İbni Ubeydullah Bin Abbas - ابنا عبيد الله بن عباس

(عبد الرحمن و قثم) عم رسول الله (صلعم) ك تورونلری اولوب، ایكیسی طفل اولدقلری حالده، حضرت علی یه طرفدارلق ایدنلری و قادین و چوجقلرینی قتل و امحا امریله معاویه طرفندن هر طرفه كوندریلن مأمورلردن بسر بن ارطاة طرفندن ذبح اولنمشلردر. حضرت علینك ارتحالیله معاویه نك سلطنتده تقررنده سكره، عبیدالله بن عباس بر كون معاویه نك حضورنده قاتل مرقومه راست كلمكله : ((بنم صبی اوغللرمی اولدیرن سن میسك? )) دینجه، ((اوت بنم)) دیه جواب ویرمسیله، عبدالله ((جناب حقدن ایكیمزی بشقه یرده تصادف ایتدیرمسنی دعا ایدرم)) دیمش ؛ بسر ((بوراسنك نه سی وار)) دینجه، عبیدالله ((قلیجم یوقدر)) دیمسیله، بسر كندیسنه بر قلیج اوزاتمش ایسه ده، معاویه درحال یرندن فیرلایوب قلیجی قاپمش، و ((نه یاپیورسك ? )) ایكیمزی ده اولدیرته جكسك ! )) دینجه، عبیدالله ((والله اونی یاپه جقدم)) دیمش. عبیدالله بن عباسك زوجه سی ام حكیم جكر پارا لرینك كوزی اوكنده ذبحنی كوردكدن صكره، شعورینه خلل كلوب، بر یرده قرار بوله میه رق، بو بابده سویلدیكی بر قصیدهْ محرقه یی دلخراش بر سسله ترنم ایده رك طولاشیرمش. شو ایكی بیت او قصیده دندر : یا من احس بابنی اللذین هما كالدر تین تشظی عنهما الصدف یا من احس بابنی اللذین هما سمعی و قلبی فقلبی الیوم مر دهف یا من احس بابنی اللذین هما مخ العظام فمخی الیوم مختطف