Alicante - آليقنت

اسپانیانك شرق جنوبی طرفنده ساحل بحرده بر ایالتدر، كه (بلنسیه) خطه سنك قسم جنوبیسی اولدیغی حالده ١٨٢٢ سنه سی تشكیلاتنده مركزی همنامی اولان شهر اولمق اوزره بر ایالت اتخاذ اولنمشدر. شمالاً بلنسیه، شمال غربی طرفندن البسیطه، غرب جنوبی طرفندن مرسیه، شرقاً دخی آق دكیزله محدود ومحاط اولوب، مساحۀ سطحیه سی ٥٦٥٩ مربع كیلومتره، و اهالیسی ١٢٤ ٤٢٣ نفوسدن عبارتدر، كه بهر مربع كیلومتره باشنه ٧٢ كشی دوشر. ایالت بروجه

زیر ١٤ قضایه منقسمدر : آلیقت، آلكون، قالوسه ده انصاریه، قونستاینه، دنیا، دولورس، الكه، جیجونه، مونووار، نوولده، اورمیبوىٔله، پغو، ویلاجنویوزه، ویلنه، ایالتك اراضیسی طاغلق اولوب، طاغلرك آره سنده وساحل بوینجه كوزل اووه لر وبایرلری دخی واردر. بیوك نهرلری یوغیسه ده، اكثر اراضیسنی اسقا ایدر كوچك چایلری پك چوقدر. مع هذا یاغمورلر سیرچكه یاغدیغندن، وسدلر درجۀ كفایه ده بولنمدیغندن، چوق دفعه قوراقلقدن قحط وقوع بولور. اهالیسی فوق العاده چالیشقان اولدیغندن اراضینك قوملق وقورولغیله برابر، بو ایالت اسپانیانك زراعتجه اك ایلری بولنان یرلرندندر. حبونات متنوعه دن بشقه، یاغلری دخی پك چوق اولوب، خیلی ایپك چیقاریلیر. هواسی طاغلرده صوىٔوق و سواحلده زیاده جه صیجاق ایسه ده، عمومیت اوزره صاغلامدر. اهالیسی اسپانولجه نك قطالونه بلنسیه یه مخصوص بر نوعیله متكلم و اكثریسی مملكته مخصوص بر قیافتده اولوب، فعال و چالیشقان وبونكله برابر ذوق و اكلنجه یه دخی میال آدملردر. یوللری الآن پك آز اولوب، ایالتك ایچندن یالكز آلیقنت شهرینه منتهی اولان بر دمیر یول خطی ممتد اولور؛ معارف عمومیه پك كریدر.