Alabama - آلابامه

آمریقای شمالیده ممالك مجتمعه یی تركیب ایدن جمهوریتلرك بری اولوب، هیىٔت مجتمعه یه قبولی صره سنجه ٢٢ نجی، واهالیسنك كثرتنجه شمدیكی حالده ١٢ نجی جمهوریتدر. ایچندن جریان ایدن نهرك اسمیله تسمیه او-

لنه رق، شمالاً صاغ وصولنده بولنان جمهوریتلرله برابر ْ٣٥ عرض شمالی خط موهومیله، شرقاً (كورجستان) وغرباً میسیسیپی جمهوریتلریله، جنوباً دخی قسم اعظمی فلوریده جمهوریتیله محدود اولوب، یالكز جنوب غربی طرفنده همنامی اولان نهرك منصبی اطرافنده مكسیقه كورفزنده بر آز ساحلی واردر. غیر منتظم بر مستطیل شكلنده اولوب، مساحۀ سطحیه سی ٣٢٢ ١٣٥ مربع كیلومتره، واهالیسی ٥۰٥ ١٢٦٢ كشیدر. (آلغانی) سلسلۀ جبالنك بر شعبه سی شمال شرقیدن آلابامه یه كیروب، غربه طوغری اوزاندقجه آلچاقلانه رق، دوز اووه لره منتهی اولور. وسط طرفلرینك دخی غرب جهتنده بر طاقم تپه لر بولنوب، ساىٔر جهتلری اووه، وساحله قریب اولان یرلری ده پك آلچق وبطاقلقدر. ثروت طبیعیه سی زراعته مخصر اولوب، باشلیجه محصولاتی پاموق ایسه ده، حبوبات متنوعه ایله پرنج، شكر قامشی، توتون وساىٔره محصولاتی دخی چوقدر. دمیر وكمور معدنلری چوق ایسه ده، پك آزی چیقارلمقده در. صنایعی كری اولوب، آنجق دمیر یوللری وسیر سفاىٔنۀ صالح نهرلری وجدوللری چوق اولدیغندن، تجارتی پك ایلریدر. اهالیٔ قدیمه سی (آلیبامه) دنیلن جنكاور برقوم ایدی، كه آوروپالیلره قارشی پك مردانه محاربه ومقاومت ایتمشلرسه ده، اك نهایت مغلوب اولوب، محو وپریشان اولمشلردر. ١٧۰٢ تاریخنده فرانسزلر آلابامه وساىٔر اوجهتلرك ساحللرینی اله چكیر مشلر سه ده، مؤخراً تركه مجبور اولمشلردر. ١٨١٧ تاریخنده بوقطعه ممالك مجتمعه یه چكوب، حدودی بالتعیین اصول اداره سی تنظیم اولنمش، و ١٨١٩ ده بر جمهوریت صورتنه قونیله رق، ممالك مجتمعه هیىٔتنه داخل اولمشدر. ٥١ قضایه‌ منقسم اولوب، مركزی (مونتقوموری) و اك تجارتكاه محلی (موبیله) شهریدر.