İbrahim Bin Abbas Suli - ابراهیم بن عباس صولی

شعرای عربك قدماسندن اولوب، كنیه ابو اسحاقدر. جدی محمدك پدری اولان (صول) برادری فیروزله برابر جرجان رؤسای اتراكندن اولوب، بعده مجوسی اولمشلردی. مؤخراً صول، یزید بن مهلبك جرجانه وصولنده، مشارالیهك تكلیفیله دین اسلامی قبول ایتمي، و عقر محاربه سنده قتل اولننجه یه قدر یاننده بولنمشیدی. صاحب ترجمه ایسه ادیب وكاتب و شاعر بر ذات اولوب، خلفای عباسیه طرفندن بعض بیوك مسانده قدر ترفیع اولنمشیدی. روایته كوره سویلدیكی اشعاردن ابتدا دون كوردیكی بیتلری بعده اوسطلرینی طى ایده رك، چوق دفعه بر مفصل قصیده دن یالكز بر بیت براقیرمش. بو وجهله اشعاری غایت منتخب و مقبولدر. مع هذا ارتجالاً سویلدیكی اشعاری دخی پك سلیسدر. وزرادن محمد بن عبدالملك زیات ابتدا احبا واصدقاسندن ایكن، بعده بینلرنده برودت حاصل اولمغله، صاحب ترجمه نك بونك ذمی حقنده خیلی هجویه لری واردر. خلیفه متوكلك مدحی حقنده دخی بر چوق قصیده لری اولوب، مشارالیهك خیلی احسانلرینه ناىٔل اولمشیدی. وفاتی ٢٤٣ سنه سی شعباننده و (سرمن رأی) ده واقع اولمشدر. جملۀ اشعارندن محبوبه سنك كجیكمسی حقنده سویلمش اولدیغی شو قطعه نك ایرادیله اكتفا اولنور : الم ترنا یومنا اذا نأت فلم تأت من بین اترا بها

وقد غمرتنا دواعی السرور باشغا لها وبالها بها ومدت علینا سماء النعیم وكل المنی تحت اطنا بها و نحن فتور الی ان بدت وبدر الدجی بین اثوابها فلما نأت كیف كنا لها ولما دنت كیف صرنا بها