Ebu Müslim Horasani - ابو مسلم خراسانی

(عبد الرحمن بن مسلم) مشاهیر شجعان اسلامدن اولوب، خراسانده دنیایه كلمش، و پدرینك وفاتندن صكره، عیسی بن معقل طرفندن تربیه اولنه رق، ادبیات و علوم ساىٔره ده مشارالیه بالبنان اولمشیدی. صغر سنندن بری اهل بیت رسول الله (صلعم) حقنده وفرتله محبت حاصل ایدوب، بنی مروانه قارشی اظهار بغض و خصومت ایتمكه و خراسانده بولنان نقبا ایله كوریشمكه باشلامشیدی. بعده نقبا ایله مكۀ مكرمه یه كیده رك، ایفای حج شریف ایتمكله برابر، عبدالله بن عباسك حفیدی امام ابراهیم ایله ملاقات ایتمش؛ و بر مدت بونك خدمتنده قالدقدن صكره، بونك طرفندن خراسان نقیبلكنه تعیین اولنوب، و طننه عودتنده خلقی امام مشارالیهك بیعتنه دعوت ایتمكه باشلایه رق، جسارت و شجاعت فوق العاده سی و فصاحت و قوۀ ناطقه سی یاردمیله آززمان ظرفنده بر چوق طرفدار پیدا ایتمكله، خراسانی اله كچیرمش؛ و بو آره لقده ملك اموی مروان حمار خبر آلوب،

امام ابراهیمی قتل ایتدیرمش ایسه ده، ابو مسلم بونك برادری ابو العباس سفاحك نامنه خطبه اوقوتمغله برابر، آلتیوز بیك كشی ایله شامك اوزرینه هجوم ایده رك، بر چوق محارباتدن صكره، مروان حماری قتل و بنی امیه یی كلیاً مغلوب ایدوب، دولتی ضبط، و ذاتاً كوفه ده اعلان خلافت ایتمش اولان سفاحه بیعت ایتمشدر. ابو مسلم دولت عباسیه نك بر قاعدی صفتیله اكتفا ایتمش ایسه ده، حقیقتده بو دولتك بانیسی اولدیعندن، بالطبع حاىٔز‌ بولندیغی نفوذ واقتدار كندی حقنده مهلك اولوب، سفاحك زمان خلافتی اولان درت سنه ده باقی قاله بیلمش ایسه ده، بونك وفاتیله برادری ابو غدراً قتل اولنمشدر. ابو مسلك نسبنده اختلاف واقع اولوب، بر روایته كوره عرب و دیكر بر روایته كوره ده فرس جنسنه منسوب ایدی. هر حالده عربی وفارسیده فصاحت و طلاقت صاحبی وا دبیات و اشعاره آشنا اولوب، اخلاق و اطواری پك آز آدملرده بولنور بر صورت خارقة العاده ده ایدیسه ده، مقصدینه ناىٔل اولمق ایچون سفك دمادن احتراز ایتمیوب، پك چوق آدملرك جاننه قییمش اولدیغندن، جو نخوارلقله شهرت بولمشدر. قیصه بویلی، قره صقاللی، اسمرجه و كوزل چهره لی بر آدم ایدی.