Andronic - آندرونيق

قسطنطینیه روم ایمپراطورلرندن درت كشینك اسمیدر : برنجیسی (قومنینوس) مخلصیله معروف اولوب، (آلكسیس) ك تورونی ایدی. میلادك ١١١۰ تاریخنده طوغوب، (مانوىٔل قومنینوس) ك وفاتنده ١١٨۰ تاریخنده بو حكمدارك اوغلی ایكنجی آلكسیسك و صیسی اولمش؛ و اوچ سنه صكره صبىْ مرقومی احناق ایده رك، كندیسی تخته اوتورمش ایسه ده، انواع مظالمله لكه دار اولان قیصه بر سلطنتدن صكره، (ایساق آنكلو) طرفندن اسقاط، و ١١٨٥ ده اهالی طرفندن صلب اولنمشدر. (قومنینوس) مخلصیله قسطنطینیه ده حكم سورمش ایمپراطورلرك اخیریدر. ایكنجیسی (پالىٔو لغوس) مخلصیله و ((اختیار)) لقبیله معروف اولوب، میلادك ١٢٥٨ تاریخنده طوغمش، و ١٢٨٢ ده تخته چیقمشدر. مدت سلطنتی عثمانلیلر طرفندن دوچار اولدیغی مغلوبیتلرله چكوب، لاجل المصالحه ویرمكه مجبور اولدیغی تضمیناتك تحصیلیچون تبعه سنی آغر ویركیلرله ازمش؛ وزماننده تجارت وثروت عمومیه تدنی ایدوب، روم ایله لاتین مذهبلرینك اتحادینه ده مانع اولمشیدی. ١٣٢٨ ده تورونی اوچنجی آندرونیق طرفندن اسقاط اولنه رق، درت سنه صكره بر مناسترده وفات ایتمشدر. اوچنجیسی ینه (پالىٔو لغوس) مخلصیله و ((كنج)) لقبیله معروف اولوب، ایكنجی آندرونیقك تورونی

و كنج یاشنده وفات ایدن (میخال پاىٔىٔولغوس) ك اوغلی ایدی. ١٣٢٥ تاریخ میلادیسندن اعتباراً بیوك پدریله مشتركاً سلطنت سورمكده ایكن، ١٣٢٨ ده اختیاری سراینده محبوس حالنده طوتوب، یالكز حكم سورمكه باشلامش؛ و اپیری (یعنی طوسقه لق جهتنی) دخی ممالكنه ضم ایده رك، عثمانلیلردن استرداد ممالكه قالقیشمش ایسه ده، موفق اوله مامش؛ و آنجق ویركیلری تنزیل ایتدیكیچون، تبعه سنك محبتنی قزانوب، ١٣٣٢ ده وفات ایتمشدر. دردنجیسی ینه پالىٔولغوس مخلصیله معروف اولوب، بشنجی (یوآن) ك بیوك اوغلی ایدی. ١٣٥٥ تاریخ میلادیسنده حكمدارلغه تشریك اولنمشیدیسه ده، مؤخراً پدرینی اسقاط ایتمك تشبثنده بولندیغیچون، ١٣٧٢ ده مجازاةً كوزلری چیقارلمش، و سلطنت حقوقنی برادری امانوىٔله ترك ایتمكه اجبار ایدلمشیدی. مع هذا بر آره لق جنویزلرك امدادیله تختی اله چكیروب، ١٣٧٧ ده ایمپراطور اولمش ایسه ده، متعاقباً اسقاط اولنه رق، بقیۀ عمرینی منفاده كچیرمشدر.