اتوليا

Osmanlica ansiklopedi kamus alemde اتوليا maddesi. Sayfa:779


Etolie - اتوليا

یونانك شمال غربی جهتنده واقع بر خطه سی اولوب، آقارنانیا خطه سیله معاً بر ایالت اتخاذ، و ٦ قضایه تقسیم اولنمشدر. بو قضالرك دردی (یعنی میسولونكی، ناوپاقتوس (اینه بختی) ، تریخونیا و اوریستانیا قضالری) اتولیاده واقعدر. اتولیا جنوباً (باتراس) كورفزیله، شمالاً آرناودلق و تسالیا ایله، شرقاً یونانك (فتیوتیده مع فوكیده) ایالتیله محدود اولوب، غرباً دخی (آسپرو پوتامو) نهریله آقارنانیادن آیرلمشدر. اهالیسی ٨٨٧۰۰ كشیدر. باشلیجه قصبه لری مركز ایالت اولان (میسولونكی) ایله (اوپاقتوس) و (اوراخوری) قصبه لریدر. اراضیسی طاغلق اولوب، آرناؤدلغی تسالیادن آیران (پیندوس) سلسله سی بو قطعه نك ایچنه داخل اوله رق، ساحل بحره قدر اولور، و اتكلریله شعبه لری صاغ و صوله اوزانه رق، همان بتون بو خطه یی قاپلایور. یالكز جنوب غربی جهتنده آسیروپوتامونك منصبی جوارلریله میسولونكی واوراخوری جوارلری دوز و منبت ایسه ده، بو جهتده دخی بطاقلقلر زیاده در. طاغلرك اكثیریسی قورو و چبلاق ایسه ده، بعض كوزل مرعالری دخی واردر؛ و اهالیسی باشلیجه چوبانلقله كچینیر. بعض اورمانلر دخی بولنوب، نهر-

لردن اودون و كراسته ایندیریلیر. دوز یرلرده بغدای، مصر و اوزوم كبی بعض محصولات یتیشیورسه ده، اهالی پك چالیشقان اولمیوب، ویركیلری دخی پك آغر اولدیغندن، بر فقر و ضرورت ایچنده یاشارلر. بو خطه نك حدود غربیه سنی آیران آسپروپوتامو یونانك اك بیوك نهریدر. دیكر بر طاقم نهرلر دخی اتولیانك طاغلرندن اینه رك، بو ایرماغه دوكلدكلری كبی، (اوراخوری) كولنك صولری دخی بر آیاق واسطه سیله (اریمچه) كولنك ایچنده كچدكدن صكره، آسپروپوتامویه منصب اولور. (فیداری) اسمنده دیكر بر نهر دخی بو قطعه نك جنوب شرقی جهتنده آقه رق (پاتراس) كورفزینه منصب اولور. زمان قدیمده اتولیا اهالیسی یونانیلر بیننده جهالت و وحشیلكلریله مشهور اولوب، داىٔما كرك بینلرنده و كرك قومشولریله محاربه ده بولنور، و حیدودلقله تا آناطولی سواحلنه قدر كیدرلردی. مركزلری اولان (ترموس) شهر قدیمنده بر مجلس منتخبلری اجتماع ایدردی. یونانك ساىٔر طرفلریله برابر اسكندرك ید ضبطنه كچدكدن صكره، بونك وارثلرینه قارشی حرب ایتمش، وبر آره لق (آنتیغون) ایله بالاتفاق، یونانی ضبط ایتمك ایستمشلردی. بعده آقارنانیا، الیده و مسینیا ایله برابر بر هیىٔت متفقه تشكیل ایده رك، بر خیلی وقت آخاىٔیا هیىٔت متفقه سیله محاربه ده بولنمشلردی. مؤخراً رومالیلرك ضبطنه كچوب، روما دولتنك انقسامنده شرق ایمپراطورلغنك حصه سنه دوشمش؛ و استانبولك لاتینلر طرفندن ضبطی صره سنده، روم ایمپراطورلری خانداننه منسوب (تىٔو دورآ نكلو) اوطرفه كیده رك، بر حكومت تشكیل ایتمشیدی. بعده سلطان مراد ثانی حضرتلری طرفندن فتح، وبر آره لق اسكندر بك طرفندن آرناودلقله برابر ممالك عثمانیه دن فك اولنمش، و اسكندربكك و فاتنده و ندیكلیلره كچمش ایسه ده، متعاقباً استرداد اولنمش؛ و نهایت یونانه استقلال ویرلدیكنده بو قطعه دخی حدود یونانیه داخلنده قالمشدر.

Kamusul Alamde Etolie maddesi, اتوليا osmanlica tarih ve cografya ansiklopedisi Etolie nedir anlami. hakkinda bilgi



2 9 16 23 30 37 44 51 58 65 72 79 86 93 100 107 114 121 128 135 142 149 156 163 170 177 184 191 198 205 212 219 226 233 240 247 254 261 268 275 282