Albanie - آرناؤدلق

بلقان شبه جزیره سنك یعنی روم ایلی دنیلن اوروپای عثمانینك غرب طرفنده وآدریاتیق دكیزینك ساحل شرقیسنده بر قطعه در، كه طولاً ناره كورفزندن وحدودیونانیه دن قره طاغك حدود سابقه سیله بو سنه وصربیه حدودینه، وعرضاً آدریاتیق ویونان دكیزلری سواحل شرقیه سندن بلغارستان حدودینه، واردار نهرینك آشاغیكی مجراس

قییسنه وساحل بوینجه اولكونه واشقودره یه قدر اولان یرلر دخی روز ومنبت اووه لردن عبارتدر. چاملق دنیلن جنوب غربی سواحلی ایسه آلچق تپه لردن عبارت اوله رق، هواسنك ملایمتیله وزیتون، پورتقال، لیمون آغاجلریله جنت آسا بر یر اولوب، كوزل قیشله لری دخی حاویدر. ایج طرفلرنده دخی طاغلرك آره لرنده پك كوزل وادیلر، بایرلر ومرتفع اووه لری بو قبیلدندر. آرناؤدلغك شمالنده ایده غایت كنیش ومحصولدار بر مرتفع اووه بولنیور، كه قو صوه اووه سی نامیله معروفدر. لكن بو اووه لر طاغلرینه نسبةً جزىٔی اولوب، (آلب) سلسله سندن منشعب اولان طاغلرینك باشلیجه سلسله سی (شار) طاغیدر، كه شمالدن‌ جنوبه طوغری اوزانه رق، آرناؤدلغك اورته سنده خیلی آلچقلنوب، كسیلیر كبی اولورسه ده، بر آز دها آشاغیده (غراموس) وبعده (پیندوس) نامیله تكرار یوكسله رك، یونانك ایچنه قدر اوزانیر. بو سلسله آرناؤدلق قطعه سنك اك مرتفع محلندن عبارت اولوب، بر تقسیم میاه خطی تشكیل ایدیور، كه بر طرفنك صولری آدریاتیق ویونان دكیزلرینه، ودیكر طرفنده كیلر دخی آطه لر دكیزینه وسلانیك كورفزینه دوكیلور. شارك اك مرتفع ذروه سی (قوراب) طاغی اولوب، ٢٥۰۰ متره ارتفاعی واردر. بو سلسله دن صكره اشقودره ایالتنده قره طاغ حدودینه قریب اولان اشقودره طاغلری كلیر، كه اتكلری غرباً اشقودره شهرینه وكولنه، شرقاً یاقوه وایپك وپرزرینه، جنوباً درین نهرینك ساحلنه وشمالاً دخی قره طاغك ایچ طرفلرینه قدر ممتد اولور، وایپكده بر بوغاز تشكیل ایتدكدن صكره، سلسله قوصوه اووه سنك جهت شمالیه سنی طولاشه رق ور آرناؤدلقله یكیپازاری آیره رق، (وولچترین) ە منتهی اولور. بو سلسله نك ارتفاعی شارك ارتفاعنبدن دها بر چوق طاغلر بولنیور، كه بونلرك اك بیوكلری شونلردر :‌ میردیته نك غرب طرفنده اولان (پولغه) طاغی، كه اك یوكسك ذروه سی ١٢٦۰ متره ارتفاعنده در؛ ایلبصان ایله تیرانه‌ آره سنده ممتد اولان (غرابه) طاغی، كه آنجق ٦٣٢ متره ارتفاعی واردر؛

