Aspozi ~ آسپوزي
Kamus-ul'Alam - Aspozi ~ آسپوزي maddesi. Sayfa: 185 - Sira: 6
Aspozi - آسپوزي
معمورة العزیز ولایتنك ملاطیه سنجاغنده مركز لوا بر شهردر، كه ملاطیه نك ٤ كیلومتره قدر غرب جنوبیسنده وفراتك غرب جنوبی طرفنده كاىٔن وسع بر اووه نك كنارنده، طاغ اتكنده وفرات تابعلرندن (طاشمه صو) نهرینه دوكیلن بر چایك اوزرنده واقع اولوب، موقعی غایت كوزل ومفرح اولدیغی كبی، سوقاقلری دخی منتظم وتمیزدر. آسپوزی مقدما ملاطیه نك صیفیه سی حكمنده اولوب، اهالینك اوراده كوشكلری وار ایدی، ویالكز یازین كیدوب، قیشین ملاطیه یه عودت ایدرلردی. آنجق ١٢٥٥ تاریخنده (نزیب) محاربه سی اثناسنده شهره كلیتلی عسكر كلمش اولدیغندن،اهالی صیفیه لرندن عودت ایده میوب، اوراده قیشلامغه محبور اولمش، واو وقتدن قیشین دخی اوراده قالمغه آلیشمش اولملریله، ملاطیه خالی قالوب، خراب
ولمش؛ وآسپوزی مركز لوا اتخاذ اولنه رق، معموریتی تزاید ایتمشدر. آقار صولری چوق وباغچه لری غایت كوزلدر. یازیلی المالری مشهوردر، كه بوده المانك قیزاره جغی وقت اوستنه اویمه یازیلرله یازلمش كاغد یاپیشدیرلمغله، كونش كورن یازی محللری قیزاروب، ساىٔر طرفلرینك‌صاری قالمسندن حاصل اولور. آسپوزی مشاهیر متصوفین كرامدن نیازی حضرتلرینك مسقط رأسی اولوب، نیازی كویی نامیله شهرك جوارنده بر قریه دخی واردر. اهالیسی ٦۰۰۰ كشی راده سنده در. رطوبتی زیاده جه در.
Kamusul Alam, Şemseddin Sami; Kamusul Alamde Aspozi maddesi. osmanlıcada Aspozi ne demek, Aspozi anlamı manası, Aspozi osmanlıca nasıl yazılır. Osmanlıca sözlükte Aspozi hakkında bilgi. Arapça Aspozi ne demek. Arapça osmanlıca sözlük. Farsçada Aspozi anlamı
Kamusul Alamde - آسپوزي Aspozi maddesi. Şemseddin Sami, Kamusul Alam Ansiklopedisi