Ebu Saud Imadi - ابو السعود عمادی

(احمد افندی بن شیخ محی الدین مصطفی) دولت علیۀ عثمانیه دورنده یتیشن علمانك اك بیوكلرندن اولوب، كمال پاشازاده دن بشقه نظیری كلمه مشدر، دینسه سزادر. عصر سلطان سلیمان و سلطان سلیم ثانیده ٣۰ سنه متمادیاً شیخ الاسلام اولوب، دولت مشارالیهاده بو مقام عالی یی احراز ایدنلرك اون اوچنجیسیدر. پدری عن اصل كردستانده كی عمادیه شهرندن اولوب، كندیسی ٨٩٦ تاریخنده استانبول

جوارنده واقع مدرس قریه سنده طوغمش؛ و ابتدا پدرندن تحصیل ایده رك، استعداد طبیعیٔ فوق العاده سی حسبیله، آز زمانده شهرتی پادشاه زمان سلطان بایزید ثانی حضرتلرینك مسموعی اولمغله، جلب و تلطیف، و یومی ٣۰ اقچه معاش تخصیص اولنمشیدی. بعده اكمال تحصیل مقصدیله دور مدارس ایده رك، نیجه زمان فحول علمادن مؤیدزاده نك درسنه دوام ایله، علوم شرعیه وادبیه ده درجۀ عالیه یه واصل اولدقدن صكره، مشارالیه مؤید زاده یه داماد اولمغله برابر طریقه دخول ایتمشیدی. ٩٢٢ تاریخنده شیخ الاسلام كمال پاشا زاده طرفندن كنغری مدرسلكنه تعیین اولنمش ایسه ده، كیده میوب، بعده اینه كولده واقع اسحاق پاشا ودرسعادتده داود پاشا و محمود پاشا مدرسه لرینه، و ٩٣٢ ده بروسه ده كاىٔن سلطانیه مدرسه سنه، و ٩٣٤ ده مدارس ثمانیه دن برینه نصب اولنه رق، ٩٣٩ ده بروسه، وبر سنه صكره استانبول قاضیسی، و ٩٤٤ تاریخنده روم ایلی قاضیعسكری اولوب، نهایت ٩٥٢ سنه سی شعبانتده مقام مشیخته ترفیع اولنمشدر. اوتوز سنه پیاپی امور فتوایی لایقیله رؤیت و حسن اداره ایتدكدن صكره، ٩٨٢ سنه سی جمادی الاولاسنك بشنجی كونی، ٧٨ یاشنده اولدیغی حالده، ارتحال ایدوب، حضرت ایوب جوارنده بنا ایتمش اولدقلری مكتب ساحه سنده دفن اولنمشدر. فقه و تفسیر وساىٔر علومده ید طولی صاحبی اولدیغی كبی، ادبیات عربیه ده دخی بینظیر اولوب، عربی اشعار و قصاىٔدی دخی واردر. ((ارشاد العقل السلیم الی مزایاالقرآن العظم)) عنوانیله مكمل بر تفسیر شریف یازمشدر. ٩٧٢ تاریخنده سلطان سلیمان حضرتلری بو تفسیر شریفك بیتمش اولان قسمنی ایستیوب، كوردكلرنده، زیاده سیله ممنون اولوب، ٢۰۰ اقچه دن عبارت اولان مخصصاتنی ٥۰۰ اقچه یه، و بر سنه صكره كتاب اكمال اولننجه، ٦۰۰ اقچه یه ابلاغ ایله، كندیلرینی فوق العاده صورتده تلطیف ایتمشلردی. بو اثر جلیلدن بشقه ((فتاوىٔ ابی السعود)) نامیله معورف مشهور فتاویسی، ((كشاف)) ك سورۀ فتحنه حاشیه سی، و ((هدایه)) نك ((كتاب البیوع)) قسمنه حاشیه سی واردر. عربی وفارسی وتركی اشعاری چوق اولوب، اشعار عربیه سنك اك مشهوری ((قصیدۀ میمیه)) سیدر، كه مطلعی شودر :

ابعد سلیمی مطلب و مرام ودون ذراها موقف و مقام