Ebu Said Efendi - ابو سعيد افندی

دولت علیۀ عثمانیه علماسندن اولوب، سلطان ابراهیم و سلطان محمد رابع زمان سلطنتلرنده اوچ دفعه شیخ الاسلام اولمش، و من حیث المجموع بش سنه سن زیاده بو مقام عالی یی احراز ایتمشدر. شیخ الاسلام‌ محمد اسعد افندینك اوغلی و ینه شیخ الاسلام و ((تاج التواریخ)) صاحبی خواجه سعدالدین افندینك حفیدیدر. ١۰۰٣ سنه سنده استانبولده طوغوب، مملكتمزده تحصیلی معتاد اولان علومی بعدالاكمال، طریقه داخل اولوب، ١۰٣۰ ده شام، ٣٢ ده بروسه مولویتلرینه نصب اولنمش؛ و ٣٤ ده استانبول قاضیسی اولوب، ٣٦ ده ثانیا استانبول قاضیسی اولدقدن صكره، ٣٨ ده آناطولی، و ٣٩ ده روم ایلی قاضیعسكری اولمش؛ و بر خیلی مدت معزول قالدقدن صكره، ١۰٥٣ سنه سی ذی انقعده سنده مقام مشیخت اسلامیه یه ترفیع اولنمشدر. بو دفعه ٢ سنه مسند مشیخنده قالدقدن صكره، ١۰٥٥ تاریخنده عزل اولنه رق، ١۰٦٢ رمضاننده ثانیاً شیخ الاسلام اولمش؛ و بر سنه صكره، بر حركت غیر لایقه سندن طولایی، علمانك غلو و شكایتی اوزرینه عزل اولنوب، ٦٤ سنه سی صفرنده ثالثاً مشیخت اسلامیه مسندینه كتیرلمشدر. ١۰٦٥ سنه سی رجبنده صدراعظم ابشیر پاشانك سؤ حركتیله عصیان ایتمش اولان سپاهیلرله یكیچریلر ابشیر پاشا ایله برابر صاحب ترجمه نك دخی

قوناقلرینی یغما ایتدكدن صكره، اعداملرینی طلبده اصرار ایتدكلرندن، ایكیسنك دخی اعداملرینه فرمان چیقمش ایسه ده، ابشیر پاشا اعدام اولنوب، ابو سعید افندی نقیب الاشراف زیرك زاده نك توسط و شفاعتیله اعدامدن قورتلمش؛ و آرپه لغی اولان كلیبولیده اقامته مأمور اولمشدی. بر آره لق درسعادته عودتنه مساعده اولنوب، بعده ١۰٦٦ سنه سی وقعه سی اوزرینه، ینه كلیبولی یه تبعید اولنمش ایسه ده، متعاقباً عودتنه مساعده اولنمش؛ و ١۰٧٢ سنه سی ذی القعده سنده وفات ایدوب، ایوبده دفن اولنمشدر. بعض اشعار تركیه و عربیه سی واردر. شعرده (سعدی) تخلص ایدیور.