Aydıncık ~ آيدنجق
Kamus-ul'Alam - Aydıncık ~ آيدنجق maddesi. Sayfa: 511 - Sira: 6
Aydıncık - آيدنجق
(یاخود ایدنجك) خداوندكار ولایتنك قره سی سنجاغنه ملحق باندرمه قضاسی داخلنده ناحیه مركزی بر قصبه در، كه مرمره ساحلندن بر چاریك مسافه ده اولوب، قپوطاغی شبه جزیره سنك مدخلنده ویاندرمه نك ١٢ كیلومتره غربنده واردكك ١٥ كیلومتره جنوب شرقیسنده واقعدر. قصبه نك یاریم ساعت قدر شمالنده (كیزیق) شهر قدیمنك خرابه لری مشهوددر. قصبه نك جوارلری زیتون و دود آغاجلریله مستور اولوب، قصبه داخلنده كلیتلی ایپك بوجكی یتیشدیریلیر. آیدنجق قصبه سنك ٥۰۰۰ قدر اهالیسی وبر رشدیه مكتبی واردر. بو قصبه ٧٣٥ تاریخنده سلطان
اورخان غازی حضرتلری طرفندن فتح اولنه رق، غازىٔ مشارالیهك اوغلی سلیمان پاشا اورادن روم ایلی یه كچمش اولمغله، تاریخ عثمانیده اهمیت مخصوصه سی واردر. _ ناحیه سی نفس قصبه ایله ٢٢ قریه دن مركب اولوب، ١٥٦٥ خانه و ٧١۰۰ اهالیسی واردر، كه بونلردن یالكز ٨۰۰ ی ارمنی، ٢٤۰ ی روم، ١۰۰ قزاق و قصوری كاملاً اسلامدر. درون ناحیه ده ٥ جامع، ٢٨ مسجد، ٢ كلیسا بولنیور. اراضیسی تپه دنیله بیله جك بر طاقم كوچك طاغلرله دوز یرلردن عبارت اولوب، آقان بر ایكی كوچك نهری جنوبه طوغری جریانله، میخالیج كولنه دوكیلورلر. محصولاتی حبوبات متنوعه ایله اوزوم وساىٔر میوه لردن وسبزه دن عبارتدر. زیتون وقوزه قصبه نك اطرافنه مخصوصدر.
Kamusul Alam, Şemseddin Sami; Kamusul Alamde Aydıncık maddesi. osmanlıcada Aydıncık ne demek, Aydıncık anlamı manası, Aydıncık osmanlıca nasıl yazılır. Osmanlıca sözlükte Aydıncık hakkında bilgi. Arapça Aydıncık ne demek. Arapça osmanlıca sözlük. Farsçada Aydıncık anlamı
Kamusul Alamde - آيدنجق Aydıncık maddesi. Şemseddin Sami, Kamusul Alam Ansiklopedisi