ایلبصانك جنوب شرقیسنده شمالدن جنوبه ممتد اولان (سوپوت) طاغی، كه اك مرتفع محلی اولان (پولیس) ك ١٧٦۰ متره ارتفاعی واردر؛ برانك شرق طرفنده واقع (تومور) طاغی، كه اك یوكسك ذروه سی ٢٤١٣ متره ارتفاعنده اولوب، پك دیك اولمغله، اوستنه چیقلمق مشكل اولدیغی كبی، ارتفاعی حسبیله اوستنده تنفس دخی كوجلشدیكندن، واك یوقاریسنده ازمنۀ قدیمه دن قالمه برمعبد خرابه لری بولندیغندن، اورانك اهالیسی بو خرابه یی امام علی رضانك تربه سی ظن ایده رك، بو طاغه بر قدسیت نظریله باقرلر، وآره صره عجایب طبیعتدن اوله رق طاغدن طوپ سسنه مشابه چیقان سسدن احكام چیقاریرلر؛ خیماره ‌قضاسنده بولنان دیكر (سوپوت) طاغی كه اك یوكسك یری ٢۰٢٥ متره ارتفاعنده اولوب، ساحل بوینجه اوزانیر، ومرتفع قیالردن عبارت بر ساحل تشكیل ایدر. اسكی یونانیلر بوكا (آقروكراونیا)‌ دیرلردی، كه ((یلدیرم طاغ)) دیمكدر. ایكنجی درجه ده دخی پرمدی قصبه سنك غربنده ممتد اولان (نمرچقه)، یانیه شهرینك شرقنده وكولك كنارنده اولان (میچكل) وچاملق قطعه سنك شرقنده بولنان (سولی) طاغلریدر. (پیندوس) سلسله سنك شعبه لرندن اوله رق قونیچه شهرینك جنوب شرقیسنده واقع (لازاری) و (پاپافینغو) طاغلریله (شار) سلسله سنك شعباتندن اوله رق اوخری كولنك شرق طرفنده ممتد اولان (پریستری) ایله مناسترك غرب جنوبیسنده كاىٔن (نووچقه) طاغی، وبرده شار طاغنك مابعدی كبی اولوب، واردارك اوته سنه صربیه حدودینه قدر اوزانان وكندیسیله شار آره سنده مشهور (قچانیك) بوغازینی تشكیل ایدن (قره طاغ) ذكره شایاندر. آرناؤدلغك نهرلری دخی چوق اولوب، اك بیوكلری (درین) ایله (واردار) ایرماقلریدر. درین ایرماغی ایكی نهرك تلاقیسندن حاصل اولوب، بونلرك برینه قره درین (درین ایزی)، ودیكرینه آق درین (درین ایبارده) دینور. قره درین آرناؤدلغك وسطنده بولنان اوخری كولندن چیقوب، جنوبدن شماله، وآق درین دخی ایپك طاغلرندن نبعانله، شمالدن جنوبه و بعده جنوب غربی یه طوغری آقه رق، (لومه) ده ایكیسی برلشدكدن صكره غربه طوغری دونه رك، و(لش)‌ قصبه سنك كنارندن چكه رك، (شنكین) لیماننك

جنوبنده آدریاتیق دكیزینه دوكیلور. (واردار) ایرماغی (شار) شرق طرفنده كی اتكلرندن نبعانله، صاغ وصولدن بر چوق چایلر ودره لر اخذ ایله، جنوب شرقی یه طوغری آقه رق، سلانیك كورفزینه دوكیلور. ایكنجی درجه ده كی نهرلری دخی ایكی اولوب، بری (پیندوس) طاغندن نبعانله شمال غربی یه طوغری آقه رق آولونیه نك اوست طرفنده آدریاتیق دكیزینه دوكیلن (ویوسه)؛ ودیكری (غراموس) طاغندن نبعان ایدن (برات) نهریله ینه بوطاغك شمالی اتكلرندن نبعان ایدن (داوول) نهرینك اجتماعندن حاصل اولوب، (موزاكه) اووه سنك ایچندن چكه رك، ینه بحر مذكوره دوكیلن (سماك) ونام دیكرله (اركند) نهریدر. اوچنجی درجه ده كی انهار دخی، جنوبدن شماله طوغری صایلدیغی حالده، نارده،لوروس،وو وو،قلامه،پاوله، اشقومبی،آرسند،ایشمی،ماط، كیر، بویانه نهرلریدر. [بو كلمه لره مراجعت بیوریله.] آرناؤدلقده اوچ بیوك كول بولنیور، كه بری اشقودره نك شمالندن قره طاغك ایچنه قدر ممتد اولان و آیاغی اولان (بویانه) واسطه سیله صولری دكیزه دوكیلن اشقودره كولی؛ ایكنجیسی اوخری شهرینك جنوبنده اولوب، قره درین آیاغی حكمنده اولان اوخری كولی؛ اوچنجیسی ده اوخری كولنك جنوب شرقیسنده اولوب، طار بر بوغازله ایكی یه آیرلمش اولان (پرسپه) كولیدر. ایكنجی درجه ده كیلرده باشلیجه (مالك)، كسریه، اوسترووه ویانیه كوللریله موزاكه ده كی (تربوف) كولیدر. موزاكه اووه سنك ایچنده وساحل بوینده دخی بر چوق كوللر وار ایسه ده، بونلركولدن زیاده بطاقلق دنیله بیله جكندن، بو عدده ادخال اولنمدی. دراچ شهرینك شمالنده دخی بیوجك بر كول واردر، كه وقتیله لیمان اولوب، آغزینك قپاتدرلمسیله، منعفن وصیتمه یی موجب بر كول حالنده قالمشدر. آرناؤدلق ساحلی كنارده كورفزی ایچندن اولكونه قدر ٥۰۰ كیلومتره دن زیاده اولوب، حیلی كیرنتی وچیقینتیلری وكورفزلریله طبیعی لیمانلری وار ایسه ده، صنعی اوله رق، مكمل ومحفوظ وبیوك سفاىٔنك یناشه بیلمسنه مساعد بر لیمانی یوق كبیدر. پروزه نك بر ایكی مكمل لیمانی وار ایسه ده، كورفزك مدخلی صیغ وقیالیدر. (ووترینتو)‌اسمنده قورفه شهرینك تاقارشیسنده

