Ebe zade - ابه زاده

(عبد الله افندی) دولت علیۀ عثمانیه شیخ الاسلاملرندن اولوب، دور سلطان احمد ثالثده ایكی دفعه مسند مشیختی احراز ایتمشدر. علی الاصول دور مدارس ایتكدن صكره، ١۰٩٦ تاریخنده حلب، ١١۰۰ ده مصر، ١١۰٣ ده ادرنه و ١١۰٦ ده مكۀ مكرمه ملاسی اولوب، سنۀ مذكوره رجبنده ادرنه یه جلب اولنه رق، آناطولی قاضیعسكری، و ایكی سنه صكره روم ایكی قاضیعسكری اولمش؛ و بعده شیخ الاسلام فیض الله افندینك غضبنه اوغرامغله، قبریسه نفی اولنمشیدی. سلطان احمد خان ثالثدن اول منفاسی بروسه یه تحویل اولنه رق، اثنای راهده پادشاه مشارالیهك جلوسندن و فیض الله افندینك وفاتندن بالاستفاده، طوغریجه استانبوله كلمش؛ و بلا استیذان كلدیكندن، ینه بروسه یه كوندرلمش ایسه ده، متعاقباً مظهر عفوبیوریله رق، درسعادته جلب، و ١١١٧ تاریخنده روم ایلی قاضیعسكرلكنه نصب اولنمشیدی. ١١١٩ سنه سی شوالنده مسند مشیخته ترفیع اولنه رق، ایكی بچق سنه قدر مقام فتواده قالدقدن صكره، ١١٢٢ تاریخنده عزل، و ١١٢٤ سنه سی محرمنده ثانیا مشیخت اسلامیه یه نصب اولنمشدر. بو دفعه دخی ١٣ آی قدر بو مسندده قالدقدن صكره، دولت علیه یه التجا ایتمش اولان اسوچ قرالی اون ایكنجی شارلك روسیه نك

تكلیفی اوزرینه استانبولدن اخراجی مسىٔله سندنطولایی عزل اولنه رق، روم ایلی حصارنده كاىٔن یالیسنده وكلانك علیهنده ادارۀ لسان ایتدیكندن، ١١٢٦ صفرنده طربزونه نفی اولنه رق، كیدركن سوار بولندیغی كمینك باتمسیله، مغروقاً وفات ایتمشدر.