İbni Halkan - ابن خلكان

(ابو العباس شمس الدین احمد بن ابراهیم) كبار علمادن و مشاهیر مورخیندن اولوب، ٦۰٨ تاریخنده اربل شهرنده طوغمشدر. بر مكیلرك نسلندندر. مشاهیر علمای عصرندن تعلم علوم و فنون ایدوب، ام مؤید نیسابوریه نام عالمه دن اجازت آلمشدر. حلب و شام ومصره سیاحت ایدوب، بر چوق مدرسه لرده مدرسلك ایده رك، علم و فضلیله اشتهار ایتدكدن صكره، ٦٥١ تایخنده دمشق قاضی القضاتی اولوب، طقوز سنه كمال عدالتله ایفای امر قضا ایتدكدن صكره، ٦٦۰ تاریخنده عزل اولنه رق، مصره كیتمش؛ و ٦٧٦ تاریخنده ایكنجی دفعه دمشق قاضی القضاتی اولوب، ٦٧١ تاریخنده دمشقده وفات ایتمشدر. بر قاچ تألیفاتی وبر چوق اشعاری وار ایسه ده، اصل بادىٔ شهرتی مشاهیر اسلامك تراجم احوالنه داىٔر ((و فیهات الاعیان وانباء ابناء الزمان)) عنوانیله یازمش اولدیغی كتاب جلیل القدردر، كه ٢ بیوك جلددن مركب اولوب، ٨٦٥ ترجمه یی حاویدر، وتدقیقاتیله و محاكماتنك طوغریلغیله مشهوردر. كتاب مذكوره بر قاچ ذیل یازیلوب، اك مشهوری (محمد بن شاكر كتبی) نك ((فوات الوفیات)) عنوانیله یازمش اولدیغی كتابدر، كه ((و فیات الاعیان)) له برابر ١٢٩٩ تاریخنده مصرك بولاق مطبعه سنده ٣ بیوك جلد ازره طبع ب نشر اولنمشدر. ((و فیات)) ك كندیسی آلمانیاده دخی طبع، و اكثر اوروپا لسانلرینه ترجمه اولنمشدر. لسانمزده ردوسی زاده محمد افندی طرفندن اولنمش بر ترجمه سی وار ایسه ده، بتون اولمیوب، بر چوق ترجمه لر طی بعض شیلر علاوه اولنمشدر. غایت عقده لی بر عباره ایله یازلمش اولان بو ترجمه ١٢٨۰ تاریخنده ٢ كوچك جلد اوزره مطبعۀ عامره ده طبع اولنمشدر. شو قطعه صاحب ترجمه نك جملۀ اشعارندندر : انا والله هالك آیس من سلامتی اواری القامة التی قد اقامت قیامتی