ETsiz - اتسز

(بن خوارزمی) امرای اتراكدن و ملكشاه سلچوقینك رجالندن اولوب، ٤٦٣ تاریخنده ملوك فاطمیه نك النده بولنان شامی فتح ایتمكه مأمور اولمغله، ترك عسكریله ابتدا فسلسطینه كیره رك، رمله و بعده قدسی ضبط ایتمش؛ و دمشقی محاصره ایدوب، اطرافنی یغما و تخریب ایتمشیدی. بونی هر سنه معتاد ایده رك، حصاد و قتنده هجومله، اطرافی یغما و تخریب ایتدكدن صكره، عودت ایتدیكندن، شام اهالیسی زیاده سیله قحط ضرورته دوچار اولمشلر ایدی. اتسز بو حالدن بالاستفاده ٤٦٨ تاریخنده دمشقی بر مدت محاصره دن صكره امانله ضبط، و اطرافنی دخی استیلا ایده رك، خلفای عباسیه نامنه خطبه اوقوتمش؛ و ((حی علی خیر العمل)) نداسیله اذان اوقونمسنی منع یتمشیدی. بر سنه صكره مصرك فتحنه كیدوب، موفق اولمق اوزره ایكن، ناكهان بوزیلوب، عساكر قلیله ایله شامه عودت ایتمش؛ و بو غیبوبتنده باش قالدیرمش اولان قدس و ساىٔر بعض جهاتی یكیدن ضبط ایده رك، مظالمنی چوغالتدقجه چوغالتمشیدی. نهایت ٤٧۰ تاریخنده سلطان ملكشاه شام ممالكنی برادری (تاج الدوله تتش) ە ویرمكله، او صره ده اتسز دخی دمشقده عساكر مصریه طرفندن محاصره ایدلمش اولدیغندن، تاج الدوله امدادینه كیده رك، محاصره دن قورتارمش ایسه ده، مظالم و حركات واقعه سندن طولایی، متعاقباً قتل ایتمشدر. قورو و ضعیف اولدیغندن (اتسز) لقبیله شهرت بولمشدر.