İbrahim Bin şirgüh - ابراهیم بن شيركوه

طواىٔف ملوكدن حمص صاحبی شیركوه بن محمد بن شیر كوهك اوغلی اولوب، ٦٣٦ تاریخنده، پدرینك وفاتی اوزرینه، مسند امارته كچمش؛ و ٦٣٨ سنه سنده سوریه طرفلرینه تجاوزله اطرافی نهب و غارت ایتمكده اولان خوارزمیلر طاىٔفه سیله محاربه یه طوتیشوب، حلب عسكری دخی كندیسنه معین اولدیغی حالده، بونلری فراتك اوته طرفنه قدر تعقیب، و مغلوب ایده رك، حرانی ضبط ایتمش؛ وموصل صاحبی لؤلؤ دخی بونلره اعانةً خوارزمیلره اوروب، یدلرنده بولنان اسرایی، وازان جمله حلب عسكریله اولان محاربه ده اسیر ایتمش اولدقلری ناصر صلاح الدینك اوغلی ملك معظم تورانشاهی استخلاص، و حلب عسكرینه ارسال ایتمشیدی. بو غالبیتده حلب

عسكری رقه، رها و شروجی، و ابراهیم دخی حابوری ضبط ایتمشیدی. ٦٤۰ تاریخنده خوارزمیلر میافارقین صاحبی مظفر غازی ایله متفق اولدقلری حالده، تعرض ایتمكله، ابراهیم بن شیر كوه ینه حلب عسكریله برابر قارشی طوره رق، غالب كلمش ایسه ده، ٦٤٢ ده خوارزمیلر مصر حكمداری صالح ایوب طرفندن عمیجه سی دمشق صاحبی صالح اسماعیله قارشی د عوت اولنمغله، غزه یی استیلا ایتمش اولدقشرندن، صالح اسماعیل طرفندن دمشق عسكریله ابراهیم بن شیركوه مأمور اوله رق، عكاده كی فرنكلرله دخی، غالبیتلری تقدیرنده مصردن بعض یرلر ویرمك شرطیله، اتفاق ایتدیكی حالده، مغلوب اولمش، و مصر عسكری سوریه نك سواحلیله قدسی ضبط ایتدكدن صكره، صالح اسماعیل ایله ابراهیم بن شیر كوهی دمشقده محاصره ایتمشلر؛ و بعده بعض شراىٔطله چكلمشلردی. ٦٤٤ تاریخنده ابراهیم بن شیركوه مصر صاحبی صالح ایوبله بالاتفاق، خوارزمیلری بسبتون محو و مضحل ایتمكله، بونلرك شرندن اندیشناك بولنان صالح ایوبی زیاده سیله ممنون ایتدیكندن، مصره دعوت اولنمش ایسه ده، متهىٔ عزیمت ایكن، دمشقده وفات ایدوب، جنازه سی حمصه اعاده، و اوراده دفن اولنه رق، اوغلی مظفر الدین موسی جانشینی اولمشدر.