Ebul Mutarraf Mahzumi - ابو المطرف مخزومی

(احمد بن‌ عبدالله) اندلس مشاهیر علماسندن اولوب، حدیث و فقه‌ و ادبیاتده ید طولی صاحبی ایدی. نظم و نثری غایت كوزل اولوب، فصاحت لسان و قوۀ ناطقه سی دخی بر كمال اولمغله، و عظده كسب اشتهار ایده رك، غربك ابن جوزیسی حكمنه كچمشیدی. بلنسیه ده تولد و نشأت ایدوب، بعده رشید بن عبدالمؤمنك معیتنده مراكشه عزیمتله، بر مدت مشارالیهك كتابتنده و بعض قضالرده بولندقدن صكره، افریقیه یه عزیمتله، اوراده زهاد و صالحین زمره سیله عقد الفت ایتمش، و بعده بعض قضالره تعیین اولنه رق، نهایت حفصدن مستنصر باللهك مقربی اولمشیدی. ٦٥٨ تاریخنده وفات ایتمشدر. زماننك ملوكندن بعضیسنه خطاباً بر طاقم رساىٔلی ایله اشعار راىٔقه سی و خیلی مصنفاتی واردر. فخر رازینك ((كتاب المعالم)) عنوانلی اثرینه و كمال الدین انصارینك ((كتاب النبیان)) عنوانلی تألیفنه برر ردیه یازمش، و بعض كتب تاریخیه وساىٔره یی اختصار ایتمشدر.