İbrahim Bin Abdürrahman Zehri - ابراهیم بن عبد الرحمن زهری

عشرۀ مبشره دن عبدالرحمن بن عوف حضرتلرینك اوغلی اولوب، پدری واسطه سیله حضرت عمر بن خطابدن احادیث شریفه روایت ایتمشدر. ابراهیم بن منذر بو ذاتك ٧٥ تاریخ هجریسنده وفات ایتدیكنی، و وفاتنده ٧٦ یاشنده اولدیغنی بیان ایتمكله، هجرت نبویه دن بر سنه اول طوغمش اولدیغنی ایما ایدیور. حالبو كه انساب و اسماء صحابه كتابلرینك روایتنه كوره، صاحب ترجمه نك و الده سی ام كلثوم بنت عقبه حضرت پیغمبرك قریش كفاریله مصالحه عقد بیوردقلری زمانه قدر مكه ده قالوب، هجرتك ٧ سنه سنده مدینۀ منوره یه هجرت ایتمش؛ و قریشدن ایكی برادری كلوب، كندیسنی آلمق ایستمشلرسه ده، ((یاایها النبی اذا جأك مؤمنات مهاجرات ...)) آیت كریمه سی نازل اولمغله، فخر كاىٔنات افندمز ام كلثومی تسلیم ایتمه مش، و او وقت ام كلثوم زید بن حارثه یه وارمش؛ و هجرتك ٨ سنه سنده مومی الیه شهید اولمغلهي زبیر بن عوامه واروب، بوندن زینب اسمنده بر قیزی دنیایه كلمش؛ و بعده بوندن بوشانه رق، عبدالرحمن بن عوف حضرتلرینه وارمشیدی. بو تقدیرده، صاحب ترجمه حضرت پیغمبرك زمان سعادتلرنده دنیایه كلمش ایسه، ارتحالندن آز وقت اول كلمش اوله جغنده شبهه قالماز.