Anvers - آنور

بلچیقه نك اك بیوك شهرلرندن ایالت مركزی بر شهر اولوب، (اسقو) ایرماغنك ساحل یمیننده، ساحل بحرك ٨٥ كیلومتره شرقنده وبروكسلك ٤٤ كیلومتره شمالنده، ً١٥ َ١٣ ْ٥١ عرض شمالی ایله ً٥٥ َ٨ ْ٢ طول شرقیده واقعدر. شهرك طولی نهر بوینجه ٢ و عرضی ١ كیلومتره اولوب، ٤٩٨ ٢۰٤ اهالیسی واردر. كوزل بر شهر اولوب، ابنیه سی مزین و باشلیجه سوقاقلری كنیش و منتظمدر. اك مشهور ابنیه سی كلیسالریله بلدیه داىٔره سی، قراله مخصوص بر سرایی، تیاتروسی و موزه خانه سیدر. كلیسالرینك اك بیوكی اولان (نوتر دام) ك بر قله سی ١٢٣ متره یوكسكدر، و اوكنده كنیش بر میدان بولنوب، اورته سنده رسام مشهور (رونبس) ك جسیم بر هیكلی مركوزدر. آنو-

رك عسكریجه براً و بحراً بیوك اهمیتی اولدیغی كبی، تجارت و صنایعجه دخی اهمیتی پك بیوكدر. بلچیقه نك اك مستحكم محلی اولوب، اطرافنده متعدد و مكمل استحكاماتی و ایستنلدیكی وقت نهردن درحال صو ایله طولدیریله بیلیر بر خندغی بولندیغی كبی، سفاىٔن حربیه و تجاریه یه مخصوص اكثریسی بیوك بو ناپارت طرفندن یاپلمش متعدد حوض و لیمانلری دخی واردر. (اسقو) ایرماغنك شهرك اوكنده ٤٥۰ قدر عرضی و جذر حالنده ٧ ایله ١٥ متره آره سنده عمقی اولوب، سنوی اون بیك قدر كمی آمدشد ایدرلر. صنایعی پك ایلری اولوب، ذی قیمت طاشلر یونتمه سیله قیومجیلق اسكیدن بری بو شهرده زیاده سیله ترقی ایتمش اولدیغی كبی، ایپك قماشلریله دانتله لری دخی پك مشهور، و شكر، صابون، انواع مسكرات، خالی، چوخه، فانله، باصمه، تول وساىٔره فابریقه لری و دباغخانه لری پك چوقدر. حوضلرنده خیلی كمیلر و واپورلر انشا اولنور، و بوفابریقه لرك جمله سنده نیجه بیك عمله ایشلر. بری فنونه و دیكری صنایع نفیسه یه مخصوص ایكی آقادمیاسی، بر بحریه و بر جراح مكتبی وساىٔر متعدد مكتبلریله مؤسسات خیریه سی واردر.