İbrahim efendi cüsam zade - ابراهیم افندی جسام زاده

(جسام زاده _) اون برنجی عصر هجری اواىٔلی علماسندن اولوب، كرمیانی حسام افندینك اوغلیدر. ٩٨۰ تاریخنده دنیایه كلوب، پدرندن مبادىٔ علومی اوقودقدن صكره، خواجه سعدالدین افندی یه انتساب ایده رك، ٩٩٧ ده تدریسه مأذون اولمغله، ملازمته باشلامش؛ و كرماستی، كستل، محمد آعا، خارجی و فتحیه مدرسه لرنده افاده ایله امرار اوقات ایده رك، ١۰١٦ ذی القعده سنده كنج یاشنده ارتحال ایدوب، شریقه خاتون مسجدی ساحه سنده دفن اولنمشدر. فضاىٔل و كمالات ایله متصف بر ذات اولوب، كمال پاشا خاده نك ((مفتاح)) نام اثرینه بر تكمله سی واردر، و ((فقه اكبر)) ایله ((شافیه)) یی نظم و شرح ایتمشدر. طبیعت شعریه سی دخی اولوب، شایان قبول بعض اشعاری واردر. ((شریفی)) تخلص ایدردی.