ariege - آرياژه

فرانسه نك ایالات جنوبیه سندن بر ایالت اولوب، جنوباً پیرنه سلسلۀ جبالنك صیرتیله اسپانیادن آیرلمش، غرباً وشمالاً دخی ((اوست غارونه))، شمال شرقی طرفندن و شرقاً (اوده)، شرق جنوبی طرفندن دخی ((شرقی

پیرنه)) ایالتلریله احاطه وتحدید اولنمشدر. مساحۀ سطحیه سی ٤٨٩٤ كیلومتره در. بو ایالتك قسم جنوبیسی پیرنه طاغلرینك اتكلرندن واونلرك آره لرنده بولنان بعض دره وبایرلردن عبارت اولوب، طاشلق وغیر منبت ویالكز بعض مرعالر واومانلرله مستور در؛ قسم شمالیسی ایسه دوز اووه لردن عبارت اولوب، غایتله منبت اولمغله، حبوبات، اوزوم وزیتون محصولاتی چوقدر. اوچ نهرپیرنه طاغلرندن اینوب، بو ایالتك ایچندن اوكرلر، كه بونلرده ایالتك اورته سندن چكن (آریاژه) نهریله شرق طرفنده آقان (ارس)‌ وغرب طرفنده جریان ایدن (سالات) نهرلریدر، كه اوچی ده بو ایالتدن چیقدقدن صكره برلشوب، (غارونه) ایرماغنه دوكیلورلر.‌ بو نهرلره دوكلمك اوزره داخل ایالتده دها بر قاچ چای نبعان ایدر. بر چوق مغاره لری دخی واردر. كه ایچلرنده مواد كلیسیه یی حاوی صولر آقوب تحجر ایدر. هواسی قیشین پك صوىٔوق اولوب، یوكسك یرلری بر قاچ متره لك قارله مستور اولدیغی كبی، یازین دخی پك صیجاق ویالكز صوك بهارده معتدل وكوزلدر. دمیر معدنلری پك چوق اولوب، ایالتك باشلیجه منبع ثروتی حكمنده در. قورشون، باقیر وساىٔر معدنلر دخی اخراج اولنیور سه ده، رومالیلرك زماننده اخراج ایدلمكده بولنمش اولان كومشلی قورشون ترك اولنمشدر. نهرلرده آلتون توزی بولندیغندن، بو معدنك دخی مملكتده موجود اوله جغی آكلاشیلیورسه ده، الآن بولنه مامشدر. معدن صولری وقاپلیجه لری حسابسز اولوب، اك مشهورلری (آقس) و (اوسات) شهرلری قربنده كیلردر. بو ایالتده چیقان دمیر هم اك برنجی صنعتی ده دمیر جیلك اولوب، ٥۰ دن زیاده دمیرخانه ودوكمخانه لری واردر. چوقه، فاىٔله، پورسلن، جام، كاغد فابریقه لری ودباغخانه لری وتخته ومرمر بچقیخانه لری دخی چوقدر. بو ایالت وجه آتی اوزره اوچ قضایه تقسیم اولنوب، ٢۰ ناحیه و ٣٣٦ دواىٔر بلدیه یی حاویدر. اهالیسنك قسم كلیسی قتولیك اولوب، یالكز ٧۰۰۰ نفوسی پروتستاندر. قضا ناحیه دواىٔر نفوس فوآ ٨‌‌‌‌‌‌‌‌‌‌‌‌ ١٣٩ ٦٣٦ ٨٣ پارمیا ٦‌ ١١٤ ٦٩٢ ٧٧ سنت ژیرون ٦ ٨٣ ٩٧۰ ٨٤ جمعا ٢۰ ٢٣٦ ٢٩٨ ٢٤٦

بو ایالتك هیج بر بیوك شهری اولمیوب، حاوی اولدیغی یكرمی قدر قصبه نك اك بیوكی كی اولان (پامیار) ك آنجق ٩۰۰۰ ، ومركز ایالت اولان (فوآ) نك ده ٦٧۰۰ اهالیسی واردر. فرانسه نك شمال ایالتلرنده كی مدنیت وجولان بو ایالتده مفقود اولوب، یالكز بازار كونلری قصبه لرده بر آز حركت كورینور. اهالی وعلی الخصوص كویلیلر وطاغلیلر اسكی اصول وعادات وقیافتلرینی محافظه ایدوب، ایچلرنده اوقویوب یازمه بیلنلر دخی پك آزدر. فرانسز جه نك قبا بر نوعیله متكلمدرلر. رومالیلرك یاپدقلری بیوك جاده لرك هیچ بری بو ایالتدن چكمیوردیسه ده، معدنلرینك وقاپلیجه لرینك كثرتی مناسبتیله، بو قومی جلب ایتمش اولملی ایدی، كه هر طرفنده رومالیلردن قالمه پك چوق آثار بولنیور. اندلسی ضبط ایدن غزاة مسلمین پیرنه طاغلرینی آشه رق، بو مملكتی دخی ضبط وخیلی وقت محافظه ایتمشلردی. مؤخراً بر طاقم قونتلقلر تشكل ایتمشیدی.