آرله

Osmanlica ansiklopedi kamus alemde آرله maddesi. Sayfa:138


Arles - آرله

فراسه نك اقطار جنوبیه سندن (پرووانسه) قطعه سنك ((رون آغزی)) ایالتنده قضا مركزی‌ بر شهردر، كه (رون) ایرماغنك ایكی ساحلنده وقسم اعظمی ساحل یسارنده وایرماغنك ایكی یه چتاللاندیغی محل قربنده واقع اولوب، نهرك منصبندن ٢٨ كیلومتره یوقاری، ومارسلیانك ٨٦ كیلومتره شمالی غربیسنده در. ٢٧٣۰۰ اهالیسی، تجارت محكمه سی، علم المیاه تدریسنه مخصوص برمكتبی، تاریخ طبیعی یه مخصوص نمونه خانه سی، موزه خانه سی، بر كتبخانه سی وپك ایشلك تجارتی واردر. مارسلیادن پارسه كیدن دمیر یولی خطی اوزرنده بولندیغندن بشقه رون نهری واسطه سیله دخی سنوی، ٥۰ دن ٤٥۰ طونیلاته لغه قدر اولمق اوزره، ایكی بیكدن زیاده سفاىٔن (آرله) یه یناشیر. اطرفنده كی واسع اووه لرده ٣۰۰۰۰۰ قویون وپك چوق صیغیرلرله آتلر اوتلار. حبوبات، زیتین یاغ، شراب وساىٔره محصولاتی وچینی وشیشه یه متعلق اخراجاتی چوقدر. بو شهر رومالیلر زماننده مشهور قیصر طرفندن تأسیس ورومادن كوندریلن‌ مهاجرلرله اسكان اولنمشیدی. بعده ایمپراطور قسطنطین بونی دها چوق زیاده توسیع وتزیین ایده رك، قسطنطینیه تسمیه ایتمشیدیسه ده، ایمپراطورك وفاتندن صكره بو اسمی اونودیلوب، ینه (آرله) تسمیه اولنمشدر. اوزمانلرده بو شهرك فوق العاده اهمیتی اولوب، بر آره لق اسپانیا وانكلتره یی دخی شامل اولان غال مملكتنك مركزی عمومیسی اتخاذ اولنمش؛ ومیلادك طقوزنجی عصری اواسطنده تشكل ایدوب، اون برنجی عصر اواىٔلنه قدر دوام ایدن (پرووانسه) دولتنك دخی پایتختی اولمشیدی. اندلسی فتح ایتمش اولان غزات مسلمین بو شهری دفعاتله محاصره، وبر ایكی دفعه فتح ایتمش اولدقلری كبی، شمالدن هجوم ایتمش اولان اقوام وحشیه طرفندن دفعاتله تخریب ایدلمش اولدیغندن، قسطنطینك ركزوبنا ایتمش اولدیغی آثار وابنیۀ مزینه خراب اولمش؛ وبو شهر قرون وسطاده خرستیانلغك اك بیوك مركزلرندن بولنمغله، فوق العاده نفوذه مالك اولان پسقپوسلریله حاكم ویا والیلری بیننده داىْمی اولان خصومته بنا ءً اكثر آثار عتیقه سنك انقاضی

بونلرك بر برینه قارشی یاپدقلری استحكامات دیوارلرینك بناسنه یارامشدی. بنا ءً علیه شمدیكی حالنده سوقاقلری طار وشانسز بر شهر اولوب، آثار عتیقه سندن پك آز شیلر یعنی بر قاچ ویرانه كورلمكده در. بو شهر صكره لری بعض امتیاز اتله وبر نوع استقلاللۀ اداره اولنمش؛ وبر چوق وقت آق دكیز تجارتنده مارسلیا، وندیك وپیزه یه ادعای رقابت ایده بیلمش ایسه ده، نهایت میلادك ١٤٨١ تاریخنده بسبتون فرانسه یه التحاق ایتمش، وبر قضا مركزلكنه قدر ایتمشدر. ((تش اوزرنده كی آرله)) نامیله فرانسه ((شرقی آلب)) ایالتنده دخی ناحیه مركزی بر كوچك قصبه واردر، كه (قانیغو) طاغنك جنوبی اتكنده واقع اولوب، ٢٥٤۰ اهالیسی واردر.

Kamusul Alamde Arles maddesi, آرله osmanlica tarih ve cografya ansiklopedisi Arles nedir anlami. hakkinda bilgi



6 13 20 27 34 41 48 55 62 69 76 83 90 97 104 111 118 125 132 139 146 153 160 167 174 181 188 195 202 209 216 223 230 237 244 251 258 265 272 279 286