آياموره

Osmanlica ansiklopedi kamus alemde آياموره maddesi. Sayfa:509


Sainte maure - آياموره

ونام دیكری لوقاده یونانك جزایر سبعه سندن اولوب، پروزه بوغازینك خارجنده (آقارنانیا) ایالتنك ساحل غربیسی قارشیسنده واقع، وقورفه ایالتنه تابع اوله رق، بر قضا تشكیل ایدیور. شمال شرقی كوشه سی قره یه پك قریب اولوب، بینلرنده كی بوغاز ١٢۰ متره كنیش و یالكز بر ایكی متره دریندر. جنوب جهتندن اون كیلومتره عرضنده بر بوغازله (ایتاكی) و كفالونیه آطه لرندن آیرلمشدر. آیاماوره آطه سنك شرق طرفنده و آطه ایله قره آره سنده (مغانیسی) و (قالامو) آطه لریله بونلرك اطرافنده بر طاقم جزایر صغیره بولنیور. آطه نك شمال شرقیسنده كی (زوآنه) برونندن جنوب غربیسنده كی (دوقاتو) بروننه قدر اولان طول اعظمی ٣٥، و شرقدن غربه اولان عرض اعظمی ١٣ كیلومتره اولوب، مساحۀ سطحیه سی ٢٨٥ و جزایر صغیرۀ ملحقه سیله برابر ٣٤٤ مربع كیلومتره در. اراضیسی طاغلق اولوب، شمال جهتنده اراضیٔ كلیسه دن (مغانوروس) و (نومالی) اسمنده ایكی طاغ واردر، كه برنجیسنك ١۰٣٦ و ایكنجیسنك ١١٤٣ متره‌ارتفاعی واردر. جنوب و شرق جهتنده كی اراضی ایسه دها دوز اولوب، باغ وزیتونلقلری چوقدر. بو آطه نك منتهای شمال شرقیسنده واقع بر اوزون دیلك اوزرنده قرون وسطاده فرنك بكلرندن بری طرفندن انشا اولنمش اولان (آیا ماوره) قلعه سی

بولنیور، كه بو قلعه مؤخراً وندیكلیلر و عثمانلیلرك اداره سنده ایكن توسیع و تجدید اولنه رق، اسمی بتون آطه یه اطلاق اولنمشدر. عثمانلیلر قره دن یعنی آقارنانیا ساحلندن بو قلعه یه قدر ٢٦۰ كمر اوزرنده بر صویولی وبر كوپری یاپدیرمش اولدقلری حالده، بو جسیم اثر معماری مؤخراً یعنی ١٨٢٥ تاریخ میلادیسنده حركت ارضدن خراب اولمشدر. بو قلعه ایله بونك جنوبدن قارشیسنده بولنان و آطه نك مركزی اولان (آماقسیكی) قصبه سی آره سنده دیكر بر كوپری یاپلمشیدی، كه الیوم خراب حالنده موجوددر. جزیره نك مركزی اولان قصبۀ مذكوره ایسه اسكی قلعه نك جوارنده اولوب، آنجق ٢۰٦٥ اهالی یی حاوی بر قریه در. آطه نك منتهای جنوب غربیسنده واقع (دوقاتو) برونی ٦۰ متره ارتفاعنده اوله رق دكیزك اوزرینه چیقمش دیك بر قیادن عبارت اولمغله، زمان قدیمده اورادن اعدامله محكوم مجرمینی دكیزه آتارلردی؛ وبدبخت عاشقلر كندیلرینی اورادن آتوب، تلف اولورلردی؛ وقورتلدقلری حالده درد عشقدن ایی اولمق اعتقادی مشهور ایدی. ملحقاتیله برابر اهالیسی ۰٨٥ ٢٣ كشیدن عبارتدر. بو آطه ١٤٧٩ تاریخ میلادیسنده سلطان محمد ثانی حضرتلری طرفندن وندیكلیلردن ضبط اولنه رق، ١٦٨٤ ده وندیكلیلر طرفندن استرداد اولنمش؛ و اوندن صكره جزایر سبعه یی تشكیل ایدن ساىٔر آطه لرله برابر فرانسه نك الینه كچوب، بعده دولت عثمانیه ایله روسیه طرفندن ضبط اولنه رق، بو ایكی دولتك حمایه سی آلتنده بر جمهوریت حالنه قونمش؛ ومؤخراً انكلیزك الینه كچوب، نهایت ١٨٦٣ ده یونانه ترك اولنمشدر.

Kamusul Alamde Sainte maure maddesi, آياموره osmanlica tarih ve cografya ansiklopedisi Sainte maure nedir anlami. hakkinda bilgi



4 11 18 25 32 39 46 53 60 67 74 81 88 95 102 109 116 123 130 137 144 151 158 165 172 179 186 193 200 207 214 221 228 235 242 249 256 263 270 277 284