اسكیدن بر شهر وكوزل بر لیمان بولنمش ایسه ده، لیمانك آغزی قپانوب، طالیان كبی قوللانلمقده در، وشهر خراب اولمشدر. دراچك مكمل وواسع لیمانی دخی اعصار سالفه ده، وندیكلیلرك یولی قپانسون دیو، سد اولنه رق، بر بطاقلق حالنه قونمشدر. بو كونكی كونده نوجود اولان لیمانلرینك اك اییلری قورفه آطه سنك منتهای جنوبی قارشیسنده كاىٔن (مورتو) لیمانیله آولونیه اسكله سنك جنوبنده كاىٔن (پاشا لیمانی) در. (سراندوس) ، آولونیه، دراچ و (شنكین) ە دخی و اپور یناشیورسه ده، لیمانلری یوق كبیدر. پاغه، صیاده وپالرمو اسكله لرینه دخی خیلی كوچك یلكن كمیلری آمد وشد ایدر. آرناؤدلردن كمیجیلك ایدنلر باشلیجه اولكونلیلر اولوب، بونلر ماهر قپو دانلر اولدقلری كبی، بیوك سفینه لری دخی بولنمغله، آق دكیزك هر طرفنه ایشلدكدب بشقه، بحر محیط آطلاسی یه بیله چیقوب، انكلتره یه قدر كیدرلر؛ یوزه قریب سفینه لری واردر. (برغودتیت) ونام دیكرله (خیماره) سواحلی اهالیسی دخی كمیجی اولوب، بعض كوچك كمیلری واردر. پارغه ده دخی یرلیلرك مالی اوله رق بر قاچ كمی بولنور. آرناؤدلغك برنجی درجه ده اولان شهرلری اشقودره، پرزرین، مناستر ویانیه در،كه هربرینك اهالیسی ٣۰۰۰۰ دن زیاده در؛ ایكنجی درجه ده كیلر ایپك، یاقوه، پرشتینه، اسكوب، قالقاندلن، دبره، تیرانه، ایلبصان، برات، اوخری، كوریجه، كسریه، اركری وپروزه شهرلریدر، كه هر برینك اهالیسی ١۰۰۰۰ ایله ٢۰۰۰۰ آره سنده در؛ اوچنجی درجه ده كیلرك باشلیجه لری ده لش، غوسینه، پلاوه، متروویچه، قومانو، غوستیوار، كوپریلی، پرلپه، رسنه، آقچه حصار، دراچ، قوایه، آولونیه، تپه دلن، پرمدی، دلوینه، قونیچه، مچوه، فیلات ، آیدونات، مارغلیج وپارغه قصبه لریدر، كه هر برینك ٣۰۰۰ دن زیاده اهالیسی واردر. آرناؤدلق قطعه سی، طبیعت اراضی واهالیجه، ایكی قسمه منقسم اولوب، (اشقومبی) نهرینك شمالنده كینه كیغه لق، وبو نهرك جنوبنده كینه ده طوسقه لق دینور. كیغه لق قطعه سی اشقودره، یاقوه وایپك، پرزرین ولومه، دبرهٔ زیر ودبرهٔ بالا مالیسیالریله

