Ebu Eyyüb Ensari - ابو ايوب انصاری

(خالد بن زید خزرجی، رضی الله عنه) صحابۀ كرامدن اولوب، حضرت فخر كاىٔنات (صلعم) افندمز مكۀ مكرمه دن مدینۀ منوره یه هجرتلرنده، بوذات شریفك خانه لرینه نزول، و خانۀ سعادتلریله مسجد شفریف بنا اولنجه یه قدر اوراده بیتوتت بیورمشلردر. حضرت ابو ایوب بدر، احد، خندق وساىٔر غزوات سنیه ده حاضر بولندیغی كبی، حضرت علی معرفتیله وقوع بولان اكثر غزلرده دخی موجود بولنمشیدی. كندیلرندن ١٥۰ حدیث شریف

منقول اولوب، صحابه و تابعیندن بر چوق ذوات نقل وروایت ایتمشلردر. معاویه طرفندن اوغلی یزید قومانده سیله قسطنطینیه اوزرینه عسكر سوق اولندقده، حضرت خالد پیر فانی اولدقلری حالده، تبركاً بر لكده آلنوب، هجرت نبویه نك ٥۰ تاریخنده محاصره آلتنده بولنان قسطنطینیه سورینك خارجنده ارتحال ایتمش؛ و وصیتلری اوزرینه اوراده دفن اولنمشدر. استانبولك ابو الغازی سلطان محمد خان ثانی حضرتلری طرفندن فتحنده، حضرت فاتحك برنجی همتی مركز خلافت اسلامیه اوله جغی من طرف الله مقدر اولان بو شهر شهیری و حود شریفلریله مشرف و متیمن ایدن مهماندار حضرت پیغمبرینك مشهد شریفلرینی بولمق جهتنه منعطف اولمغله، معیت جلادتلرنده بولنان اولیاء اللهدن آق شمس الدین حضرتلری مكاشفه ایله محل مبار كی بولوب، درحال تربۀ شریفه سی بنا اولنمشدر؛ و او وقتدن بری سلاطین عظام عثمانیه طرفندن بو تربۀ شریفه یه فوق لعاده حرمت ورعایت اولنه رق، اوراده قلیج قوشانملری دأب سلطنت حكمنه كچمشدر.