Arnaud - آرناؤد

[((آرنود)) ماده سنه مراجعت بیوریله.]

(پیندوس)، (غراموس) و (شار) سلسلۀ جبالیله محدود كوستریلیور یسه ده، غراموس وشارك شرق طرفنده قالان كسریه، مناستر، پرلپه، قالقاندلق، اسكوب، پرشتنه وحتی اخیراً صربیه یه ترك اولنان (ایورانیه)، (لسقواچ) و (قورشونلی) طرفلری دخی خالص آرناؤدلق اولدیغندن، حدود مذكوره یه صحیح نظریله باقیله ماز. آرناؤدلغك جنوب طرفی طار اولوب، پروزه برونندن باشلایه رق، شماله طوغری چیقلدقجه توسع ایتدیكندن، اك شمالنده یعنی اولكوندن بلغارستان حدودینه قدر اولان اكی همان بویی قدر واردر، كه بو وجهله بو قطعه غیر منتظم بر مثلث شكلی آلوب، رأسی جنوبنده واساسی شمالده در. بو قطعه هیج بر وقت آیریجه برادارهٔ واحده آلتنده بولنمدیغندن، حدودینك تعیینیچون، اهالیسنك لسانندن بشقه بر شیىٔه رعایت اولنمامق اقتضا ایدر؛ چو نكه تاریخه رعایت ایتمك لازم كلسه، هیج اولماز ایسه، ماكدونیانك تمامیله آرناؤدلق عد اولنمسی ایجاب ایده جكدر. ْ ٣٩ ایله ْ٤٣ عرض شمال و ْ١٧ ایله ْ٢۰ طول شرقی آره سنده واقع اولوب، اك اوزون بویی بش درجه یعنی ١٢٥۰ ، واك كنیش اكی دخی، ١۰۰۰ كیلومتره اولوب، بتون سطحی تقریباً ٦٢٥۰۰۰ مربع كیلومتره در. بو قطعه غرباً آدریاتیق‌دكیزیله، غرب جنوبی طرفندن تارنته بوغازی ویونان دكیزیله، جنوباً نارده كورفزیله، جنوب شرقی طرفندن یونان حدودیله وتسالیا ایله، شرقاً اصل روم ایلی یعنی ماكدونیا وبلغارستانله، شمالاً دخی صریبه، بو سنه وقره طاغ حدودیله محدود ومحاطدر. آرناؤدلق عمومیت اوزره طاغلق ومرتفع بریر اولوب، یالكز آدریاتیق سواحل بوینجه بربرندن بررطاغله آیرلمش بر صره اووه لر واردر، كه بونلرك اك بیوكی آولونیه دن باشلایه رق، تا(قوایه) یه قدر تخمیناً ٢٤۰ كیلومتره لك ساحلده اوزانان واكی دخی ١٥۰ كیلوتره دن آشاغی اولمیان (موزاكه) و (قره طوپراق) اووه سیدر. بواووه آلچق یپه لری دخی حاوی اولوب، غایت منبت ایسه ده، ایچنده آقان نهرلر قیشین طغیان ایدوب، اكثر طرفلرینی كول وبطاقلق حالنه قودقلرندن، واهالیسی ده پك آز اولدیغندن، اكثر طرفلری خالی وغیر معموردر. دراچك شمالنده دخی واسعجه بر اووه بولندیغی كبی، تیرانه شهرندن دكیز