دوقه كین، میردیته وماطی دخی جامعدر. [((مالیسیا)) ماده سنه متاجعت بیوریله.] طوسقه لق قطعه سی دخی ساحلده اولان موزاكه، لاپلق وچاملق ایله نفس طوسقه لق، ملاقستره، تیموریچه، اسقراپار، دشنیچه ، دانغلی (كه صحیحی طاغلیدر)، اوپار، قولونیه، داوول، ناسلیج، زاغور، قورنده، سولی وسرهٔ یی جامعدر. [بو كلمه لره مراجعت بیوریله.] آرناؤدلق قطعه سی، دولت علیۀ عثمانیه نك الینه چكه لی، هیچ بر وقت برادارۀ واحده یه جمع اولنمیوب، اوته دن بری بر قاچ پاشالق ویا ایالته منقسم بولنمش اولدیغی كبی، ولایاتك تشكیلندن بری دخی مناستر وپرزرین بر قاچ دفعه ولایتدن سنجاغه، وسنجاقدن ولایته تحویل اولنمشدر. شمدیكی حالده بوقطعه درت ولایته منقسمدر، كه بونلرده : یانیه، مناستر، قوصوه واشقودره ولایتلریدر. تقسیماتی وجه آتی اوزره در : ولایت سنجاق قضا ناحیه یا‌‌‌‌‌‌‌‌‌‌‌‌‌نیه{ یانیه‌‌‌‌‌ {یانیه‌‌ صیاده { آیدونات‌ {‌‌‌ زاغور {فیلات‌ {مچوه ‌اركری { اركری ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ {دلوینه { سراندوس {تپه دلن {خیماره {قورولمش برات {برات {موزاكه، ملاقستره {آولونیه {اسةراپار {تیموریچه لسقویك { لسقویك {پرمدی ‌{فراشر {پوغون {قونیچه پروزه {پروزه پارغه،غومنیچه، مورطو {لوروس مارغلیچ مناستر { مناستر {پرلیه رسنه {اوخری مورنجوره {قرچوه پرسپه {فلورینه رودونیك، اتروغه، ایزوغلاوه كوریجه { كوریجه {كسریه بهلشته، خوروپشته {استاروه اوپار قولونیه دبره { دبرۀ بالا ‌ {دبرۀ زیر { ایلبصان {ماط {رقه ترو یشته پرزرین { پرزرین راحوفچه ‌ {لومه قالیس {قالقان دلن غوستوار

ولایت سنجاق قضا ناحیه پرشتنه { پرشتنه { پره شوه { كیلان { ولچترین { مترویچه یكیپازار { سنیچه ‌ { آقوه ویرانش { قولاشین اسكوب { اسكوب قچانیك، پیانجه ‌‌ { اشتب مالشی { پلنقه { قوچانه { قومانوه { رادویشته { قره طوه ایپك { ایپك { یاقوه { ترغویشه { برانه { غوسینه اشقودره { اشقودره { اشقودره اشقرل، خوط، قلمند، كول كناری، قصطرا، قوبلیق، شاله شوش. ‌{ پوقه پوستریپا، رج شعلوها، ریول، غروده شلاق، تماله، ساحاله، فروجه، زادریما، قرانیه. آلقچه حصار لش مردیتا قثه لا، طاغ كناری. دراج { دراج ‌ { پكین ایندرونیك { تیرانه { شیاق ایشم‌ { قوایه آرناؤدلغك ساحله قریب وآلچق یرلرینك هواسی معتدل، و ، بطاقلقلری جهتیله هوالری مختل اولان بر قاچ یر استثنا اولندیغی حالده، هواسی عمومیت اوزره غایت كوزلدر. یوكسك یرلری وطاغلری ایسه خیلی صوىٔوق اولوب، سنه ده آلتی آی قار آلتنده بولنور. اووه لریله بایر و وادیلری غایت منبت ومحصولدار ایسه ده، طاغلرینك اكثریسی قورو وطاشلق اولوب، همان هیج بر محصولات ویرمزلر. اك منبت یری (موزاكه)‌ اووه سی، واك لطیف یرلری دخی جنوب غربیسنده واقع چاملق قطعه سیله شمال شرقیسنده واقع قوصوه‌ اووه سی واونك جوارلری یعنی پرزرین وقالقان دلن طرفلریدر. چاملق قطعه سنده لیمون، پورتقال، زیتون، آغاج قاىٔونی وساىٔر اقالیم معتدله یه مخصوص میوه لر؛ وقوصوه ایله جوارلرنده دخی الما، آرمود، اریك، كراز وساىٔر صوىٔوق هو الره مخصوص

