Ebu Mervan Bin Zühr - ابو مروان بن زهر

(عبد الملك بن ابی العلاء زهر) اندلسك مشاهیر اطباسندن اولوب، آنف الترجمه ابو مروان عبد الملكك حفیدی و طبیب مشهور ابو العلا بن زهرك اوغلیدر. علم طبی پدرندن تحصیل ایله، اونك معیتنده اجرای طبابت ایده رك، ادویۀ مفرده و مركبه ده و تشخیص امراض ایله تداوىٔ مرضاده مهارت تامه كسب ایتمكله، شهرتی عالمكیر اولوب، مؤخراً اندلسی ضبط ایدن امیر المؤمنین عبدالمؤمنك طبیبی و معتمد و مقربی اولمشیدی. طبده كی حذاقی حقنده بعض نوادر و غراىٔب منقولدر. سالف الترجمه ابو بكر بن زهر حفیددك پدری و حكیم مشهور ابن رشدك استادیدر. آوروپاجه ابن زهردن غلط اوله رق (آون زوآر) اسمیله معروف اولوب، آنجق ((التبسیر)) عنوانلی كتابنك عبرانیجه یه اولان ترجمه-

سندن لاتینجه یه ترجمه ایدلمش اولمسندن می نه دن ایسه، كندیسی یهودی المذهب زعم اولنمشدر ؛ حالبوكه بیوك جدینك محمد تسمیه اولنمسندن و اشبیلیه نك اعاظم فقها و محدثینندن بولنمسندن دخی آكلاشلدیغی كبی، كرك كندیسنك و كرك خانداننه منسوب اولان دیكر ابن زهرلرك مسلم اولدقلرنده اصلا شبهه یوقدر. صاحب ترجمه ٤٦٦ تاریخنده طوغوب، ٥٥٩ ده وفات ایتمشدر. آثار مشهوره سی بروجه آتیدر : ((التیسیر فی المداواة و التدبیر)) كه شاكردی ابن رشد ایچون تألیف ایتمشدر، ((كتاب الاغذیة))، ((النذكرة))، ((مقالة فی علل الكلی))، ((رسالة الی بعض الاطباء باشبیلیة فی علتی البرص و البهق))، بو آثارینك‌برنجیسی عبرانیجه یه و عبرانیجه دن لاتینجه یه ترجمه اولنه رق، مدت مدیده آوروپاده دستور العمل اتخاذ اولنمش، و دفعاتله طبع اولنمشدر. ((داىٔرة المعارف)) صاحبی بو ذاتك آنف الترجمه ابو مروان بن زهر ایله بر شخص واحد اولمسی احتمالنی درمیان ایدیور ایسه ده، بونلرك جد و حفید اوله رق ایكی شخص اولدقلری و ایكیسنك ده مشاهیر اطبادن بولندقلری ابن ابی اصیببعه نك ((عیون الانباء فی طبقات الاطباء)) عنوانلی كتابنده موضحاً مسطوردر.