آمنه

Osmanlica ansiklopedi kamus alemde آمنه maddesi. Sayfa:379


Amine - آمنه

رسول الله صلی الله علیه و سلم افندمز حضرتلرینك والدۀ محترمه لری اولوب، و هب (بن عبد مناف بن زهره بن كلاب بن مره بن كعب بن لوی بن غالب) ك قیزی اولمغله، سلسلۀ نسی اوچ بطن یوقاریده سلسلۀ مباركۀ پیغمبری ایله برلشیر. والده لری (بره) دخی عبدالعزی (بن عثمان بن عبدالدار بن قصی بن كلاب) ك قیزی اولمغله، بو جهتدن دخی سلسلۀ نسبی درت بطنده نسب پیغمبری ایله برلشیر. حسن وادبیله بین القریش امثالسز اولمغله، حضرت عبدالمطلب كندیسنی اوغلی حضرت عبداللهه تزوویج ایتمكله، حضرت آمنه اون درت یاشنده اولدیغی حالده، حامله قالوب، برروایته كوره ایكی، دیكر بر روایته كوره سكز آیلق حامله ایكن، زوج محترملری حضرت عبدالله ارتحال ایتمشدر. حضرت آمنه فخر كاىٔنات افندمزك آلتی یاشنه وصوللرینه قدر بر حیات اولوب، عبدالمطلبك مدینۀ منوره ده بولنان داییلری بنی عدی بن النجارك زیارتنه كیده رك، حضرت محمد علیه الصلاة والسلام افندمز دخی بر ابرلرنده اولدقلری حالده، عودتنده مكه ایله مدینه آره سنده (ابواء) نام موقعده ارتحال ایتمكله، اوراده دفن اولنمشدر؛ ودیكر بر روایته كوره مكۀ مكرمه ده ارتحال ایدوب اوراده مدفوندر. حضرت عبداللهك محل ارتحال ودفنی دخی مختلف فیه اولوب، بر روایته كوره پدرلرینك داییلرینی زیارت ایچون مكه یه كیتمش، ویاخود لاجل التجاره شامه كیدوب، عودتنده مكه یه اوغرامش اولدیغی حالده، اوراده داییلرینك خانه سنده ارتحال ایدوب، (دارنابغه) ده، ودیكر بر روایته كوره دخی مكه دن مدینه یه كلیركن مذكور (ابواء) ده ارتحال ایتمكه، اوراده دفن اولنمشدر. هر حالده ابوین رسول الله (صلی الله علیه وسلم) دن برینك مدفنی ابوا ء ده اولدیغی مرویدر. حضرت آمنه ایله حضرت عبداللهك ایمانلری حقنده بین الفقها پك چوق اختلافات وقوع بولمش ایسه ده، هر حالده حضرت رسول الله افندمزه حرمةً ابوینی حقنده حسن ظنده بولنمق و اسملرینی حرمت مخصوصه

ایله یاد ایتمك هر مؤمن ایچون فرضدر. حضرت عبدالله حضرت آمنه دن بشقه هیج بر قادینله تزوج و مقارنت ایتمه مش اولدیغی كبی، حضرت آمنه دخی مشارالیهدن بشقه كیمسه یه وارمامش، وحضرت نبی ذیشاندن بشقه اولادلری دخی اولمامشیدی. حضرت پیغمبرك نور نبوتی حضرت عبداللهك ناصیه سنده لمعه پاش اولوب، كندیسی فوق العاده حسن وجماله دخی مالك اولدیغندن، بتون قریش قیزلری كندیسنه وارمغه خواهشكر اولوب، بعضلری دخی وصاللرینی تكلیف ایتمش اولدقلری حالده، كمال عفتندن هیج برینه التفات ایتمیوب، قدرت ازلیه اوشرفی حضرت آمنه یه میسر ایتمشدر. حتی زفاف كیجه سی حضرت عبدالهك ناصیه لرنده كی نورك حضرت آمنه نك ناصیه لرینه انتقال ایتدیكی، وبو حالك بتون نساء قریشی غبطه وحسده دوشوردیكی مرویدر.

Kamusul Alamde Amine maddesi, آمنه osmanlica tarih ve cografya ansiklopedisi Amine nedir anlami. hakkinda bilgi