میوه لرك اك اعلالری حاصل اولور. مناستر، رسنه كوریجه وكسریه طرفلری دخی مرتفع اوە لری حاوی اولوب، خیلی منبت ومحصولداردر. هر نه قدر كه طاغلق محللرك محصولات محلیه سی اهالیسنی بسلمكه كافی دكل ایسه ده، آووه لرده و آلچق یرلرده حاصل اولان وبغدای، آرپه، مصر وساىٔره آرناؤدلغك هر طرفنه كفایت ایتدكدن صكره، خیلی مقداری دخی آرتوب، ایتالیا وتریسته یه اخراج اولنور؛ ویالكز قور اقلق سنه لرنده خارجندن آرناؤدلغه ذخیره ادخالنه لزوم كورینور. طاغلرك اكثریسی چیلاق ایسه ده، اورمابلری وعلی الخصوص میشه وچام آغاجلری پك چوق اولوب، سفاىٔن وابنیه ایچون فرانسه یه واوروپانك ساىٔر طرفلرینه بر چوق كراسته كیتمكده ایدی؛ آنجق شمد آزالمش، ویوللرك فقدانندن اخراج اولنه مامغه باشلامشدر. اهالینك باشلیجه معیشتی مصر بغدایندن وحیوانات محصولاتندندر.‌طاغلرده كلیتلی قویونلر وچكیلر بولنوب، بونلرك بر مقداری موزاكه اووه سیله چاملقده وسلانیك اووه سنده قیشلامقده ایسه لرده، اكثریسی حدودی چكه رك، اسكی قیشلاقلری اولان تسالیا اووه لرینه اینمك مجبوریتنده درلر. قویونلرك یوكی پك ایی دكلسه ده، اتلری غایت لذیذدر. صیغیرلرینك جشه لری كوچك ایسه ده، قوتلی وطیانیلقلی درلر. موزاكه اووه سنده برجنس كوچك آت واستر دخی یتیشدیریلیر. طاغلرنده كیك وقراجه انواعیله، طوموز، آیی، تیلكی طاوشان وساىٔر آو حیواناتی پك چوقدر. معدنلرك بعض انواعی دخی آناؤدلق طاغلرنده موجود ایسه ده، هیج بری اخراج اولنمامقده در. چاملق، برات، پرلپه وپرزرین طرفلرنده خیلی توتون حاصل اولور، وچاملقده غایت مشهور بر نوع انفیه یاپیلیر. یانیه ده وساىٔر بعض طرفلرده خیلی ایپك دخی چیقار. لكن اخراجاتك اك كلیتلی قسمی حیوانات دریلرندن عبارتدر. آرناؤدلقده اسكیدن قالمه بعض صنعتلر الآن موجوددر : یانیه وپرزرین واشقودرده متعدد دباغخانه لر بولنوب، سختیان اعمال اولنور ؛ شیاق وعبا آرناؤلغك هر طرفنده وعلی الخصوص كیغه لقده قادینلر طرفندن اعمال اولنوب، هله مالیسورلر بحرد كندی قویونلرینك یوكندن كندی قاریلری طرفندن یاپیلان منسوجاتله كینه رك، امتعۀ اجنبیه یه اصلا احتیاجلری

یوقدر. پرزرین ویاقوه ده دمیر معمولاتی غایت مهارتله ایشلنوب، پك كوزل اسلحه، مقاص، قلمتراش وساىٔره وحتی یكی سیستم اوزره تفنكلر دخی یاپیلیر. طاغلیلرباروتی دخی كندیلری اعمال ایدرلر. یانیه وپرزرین واشقودره آرناؤدلغك اك صنعتلی قصبه لری اولوب، بونلرده آرناؤدلرك كیدكلری البسه نك نهیىٔه سنه متعلق وسراجلق وسیمكشلك كبی