Arno ~ آرنو
Kamus-ul'Alam - Arno ~ آرنو maddesi. Sayfa: 156 - Sira: 5
Arno - آرنو
ایتالیانك طوسقانه مملكتنده جریان ایدر بر نهریدر، كه صوینك كثرتنجه ایتالیا انهارینك دردنجیسی اولوب، (فالترونه) طاغنك ١٣٥٦ متره ارتفاعی اولان بر محلندن نبعانله، ابتدا (قاسنتینو) وادیسی اورته سندن جنوبه طوغری آقه رق، بعده غربه طوغری دونوب، (آرچو) اووه سنك ایچندن چكر، صكره غرب شمالی وشماله طوغری دونوب، (پونتسیاوه) چاینی دخی صاغدن اخذ ایله، غربه طوغری دونه رك، فلورانسه نك ایچندن چكدكدن صكره، (غولفولینه) بوغازندن مرورله، بر چوق چایلرك صولرینی دخی اخذ ایده رك، (پیزه) اووه سنه دوشر، و (پیزه) شهرینك دخی ایچندن چكه رك، جنوه كورفزینه دوكیلور. پیزه شهری رومالیلرك زماننده دكیزدن آنجق ٣ كیلومتره اوزاق بولنمش ایكن، بونهرك دوكدیكی چامور و قومدن
ساحلك اوزانمسیله، شمدیكی حالده دكیزدن مسافه سی ١۰ كیلومتره دن زیاده در. (آرنو) نك وادیسی ٢٢۰ كیلومتره قدر اولوب، (كانه) قنالی ونهری واسطه سیله رومادن چكن تیبر نهریله اختلاطی اولدیغی كبی، (پیزه) دن (لیورنو) یه قدر دخی بر قنال آچلمشدر.
Kamusul Alam, Şemseddin Sami; Kamusul Alamde Arno maddesi. osmanlıcada Arno ne demek, Arno anlamı manası, Arno osmanlıca nasıl yazılır. Osmanlıca sözlükte Arno hakkında bilgi. Arapça Arno ne demek. Arapça osmanlıca sözlük. Farsçada Arno anlamı
Kamusul Alamde - آرنو Arno maddesi. Şemseddin Sami, Kamusul Alam Ansiklopedisi