İbni Mefrağ - ابن مفرغ

(ابو عثمان یزید بن زیاد حمیری) مشاهیر شعرادن اولوب، حضرت عثمان ذی النورینك اوغلی سعیدك محب صادقی اولمغله، مشارالیهك معاویه طرفندن خراسان و الیلكنه نصبنده برابرنده خراسانه كیتمش؛ و اوراده عباد بن زیاده انتساب ایتمشیدی. بعده عباددن بر طاقم معاملات جوریه كوروب حبس اولنمغله،

محبوسینندن قورتلنجه، بصره یه فرار ایتمش؛ و اثنای راهده او غرادیغی خانلرك دیوارلرینه زیاد‌ و اوغللری عباد و عبیداللهك علیهنده بر طاقم بیتلر یازمشیدی. زیاد خاندانی علیهنده اولان اشعاری شهرت بولمغله عبیدالله بن زیاد طرفندن حبس اولنه رق، قتلنه قصد اولنمش ایسه ده، معاویه نك معیتنده بولنان یمنلیلر طرفدارلری اولدیغندن، شامدن قتلنه مساعده اولنمدیغندن، عبیدالله انواع اشكنجه و حقارتلرله تعذیب ایتدكدن صكره، برادری عباده كوندرمش؛ و خراسانه كیدنجه یه قدر خانلرك دیوارلرینه یازمش اولدیغی بیتلری طیرناقلریله قازیمغه اجبار اولندیغندن، طیرناقلری قوپوب، پارمق كمیكلری میدانه چیقمش اولدیغی مرویدر. عبادك حبسنده بر چوق وقت قالدقدن صكره، ایكی بیت سویلیوب، دمشق جامعنده اوقومق اوزره، مخصوص بر آدم كوندرمكله، معاویه نك معیتنده بولنان یمنلیلر، بو بیتلری ایشیدنجه، آیاغه قالقدقلرندن، معاویه ابن مفرغی خراساندن جلبله، عفو ایتمكله مجبور اولمشیدی. بونك اوزرینه صاحب ترجمه موصله چكیلوب، اوراده تزویج اولنمش ایسه ده، اهوازده (اناهید) یاخود (ناهید) اسمنده بر قیزه تعشق ایتمش اولدیغندن، آلام هجوه مقاومت ایده میوب، اهوازه كیتمش، و بصره دن چكر كن عبید الله بن زیادله باریشوب، كندیسندن و سجستان والیسی عبیدالله بن ابی بكره دن بر چوق احسانلره ناىٔل اولمغله، جمله سنی معشوقه سنه هبه ایتمشدی. مصعب ابن زبیر زماننده ٦٩ تاریخنده طاعوندن وفات ایتمشدر. اشعارینك قسم اعظمی زیاد خانداننك ذمی و ناهیده اولان عشق و شوقی حقنده در. (تبع) اشعارینی جمع و قصۀ مشهوره سنی تنظیم ایدن بو ذات اولدیغی دخی مرویدر. بصره ده عبیدالله بن زیاددن كوردیكی مظلیم حقنده سویلمش اولدیغی شو ایكی بیت جملۀ اشعارندندر : دار سلمی بالخبت ذی الاطلال كیف نوم الاسیر فی الاغلال این منی السلام من بعد نأی فارجعی لی تحیتی و سؤالی