروج ایتمش و مجارلر طرفندن قرال طاننمش اولان (پوچقایی) یه اعانةً وقوعبولوب، مجارستان واردلك، دولت عثمانیه نك تحت حمایه سنده اولمق اوزره، نمچه دن تفریقنه و دولت عثمانیه حقنده غایت نافع شراىٔطله معاهده عقدینه موفقیت حاصل اولمش ایسه ده، معاهده نك عقدی تأخیر اولندیغندن، بعده نمچه حقنده دخی نافع بعض بندلر علاوه سیله امضا اولنمشدر. هر حالده اوسترغون استراد و نیجه قلاع ضبط اولنمشدر. ایران محاربه سنه سبب ایسه شاه عباسك تجاوزاتی اولوب، او طرفه سوق اولنان عسكرك سرداری بولنان قیوجی مراد پاشانك همتیله عساكر عثمانیه غالبیت تامه قزانه رق، ایرانیلرك ضبط ایتمش اولدقلری یرلر مع زیادة استرداد اولنمش، و پك شانلی معاهده لر عقد اولنمش ایسه ده، شاه عباس عهدنده طورمدیغی ایچون، پادشاه مشارالیهك اواخر سلطنتنه دكین بو غاىٔله ایله اوغراشمشدر. بو ایكی بیوك محاربه دن بشقه دها نیجه محاربه لر وقوعبولوب، جمله سنده موفقیت حاصل اولمشدر. افلاق و بغدان دخی استرداد اولنمش؛ و موره نك مانیه طاغلرنده وقره طاغده ظهور ایتمش اولان عصیانلرترحال متصرفی آرسلان پاشا معرفتیله باصدیرلمشدر. مراد رتیسك قومانده سی آلتنده آق دكیزە دوننما چیقاریله رق، مالطه تهدید و طرابلس غربده بعض زوربالر تربیه اولنمش؛ و اعدانك بر قاچ سفاىٔنی آلنمشدر. سلطان احمد اول عاقل و مدبر و غیور بر پادشاه اولوب، شبابتیله برابر امور دولتی بالذات اداره ایدردی؛ و انتخاب و كلا و رجالده فوق العاده اصابتی وار ایدی. دیانت و اعتقادی دخی بر كمال اولوب، حرمین شریفینده نیجه اعماراته موفق اولمش، و روضۀ مطهره یی بر چوق كرانها هد یه لرله تزیین ایتمشدر. پایتختنك اك بیوك و اك كوزل جوامعندن اولان آت میداننده كی سلطان احمد جامع شریفی ایله مر بوطاتی اولان مدرسه و مكتب و عمارت جملۀ مؤسسات خیریه سندندر. طبع همایونی سیر و سیاحنه و آوه دخی ماىٔل اولمغله، ایكی كره ادرنه و كلیبولی وساىٔر روم ایلی طرفلرینه وبر كره دخی بروسه یه قدر كیتمشلردی. ذات پا كی علم و عرفاتله آراسنه اولوب، طبیعت شعریه سی دخی اولمغله، عربی و تركی اشعاری واردر. شعرده (بختی) تخلص ایدرلردی،

و بو مخاص ابجد حسابیله تاریخ جلوسنه دالدر. جامع شریفی جوارنده كی تربۀ مخصوصه سنده مدفوندر.