İbni Makle - ابن مقله

(ابو علی محمد بن علی) مشاهیر خطاطیندن اولوب، خط عربی یی كوفیدن نسخه تحویل ایدن بو ذاتدر. حسن خطده ضرب مثل حكمنه كچمش اولدیغی كبی، شعر و ادبیاتده دخی ید طولی صاحبی ایدی. ٢٧٢ تاریخنده بغدادده طوغوب، ابتدا فارسك بعض طرفلرنده مأمور بولنمش؛ و ٣١٦ تاریخنده خلیفه مقتدر باللهك وزیری اولمشیكن، ٣١٨ ده عزل ومالی مصادره اولنه رق، فارسه نفی اولنمشیدی. قاهر باللهك زماننده یكیدن وزیر اولوب، خیلی وقت وزارت ایتدكدن صكره، خلیفه یه قارشی خروج ایدن علی بن بلیق ایله مخاره سی اولمغله اتهام اولنه رق، راضی باللهك جلوسنه دكین اختفا ایتمش؛ و بونك زماننده ٣٢٢ تاریخنده ثالثاً وزیر اولمش ایسه ده، خلیفه نك امورینه ناظر بولنان مطفر بن یاقوب ایله چكینمدیكندن، بو-

نك تزویرله عزل اولنه رق، خلفی عبدالرحمن بن عیسانك الینه تسلیم اولنمش؛ و بونك الندن بر چوق اشكنجه لر كوره رك حبس اولنمش؛ و آنجق یازمش اولدیغی بعض یازیلرك فروختندن آلدیغی كلیتلی مبالغی ویره رك كندینی قورتاره بیلمشیدی. بعده خلافته مستولی اولوب، امیرالامرا عنوانیله امور دولتی الینه آلمش اولان ابو بكر محمد بن راىٔق صاحب ترجمه نك و اوغلنك املاك و عقارینی ضبط ایتمكله، ابن مقله تخلیصیچون بر چوق تضرع و تذللدن صكره، مرقوم ابن راىٔقك اخذ وتوقیفیله كندیسنك وزارته تعیینی تقدیرنده اوچیوز ملیون دینار قزاندیره بیله جكنه داىٔر خلیفه ایله مكاتبه یه كیریشمكله، خلیفه كندیسنی سراینه جلب ایتدكدن صكره، بر اوطه یه حبس ایده رك، النده بولنان مكتوبلریله برابر ابن راىٔقك یدینه تسلیم ایتمكله، حبس اولنه رق، ابن راىٔقك امریله صاغ الی قطع اولنمش؛ و بونك اوزرینه ایتدیكنه نادم اولان خلیفه طرفندن تخلیص اولنه رق، اوینه چكیلوب، صول الیله یازمغه آلیشمشیدی. بعده ابن راىٔقك طرفداری اولان یحكم تركی بغداده دخولنده، كندیسنی یكیدن حبس، و دیلنی دخی قطع ایتدیرمشیدی. نهایت فقر و ضرورته دوچار اولوب، یاره لری دخی یكیدن آچلمش اولدیغی حالده، ٢٧٢ تاریخنده بغدادده وفات ایتمشدر. ابن راىٔقك علیهنده اولوب بو مصاىٔبنی موجب اولان مكتوبلر كندیسی طرفندن یازلمیوب، بر جاریه سنه تعشق ایتمش، و اونك وسطه سیله یازیلرینی آلوب تقلیده آلیشمش اولان بر یهودی طرفندن یازلمش ساخته مكتوبلر اولدیغی، و حتی بو حقیقت خلیفه نك معلومی اولنجه، یهودی ایله جاریه نك قتلنه امر ویردیكی دخی مرویدر. احوال اخیره سنی مصور اولان شو قطعه جملۀ اشعار راىٔقه سندندر : تخالف الناس والزمان فحیث كان الزمان كانوا یا ایها المعرضون عنی عودوا فقد عاود الزمان _‌ بونك برادری (ابو عبدالله حسن بن علی بن مقله) دخی مشاهیر ادبا و خطاطیندن اولوب، ٢٦٨ تاریخنده طوغمش، و ٣٣٨ ده وفات ایتمشدر. خط عربی یی كوفیدن نسخه تحویل ایدن بو اولدیغی دخی مروی ایسه ده، برادری اولدیغنه داىٔر اولان روایت دها قویدر. _ اوغلی (ابو الحسن بن مقله) ایچون

دخی [((ابو الحسن بن مقله)) ماده سنه مراجعت.]