Eban Bin Abdül Hamid - ابان بن عبد الحميد

خلفای عباسیه دن هارون الرشید دوری عرب شعراسندن اولوب، برمكیلری منسوب بولنمغله، پك چوق عطیه واحسانلرینه ناىٔل اولمش؛ و (كلیله ودمنه) حكایاتنی بونلرك نامنه نظمه كچمش؛ و مبدأ عالمله احوال عالمه علم منطقه متعلق مشهور بر قصیده دخی سویلمشدر. بعضلری ده بو قصیده نك (ابن العتاهیه) نك اولدیغنه قاىٔل اولمشلردر. یحیی بن خالد بر مكی ابو نواسی ابانله مشاعره ایتدیرمك ایستدیكی حالده، ابو نواس كندی قدر و مرتبه سنی دها عالی عد ایده رك، ابانله مسابقته راضی اولمدیغندن، بینلرنده رقابت حاصل اولوب، بر بری علیهنده پك چوق هجویه لر سویلمشلردر. ابان یحیای بر مكیدن اشعارینك خلیفه یه عرض اولنمسنی رجا ایتدیكنده، یحیی خلیفه یی ممنون ایتمك ایچون آل ابی طالب علیهنده بر قصیده نظم ایتملیسك دیمش، و ابان بوتكلیفی قبول ایتمك ایستمه مش ایسه ده، یحیانك اصراری اوزرینه، شو بر قاچ بیتله باشلایان بر قصیده نظم ایتمشدی:

نشدت بحق الله من كان مسلما اعم بما قد قلته العجم و العرب اعمم رسول الله اقرب زلفةً لدیه ام بن العم فی رتبة النسب و ایهما اولی به و بعهده ومن ذا له حق التراث بما وجب فسان كان عباس احق بتلكم وكان علی بعد ذاك علی سبب فابناء عباس هم یر ثونه كمالعمم لابن العم فی الارث قد حجب بو قصیده هارون الرشیده عرض اولندقده، زیاده سیله حظ ایدوب، شاعره یكرمی بیك درهم ویرمش؛ وبو مناسبتله ابان هارون الرشیده انتساب ایتمش. مدحیه و هجویه لری وساىٔر قصیده لری چوقدر. ((كلیله ودمنه)) منظومه سنی شو ایكی بیتله باشلامشدر : هذ كتاب ادب ومحنه وهو الذی یدعی كلیله ودمنه فیه احتیالات وفیه رشد وهو كتاب وضعته الهند