Etrurie - اتروريا

ایتالیانك بر خطۀ قدیمه سیدر، كه الیوم (طوسقانه) دنیلن خطه ایله روما داىٔره سنك بر قسمندن عبارت اولوب، آپنین سلسلۀ جبالیله (تیرنیا) دكیزی آره سنده واقع، و شمالاً (لیغوریا) ایله، جنوباً دخی (لاتیوم) ایله محدود ایدی. بو قطعه نك اهالیٔ قدیمه سی (اتروسق) و (طوسق) تسمیه اولندقلرندن، مملكتلرینه دخی قدیماً (اتروریا) و بعده (طوسقانه) دنیلمشدر. بو قطعه ده و ولاتره، آریتوم، قلوسیوم، ویس، تاركینیا، و ولسینیا كبی بر چوق بیوك شهرلر وار ایدی، كه هر بری كوچك جمهوریت صورتنده اداره اولنه رق، جمله سی اوچ هیىٔت متفقه تشكیل ایدرلردی، و بو اوچ هیىٔتك بیننده دخی بررابطۀ اتحاد و اتفاق بولنوب، جمله سنك مركز مشتركی (وولسینیا) شهری ایدی. شمال جهتنده زراعت، و وسطه و جنوب جهتلرنده دخی تجارت خیلی نرقی ایتمش اولمغله، اولدقجه مدنی بر یر ایدی. حدودلری رومایه قریب اولدیغندن، اتروریا اهالیسندن بر قاچ كشی روما حكمداری اولمش؛ و دفعاتله رومایی بسبتون ضبط و استیلا ایتمك درجه سنه كلمشلردر. آنجق میلاددن آلتی عصر اول اسكی غاللر‌ هجوم ایله

شمالده كی هیىٔت ضبط ایتدكلری كبی، جنوب هیىٔت متفقه سی دخی (سامنیت) دنیلن ایالیانك دیكر بر قومی طرفندن ضبط اولنمش؛ و وسطده كی هیٔت متفقه ایسه دها خیلی وقت طیانوب، رومالیلره قارشی بر چوق غالبیتلره دخی ناىٔل اولمش ایسه ده، نهایت رومالیلرك ضبطنه كچوب، (طوسقیا) ویا (طوسقانه) نامیله بر ایالت اتخاذ اولنمشدر. _ ١٨۰١ تاریخنده بو اسم بو ناپارت طرفندن تجدید اولنه رق، آوستریادن ضبط اولنان طوسقانه خطه سی (اتروریا) قراللغی نامیله بر قراللق حالنه قونمش؛ و پارمه دوقه سی لویی اتروریا قرالی اولمشیدی. ١٨۰٨ ده بو خطه فرانسه یه الحاق اولنه رق، اوچ ایالته تقسیم اولنمش؛ و بر سنه صكره طوسقانه دوقه لغی نامیله بو ناپارتك همشیره سنه ویرلمشیدی. [(احوال حاضره سیچون ((طوسقانه)) ماده سنه مراجعت بیوریله.]