İbrahim Derbendi - ابراهيم دربندى

(شیخ _ ) شروان ملوكندن اولوب، روایته كوره كندیسی نوشروان نسلندن اولدیغی حالده، شروان قریه لرندن بر قریه ده زراعتله مشغول ایكن، اهل شروان بر رىٔیسه محتاج اولنجه، بونی رىٔیس اتخاذ ایتمكله قرار ویرمشلر؛ و كندیسی كویده خرمننك یاننده باتوب اویومقده ایكن، او ستنه سلطنت اوتاغنی قورمشلر؛ و اویاننجه جمله سی بیعت ایدوب، تخته اوتورتمشلر. صاحب ترجمه توسیع ملك و اجرای عدالت ایتمكله باشلامش. او صره ده تیمورلنك او جهتلری تخویف ایتمكه باشلامغله، شروانلیلر مقاومت ایتمك ایستمشلرسه ده، شیخ ابراهیم اویله بر جهانكیره مقاومت كار عاقل اولمدیغنی آكلایه رق، درحال تیمور نامنه خطبه اوقوتمش، و سكه ضرب ایتمش، و هدایا ایله او كنه چیقه رق، موقعنی و شروانی تخریبدن قورتارمشدر. ٨٢١ تاریخنده وفات ایدوب، اوغلی خلیل یرینه كچمشدر.