Etsez ~ اتسز
Kamus-ul'Alam - Etsez ~ اتسز maddesi. Sayfa: 777 - Sira: 6
Etsez - اتسز
(خوارزمشاه _ بن محمد بن انو شتكین) ملوك خوارزمشاهیه نك ایكنجیسی اولوب، پدرینك وفاتندن صكره، ٥٢١ تاریخنده سلطان سنجر سلچوقینك فرمانیله خوارزم امارتنه نصب اولنه رق، عادل و جسور بر ذات اولمغله، سلطان سنجرك تعظیم و اعتمادینه مظهر اولمشدیسه ده، مؤخراً كندیسنك استقلال هوسنده بولندیغی سلطان سنجره اشراب اولنمغله، اوزرینه عسكر سوق ایده رك، اتسزك مغلوب، ویرینه كندی برادر زاده سی غیاث الدین سلیمان شاهی نصب ایتمشیدی. آنجق اتسز اهالینك فوق العاده محبتلرینی جلب ایتمش اولدیغندن، مملكتی استردادله، سلیمان شاهی طرد ایتمش؛ و متعاقباً یعنی ٥٣٦ تاریخنده خطا صاجنی
سلطان سنجره قارشی تشویق و ترغیب ایتمكله، سنجر بونلرله ایتدیكی محاربه ده مغلوب اولنجه، اتسز دخی فرصتی قاچیرمیه رق، خراسانك اكثر طرفلرینی و سنجرك پایتختی اولان مرو شهرینی دخی ضبط ایتمش؛ و ارباب علم و هنری فوق العاده حرمت ورعایت ایده رك، مشاهیر علمایی معیتنه آلمشیدی. ٥٣٨ تاریخنده سلطان سنجر خطادن كسب امنیت ایتمكله، صاحب ترجمه نك اوزرینه عسكر سوق ایتمش ایسه ده، اتسز تحصن ایدوب، مقاومت ایتدیكندن، مرو وخراسان ینه سنجره و خوارزم اتسزه قالمق اوزره بینلرنده صلح تقرر ایتمش؛ و صاحب ترجمه مستقلاً حكم سوره رك، ٥٥١ تاریخنده وفات ایتمشدر.
Kamusul Alam, Şemseddin Sami; Kamusul Alamde Etsez maddesi. osmanlıcada Etsez ne demek, Etsez anlamı manası, Etsez osmanlıca nasıl yazılır. Osmanlıca sözlükte Etsez hakkında bilgi. Arapça Etsez ne demek. Arapça osmanlıca sözlük. Farsçada Etsez anlamı
Kamusul Alamde - اتسز Etsez maddesi. Şemseddin Sami, Kamusul Alam Ansiklopedisi