Achanti ~ آشانتي
Kamus-ul'Alam - Achanti ~ آشانتي maddesi. Sayfa: 206 - Sira: 10
Achanti - آشانتي
آفریقای غربیده (كینه) نك جنوبه متوجه اولان (آلتون ساحل) ك ایج طرفلرنده بر قوم وبر مملكت اولوب، اكثر طرفلری (فانتی) مملكتیله ساحلدن آیرلمشدر؛ چونكه هر نه قدر كه (فانتی) مملكتی دخی آشانتیدن معدود ایسه ده، بونی آشانتیلره قارشی انكلتره دولتی تحت حمایه سنه آلمشدر. بو مملكتك ایج طرفلری همان مجهول ایسه ده، شرقدن غربه (وولته) نهرندن (آسینی) نهرینه قدر، یعنی طول غربینك ٢ ایله ٦ درجه لری آره سنده ممتد اولدیغی متفق علیه، وشمالاً یعنی سودان طرفندن ایسه حدودی غیر معیندر. مركزی اولان (قوماسی) شهری، بعض سیاحلرك روایتنه كوره، ً٥۰ َ٣٤ ْ٦ عرض شمالی ایله ْ٤
ً٢۰ َ٣١ طول غربیده، وساحلك اك قریب محلندن تقریباً ١٨۰ كیلومتره لك مسافه ده واقعدر. معلوم اولان طرفلری اورمانلق، صولی، منبت وكوزل یرلر اولوب، خدایی نابت بر چوق محصولاتلری اولدیغی كبی، ممالك حاره یه مخصوص هر نوع محصولاته دخی استعدادلری واردر. ایكی حدودنده بولنان مذكور (وولته) ایله (آسینی) دن بشقه (یرا) واونك تابعی اولان (داه) نهرلریله منصبنده پورتكیزلیلر طرفندن (آنقوبره) تسمیه اولنان (تندا) كبی بیوك وبر چوق ده كوچك نهرلری واردر. مركزی اولان (قوماسی) سودانك اك بیوك شهرلرندن اولوب، اون بش یكرمی بیك اهالی یی جامع بر تجارتكاه اولدیعی كبی، ایكنجی درجه ده برچوق قصبه لری ده واردر. اصل (آشانتی) دنیلن ملت حاكمه یقین وقتلرده سودانك ایچندن كلوب مملكتی ضبط ایتمش جنكاور بر قومدر، كه رىٔیسلری حكمدار اولمش، وآزقداشلرینك اخفادی دخی بر نوع نخایت وزادكانلق امتیازنی محافظه ایتمشلردر. حكمدارك ارادتی بونلرك وعسكر ضابطلرینك رأیی انضمامیله مشروطدر. دین اسلام سودانك ایچندن كلوب، آشانتی مملكتنه داخل اولمش وكوندن كونه ترقی ایتمكده بولنمش ایسه ده، اهالینك بعض اعتقادات غربیۀ قدیمه لرینی الآن امحا ایده مه مشدر. مع هذا بو عادات مكروهه نك ازاله سنه جهد ایدر بعض منلالری ده واردر. آشانتی اهالیسی بر ملیون قدر تخمین اولنوب، سلاح طاشیه بیله جك ارككلرینك جمله سی عسكر صایلدیغندن، ایكیوز بیك قدر عسكر چیقاره بیلیرلر، وجنكاور آدملر اولدقلرندن، ساحلده بعض مستعمراتی بولنان انكلتره یی دفعاتله اشغال ایتمشلردر. _ بو مملكت حقنده بر قاچ سیاحتنامه یازلمش ایسه ده، اك اییسی انكلتره طرفندن (قوماسی) یه كوندرلمش اولان بر هیٔت سفارتك رىٔیسی موسیو (بوودیج) طرفندن یازیلان سیاحتنامه در، كه فرانسز جه یه ده ترجمه اولنمشدر.
Kamusul Alam, Şemseddin Sami; Kamusul Alamde Achanti maddesi. osmanlıcada Achanti ne demek, Achanti anlamı manası, Achanti osmanlıca nasıl yazılır. Osmanlıca sözlükte Achanti hakkında bilgi. Arapça Achanti ne demek. Arapça osmanlıca sözlük. Farsçada Achanti anlamı
Kamusul Alamde - آشانتي Achanti maddesi. Şemseddin Sami, Kamusul Alam Ansiklopedisi