آق قيونلی

Osmanlica ansiklopedi kamus alemde آق قيونلی maddesi. Sayfa:268


Akkoyunlu - آق قيونلی

یدی سكز عصر اول تركستاندن ایران وعراق وآناطولی طرفلرینه هجرت ایدن تركمان اولوسلرندندر. بونلر قره قیونلی دنیلن برعشیرتله برابر آرغون خان زماننده تركستاندن آذربایجانه هجرت ایتمش، واورادن دخی قره قیونلیلر ارزنجان وسیواس، وآق قیونلیلر دخی دیار بكر طرفلرینه كله رك، اور الرینك حكومتنی ضبط ایتمشلردی. آق قیونلیلرك اك اول حكم سورن رىٔیسلری علاء الدین تركمان نامیله معروف اولان طور علی بكدر، كه آمد وموصل طرفلرنده كسب استقلال ایتمشیدی. وفاتنده اوغلی فخر الدین قتلغ بك، واوندن صكره بونك اوغلی قره ایلدك عثمان حكم سورمش، وبو عثمان بك غایت شجیع بر آدم اولمغله، تاریخلرده مذكور خیلی وقوعاتی اولمشدر. بونك قتلندن صكره ظلم وفسادله متخلق اولان اوغلی حمزه بك حكم سوروب، ٨٤٨ تاریخ هجریسده وفاتیله، برادر زاده سی جهانكیر بن علی مسند نشین حكمرانی اولوب، بونك زماننده برادری مشهور (اوزون حسن) ظهور ایتمشدر. [((اوزون حسن) ظهور ایتمشدر. [((اوزون حسن)) ماده سنه مراجعت.] ‌جهانكیردن صكره اوزون حسنك اوغلی یعقوب، و ٨٩٦ ده بونك برادری مسیح بك جلوس ایتمش، وامرا بیننده اختلاف ونفاق ظهور ایدوب، نهایت اوزون حسنك تورونی وخلیل بكك اوغلی علی بك اجلاس اولنمش ایسه ده، نفاق بر طرف اوله میوب، نهایت اوزون حسنك تورونی ویعقوب بكك اوغی (بای سنقر) اجلاس اولنه رق، بو ذات صبی اولدیغندن، امرا بیننده ظهور ایدن محارباتی برطرف ایده میوب، عاقبت كندیسی ده، بر بچق سنه حكم

سوردكدن صكره، بو محارباتك برنده قتل اولنمش: وینه اوزون حسنك تورونلرندن رستم میرزا بن مقصود رأس حكومته چكمشدر. آنجق بو ذات سفاهته منهمك اولدیغندن، امور اداره بسبتون مختل اولمغله، عمیجه سی یعقوبك زماننده پدرینك قتلی اوزرینه رومه قاچوب، سلطان بایزید اول حضرتلرینك حمایه سنه التجا ایتمش اولان احمد میرزا دعوت اولنمش، وكیدوب، رستمی قتل ایتدكدن صكره، مسند نشین حكومت اولمش ایسه ده، امرایی ممنون ايده میه جك بر طاقم اجرا آته قالقیشدیغیچون، حكومتدن اسقاط اولنه رق، یرینه یعقوب بكك اوغلی مراد بك كلمش، واحمد میرزانی قتل ایتمش ایسه ده، بوده طوردیرلمیوب، اوزون حسنك اولادندن یوسفك اوغلی (الوند میرزا) كتیرلمش؛ وبو ذات مراد بكی حبس ایتدكدن صكره، تبریزی مقر اتخاذ ایده رك، حكومت سورمكه باشلامش ایسه ده، برادری محمد بك ظهور ایدوب، كندیسنی قتل ایله، یرینه چكمش؛ آنجق امرا بونی قبول ایتمیوب، مراد بكی محبسدن چیقارمشلر؛ ومراد بك ایكنجی دفعه اوله رق، حكمفرما اولنجه، ابتدا سلفی محمدله مقاتله ایده رك، كندیسنی قتل ایتدكد صكره، دیاربكره واروب، بو شهری عمیجه لرینك ید ضبطندن قورتارمش؛ واو صره ده شاه اسماعیل صفوی ظهور ایدوب، بغداده تجاوز ایتدیكندن، مراد بك بوكا قارشی طوره میوب، ٩۰٨ تاریخ هجریسنده دولت علیۀ عثما نیه یه التجا ایتمش ایسه ده، امداده ناىٔل اوله مدیغندن، علاء الدوله بن ذی الغادردن استمداد ایتمش؛ وشاه اسماعیله اوصره ده بشقه محاربه لرله مشغول اولدیغندن، ملكنی استرداد ایده بیلمش ایسه ده، متعاقباً شاه اسماعیل هجوم ایدوب، مراد بكی منهزم ایتمش، وبغداد وساىٔر ممالكنی ضبطله، آق قیونلی دولتنه ختام ویرمشدر.

Kamusul Alamde Akkoyunlu maddesi, آق قيونلی osmanlica tarih ve cografya ansiklopedisi Akkoyunlu nedir anlami. hakkinda bilgi



3 10 17 24 31 38 45 52 59 66 73 80 87 94 101 108 115 122 129 136 143 150 157 164 171 178 185 192 199 206 213 220 227 234 241 248 255 262 269 276 283