Ebu Süfyan Bin Harb - ابو سفيان بن حرب

(ضحر بن حرب بن امیه بن عبد شمس بن عبد مناف بن قصی) رؤسای قریشدن اولوب، قبل الاسلام تجارتله مشغول ایدی. حضرت رسول الله (صلعم) افندمزه قارشی فوق العاده بغض و خصومتی اولوب، بدر غزاسنه سبیبت ویرن كندیسیدر. قریشك مغلوب اولمسی اوزرینه، ابو سفیان بونك انتقامنی آلمینجه غسل ایتمیه جكنه یمین ایتمكله، هجرت نبویه نك ایكنجی سنه سی بر طاقم عونه ایله مدینۀ منوره یه كیدوب، (عریض) دنیلن محلك خرمالرینی احراق، و معبد انصاری ایله بر آرقداشنی شهید ایتمشیدی. احد غزاسنده دخی ابو سفیانك كلی مدخلی اولوب، شداد بن اسودك معاونتیله صحابه دن (غسیل الملاىٔكه) اسمیله معروف خنطله بن ابی عامری شهیدایتمشدر. بو عناد و خصومت مكۀ مكرمه نك فتحنه دكین دوام ایدوب، مكه نك فتح اولنه جغنی آكلاینجه، تجدید عهد ایچون معسكرمؤمنینه كلوب، ابتدا ازواج مطهرۀ رسول اللهدن بولنان قیزی (ام حبیبه) یه مراجعت ایتمش ایسه ده، مشار الیها توسطی قبول ایتمدیكی كبی، حضرت فخر كاىٔنات دخی اصلا جواب اعطا بیورمامش؛ و ساىٔر اصحاب كرام دخی رد ایله جواب ویروب، یالكز حضرت عمر بن حطاب نزد رسول اللهده توسطنی و عد ایتمش؛ و مشار الیهك تو سطیله حضور رسالتپناهی یه كوتورلدكده، جناب

حقك و حدانیتنی قولای قبول ایتمش ایسه ده، حضرت پیغمبرك رسالتنی تسلیمده تردد كوسترمش؛ و آنجق عم رسول الله حضرت عباسك تهدید و تخویفی اوزرینه شهادت كتیرمشیدی. كندیسی غایتله حریص نام و جاه بر آدم اولدیغندن، حضرت نبیدن بر امتیاز ایستمش؛ و اول حضرت كندیسنك خانه سنه التجا ایدنلرك امین اولملری امتیازیله كندیسنی تبشیر بیورمشیدی. مكه یه عودتنده خلقی اسلام و تسلیمه دعوت ایتمكه باشلاینجه، زوجه سی هند، كه حضرت رسول الله ودین اسلامه قارشی اولان بغض و خصومتیله مشهوره ایدی، قوجه سنك صقالندن طوته رق : ((ای آل غالب بو احمق اختیاری اولدیرك‌ ! )) دیه باغرمغه باشلامشیدی. ابو سفیان مكه نك فتحندن صكره اصحاب صره سنه كچوب، طاىٔف غزاسنده حاضر بولنمش؛ و بو محاربه ده بر كوزی كور اولوب، یكچشم قالمش؛ و حضرت ابا بكرك زمان خلافتنده ١٣ تاریخنده واقع یرموك وقعه سنده اوبر كوزی دخی چیقاریلوب، بسبتون اعمی اولمش ایدی. نهایت حضرت عثمانك زمان خلافتنده ٣١ تاریخنده، ٨٨ یاشنده اولدیغی حالده، وفات ایتمشدر.