آغريبوز

Osmanlica ansiklopedi kamus alemde آغريبوز maddesi. Sayfa:228


Aubee - آغريبوز

آطه لر دكیزینك كریددن صكره اك بیوك آطه سی اولوب، الیوم شمال شرقیسنده كی كوچك آطه لرله برابر یونانك بر ایالتیدر. بو آطه نك اصل اسمی (اوبیا) اولوب، مركزی اوكنده كی بوغازك اسمی ده (اوریپوس) در، كه بونك تحریفیله آغریبوز اسمی حاصل اولمش، ومركزندن آطه یه دخی تعمیم اولنمشدر. بو آطه یونانك ساحل شرقیسی قارشیسنده شمال غربیدن جنوب‌ شرقی یه طوغری ممتد اولور اوزون وغیر منتظم بر شكلده اولوب، قره ایله بو آطه نك آره سنده كی بوغاز ایكی یه منقسم اوله رق، شمالده كینه (تالاندی بوغازی) جنوبده كینه ده (آغریبوز بوغازی) دینور؛ وبو ایكی بوغازك محل اختلاطنده آطه نك ساحلی قره یه اوقدر تقرب ایدیور، كه آنجق ٦٥ متره وسعتده بر چكید قالوب، مركزی اولان آغریبوز شهری دخی بونقطه ده واقع اولمغله، شهر قره ایله بر كوپری واسطه سیله اختلاط ایدیور. بوغازك ساىٔر طرفلری اون اون ایكی كیلومتره وسعتنده در. آطه نك منتهای شمالنده اولان (لیتاده) برونیله منتهای جنوبنده اولان (مانتیلو) برونی آره سنده اولان طول اعظمی ١٩٥ كیلومتره، واكی اك طار محلنده ٥، واك كنیش محلنده ده‌٥٢ كیلومتره در. شمالنده كی (تریكری) بوغازی بو آطه یی یونانك (افتیوتیده) یعنی ازدین سنجاغندن وغلوس كورفزی آغزنده كی (بلبلجه) شبه جزیره سندن، و جنوباً دخی (اورو) بوغازی (آندرو) آطه سندن آیرمشدر. بو آطه نك اراضیسی عمومیت اوزره طاغلق ایسه ده، طاغلرك آره سنده غایت منبت دره لری وكوچك اووه لری دخی واردر. شمال غربیسنده واقع اولان (لیتنیا) طاغی ٩٤٥ ، وسطلرنده اولان (دیپسو) و (قندیل) ‌طاغلری ١٢۰٥ و ١٣٤۰ وجمله سنك اك یوكسكی اولان (دلفی) طاغی دخی ١٩۰٨ متره ارتفاعنده در. اك بیوك اووه سی دخی مركزی جوارنده اولان (للانته) اووه سی اولوب، ایلیجه لریله مشهوردر. زمان قدیمده بو آطه ده غایت كوزل سماكی مرمرلر چیقاردی. یونانك هیچ بر طرفی بو آطه

قدر منبت ومحصولدار اولمیوب، علی الخصوص شمالی طرفنده طاغلری میشه، چام، چنار وساىٔر آغاجلری حاوی اورمانلرله وكوزل مرعالرله مستور اولدقلری كبی، زیتون آغاجلریله باغلری دخی چوق وحبوبات وساىٔر محصولاتی بولدر؛ آنجق اهالیسی پك چالیشقان اولمدقلری كبی، یوللری دخی غیر منتظم اولدیغندن، تجارت وثروتی استعدادی درجه سنده ترقی ایتمه مشدر. (اوبیا) اسمی ((صیغیری بول)) ویا ((صیغیری ایی)) دیمك اولوب، زمان قدیمده بو آطه نك صیغیرلری مشهور ایدیسه ده، شمدی نه كثرتجه ونه جنسجه شایان ذكر صیغیرلری یوقدر. مركزینك (خالكیس) تسمیه سی یونان لساننده (خالقوس) دنیلن باقیرك كثرتندن ایلری كلوب، اسكی زمانده باقیر ودمیر معدنلری چوق ایدی، و ایی ایشلنیردی. بو كون اك زیاده چیقاریلان معدنی مغنزیا اولوب، سنوی اللی آلتمش بیك قنطار انكلتره یه نقل اولنور. بو آطه نك باشلیجه اوچ قصبه سی واردر، كه برنجیسی (خالكیسی) دخی دنیلن ومركزی اولان آغریبوز شهری ایكنجیسی جنوب طرفنده (آیوس ایلیاس) طاغنك اتكنده اولان (قاریستو) یعنی قزل حصار، واو چنجیسی دخی شمالده كی (اكسروخوری) قصبه لریدر. بو آطه ازمنۀ قدیمه ده بر قاچ جمهوریته منقسم اولوب، اك مشهورلری (خالكیس) و (ارتریا) جمهوریتلری ایدی، كه تجارتلری قوتیله ماكدونیا، سیچلیا وایتالیا سواحلنده بر طاقم مستملكات دخی پیدا ایتمشلردی. بعده آتنه جمهوریتنك یدضبطنه چكمش، ومؤخراً ماكدونیا حكمدارلری، ومتعاقباً رومالیلر طرفندن ضبط اولنمش، ونهایت ٨٧٥ تاریخ هجریسنده ابو الفتح سلطان محمد خان ثانی حضرتلرینك یدجلادتلریله ممالك عثمانیه یه الحاق اولنه رق، ١٨٢٩ تاریخ میلادیسنده واقع یونان استقلالی زماننده بو دولته ترك اولنمشدر. آطنه اوچ قضایه منقسم اولوب، مركزی ایالتدن بشقه قضالردن برینك مركزی قارستو، ودیكرینك كی دخی اكسرو خوری قصبه سیدر. كوچك آطه لردن عبارت اوله رق بو ایالته ملحق بر دردنجی قضا بولندیغی كبی، اسكیرو آطه سی دخی قاریستو قضاسنه ملحقدر. آطه تقریباً ٢٤۰ قریه‌ یی جامع اولوب، بتون ایالتك اهالیسی ٥٤۰ ٨٢ كشیدر، كه بونلرك بر مقداری آرناؤد جنسنه منسوبدر، ومركزده بولنانلرینك بر آزی مسلماندر.

Kamusul Alamde Aubee maddesi, آغريبوز osmanlica tarih ve cografya ansiklopedisi Aubee nedir anlami. hakkinda bilgi



7 14 21 28 35 42 49 56 63 70 77 84 91 98 105 112 119 126 133 140 147 154 161 168 175 182 189 196 203 210 217 224 231 238 245 252 259 266 273 280